1 Wakathi aya opo olumwenku wooshi waarina luuka moote na nanna moote yoottakhula.

2 Atthu aalankhiye malawa-juwa khusikana nttapo la Shinaari khwiikhala attaapho.

3 Khusiilana yoori: “Nlaweni nuupe thizolo nooche saaneene.” Thizolo epile khuretta wiiya mawe, piriniisi khunretta wiiya mattakha. 4 Theenya khuri: “Nlaweni nijeke sitati yawiiyana korofwa khuluyeene enkomaaye pinku, yoori nzina letthu liiye loojuwanikha, nihiiye woomwazeyela olumwenku wooshi.”

5 Paata ya toole, Nnyizinku khwiishukha yoori oone sitati ya korofwa etile aari ojekaaye atthu apale. 6 Ye khuri: “Moone! Atthu apa amoteru, ooshi anttakhula luuka moote. Eti arettiyeeyo eetta waaza, khaavo anttelaaye owaakarawela etile awaziyeeyo. 7 Nlaweni niishukhe navirikanise luuka anttakhulaaye yoori ahisala asiilana mmote na nzaawe.”

8 Ethiito, khukaraweleya ojekiwa sitati etile, Nnyizinku khuwaamwazela olumwenku wooshi. 9 Ti eto sitati etile khutthajiwa nzina la “Babeeli* Babeeli enlattanana nttakhuzi liriina maana ootapanyeya”.”, mwaasa wa Nnyizinku ovirikanisa luuka ya anaatamu ooshi. Attaapho, Nnyizinku khuwaamwazela olumwenku wooshi.

10 Eti peewu ya Sheemu. Sheemu afiiyeevo nyaakha miiya khunvokola mwanawe Arifwakisaati, nyaakha miwiri paata ya nnyeri ovira. 11 N'onvokola Arifwakisaati, eekhaliye nyaakha miiya thaanu, khuwaavokola theenya aana aalume na aakha.

12 Arifwakisaati afiiyeevo nyaakha talaathiini na mithaanu, khunvokola Sheela. 13 Paata yonvokola Sheela, eekhaliye nyaakha miiya nne na mittatthu, khuwaavokola theenya aana aalume na aakha.

14 Sheela afiiyeevo nyaakha talaathiini khunvokola Heebere. 15 N'onvokola Heebere, eekhaliye nyaakha miiya nne na mittatthu, khuwaavokola theenya aana aakha na aalume.

16 Heebere afiiyeevo nyaakha miiya nne na talaathiini khunvokola Peleekhi. 17 N'onvokola Peleekhi, eekhaliye nyaakha miiya nne na talaathiini, khuwaavokola theenya aana aalume na aakha.

18 Peleekhi afiiyeevo nyaakha talaathiini khunvokola Reewu. 19 N'onvokola Reewu, eekhaliye nyaakha miiya piiri na tiisiya, khuwaavokola theenya aana aalume na aakha.

20 Reewu afiiyeevo nyaakha talaathiini na miwiri khunvokola Serukhi. 21 N'onvokola Serukhi, eekhaliye nyaakha miiya piiri na sapa khuwaavokola theenya aana aakha na aalume.

22 Serukhi afiiyeevo nyaakha talaathiini khunvokola Nahoori. 23 N'onvokola Nahoori, eekhaliye nyaakha miiya piiri khuwaavokola theenya aana aalume na aakha.

24 Nahoori afiiyeevo nyaakha eshiriini na tiisiya khunvokola Teera. 25 N'onvokola Teera, eekhaliye nyaakha miiya na khumi na tiisiya, khuwaavokola theenya aana aalume na aakha.

26 Teera afiiyeevo nyaakha sapiini, khunvokola Eburamu, Nahoori na Hara.

27 Eti peewu ya Teera. Teera khunvokola Eburamu, Nahoori na Hara. Hara khunvokola Loothi. 28 Hara khufwa sitati ya Wuuri, nti wa Babilooniya tuniya aavokoliweewo, ila papaawe khusala ari haayi. 29 Eburamu na Nahoori khuloola. Muukha wa Eburamu aari wiitthiwa Suhuriiya, na-ye muukha wa Nahoori nzina lawe aari Miilika, mwaana wa Hara, aarina mwaana nkina theenya aari wiitthiwaaye Ishika. 30 Ila Suhuriiya khaarina aana mwaasa woohiina mavokozi. 31 Teera khulankha sitati ya Wuuri, nti wa Babilooniya, eettaka Kanaani. Alawaka khunthuula mwanawe Eburamu na ntuuluwe Loothi, mwaana wa Hara, vamote na nkhwewe Suhuriiya, muukha wa Eburamu. Ila afiiyeevo sitati ya Harani khuhivikani, khwiikhala ottuukho. 32 Teera khufwa Harani arina nyaakha miiya piiri na mithaanu.