1 Siikhu etthiipile eettaka ovira aattaka atthu aari anlattaaye Yinsa, mayaahuuti aari ettakhulaaye ekereeku atthaaporu aari owaattakhula mayaahuuti apale aari attakhulaaye eheberayiku, mwaasa yoori manankhwele aya eetta osahawiwaka amana yaawanyiwaka etthu-yooja ya wakhula siikhu. 2 T'iito maaswihaapa apale khumi na awiri aawaakhusanyiyeeyo anakhiyoni ooshi, khusala awooza yoori: “Ajama zetthu, khaninwahi alikha alaleya nttakhuzi la Nnyizinku khusala nawanya etthu-yoojiwa. 3 Attwiizetthu, mwiwaathawule vakatthi venu atthu sapa ooshitahiwa, awiitaala Rooho Ttakatthiifu na oofuwa yoori niwenkhe khaazi eto, 4 na-fweyo nisala nilompa na olaleya nttakhuzi la Nnyizinku.

5 Mattakhuzi apale khuwaatuvela ooshi aya, khunthawula Shiteefanu, nlume wa wiitaala amini na Rooho Ttakatthiifu, anlikha Filipi, Porokoro, Nikanore, Timomu, Parimenashi na Nikolawu, otule aari owaalattelelaaye mayaahuuti wa nti wa Antiyookiya. 6 Khuwaathoonyeza atthu apale vakatthi wa maaswihaapa, atthaapo khuwaalampela awaattheliye a makhono.

7 Etthiipile nttakhuzi la Nnyizinku khusala limwazeya. Khusala avira awulaka anakhiyooni wa waakhuvavo Yeruzaleemu. Theenya khuntti khuluyeene ya mahaakhimu a tiini khusala ashutulele amini.

8 Stefanu ntthu wa wiitaala mahala na owahi wa Nnyizinku aari oretta vitthu zootikinisa na alama vakatthi wa atthu. 9 Attaaphale khupuwa atthu a nnyupa enthukumaniwaamo apale ‘Ooleviwa’, mayaahuuti a Sireene na Alishanteriya na apale a nti ya Silisiya na Aasiya. Atthu aya apo khwaaza onyakulisanana Shiteefanu, 10 ila khuhisala awahi oshintta opuwa na Rooho etile aari ottakhulanaaye.

11 Aphano khupankiwa atthu akinoko alupe yoori: “Nansiila Shiteefanu attakhulaka mattakhuzi onkufurwela napiyu Munsa na Nnyizinku.”

12 Mwaasa wa mattakhuzi atthaapo, khuwaatapanya atthu, anamalokozela a tiini na anamanozela kano khunkhola Shiteefanu khunthuula khulawana onyuupa woophuteyiwawo milattu. 13 N'oofiya khusala anlokoveza mattakhuzi oovanyeya aari oraaye: “Mwinyi otu okhitiri ottakhulawo pure opuuro okhuno woottakatthifuwo na nkatthi wa kano. 14 Nasiila eriwaka Yinsa Nnazareeti apwechela puuro eti na khuzukuliza thwapiya aalikhiyeezo napiyu Munsa.”

15 Wakathi amweekesiyeevo, ooshi apale eekhaliye onyuupa woophukaniwawo khoona omaasho wawe ompuwaka nkhama nlayikha.