1 Wakathi aya opo Seezari Akuushitu mfwalume nwulu, aarumiye yoori atthu ooshi apale a nkatthi woofwalume wa Rooma aarina yoolawa waatikhiwa nwarakha ya afwalume. 2 Waatikhiwa opo wamwanzo waarettikhaniye Kureeniyo ari mfwalume wa Siiriya. 3 Wakhula ntthu khusala alawa nti aavokoliweewo olawa waatikhiwa.

4 Yuusufu na-ye khulankha Kalileya sitati ya Nazareeti, khusala alawa Yudeya sitati ya Belemu ottuukho aavokoliweewo wa mfwalume Daawuuda. Ye eetteliye waatikhiwa maana aari woojama wa Daawuuda. 5 Aalawiye na mposaawe Mariyamu ari wa wiimittha.

6 Siikhu zaya epo ari Belemu ottuukhule, Mariyamu khumfiyela siikhu zoopattha ekumi. 7 Khumpattha mwaana w'oomwanzo awe wanlume, khumputaputela vakuwo, khunttattikhela nkashothi zaari ojaamo nyama, mwaasa yoori khaarina puuro yoomaka.

8 Nti otthuupule aariwo amakhampuzi aari wiikhalaaye ntthuttu ashukisaka pwittipwitthi zaya na weekesela osikhu wooshi. 9 Nlayikha la Mbwana khwiishukhela attaaphale aariivo amakhampuzi apale. Nuuru ya Mbwana khuwaamwasikhela, khwiiya awoova channu. 10 Ila nlayikha ntthile khuwooza yoori: “Mwihoove! Miiyo kateela owuuzani hapari zooshapweya za furaha khuluyeene, enttelaaye wiiya ya atthu ooshi. 11 Leelo ethiiti, sitati ya Daawuuda mwavokoleliwa Namuusuru eeyiye Al-Masiihu, Mbwana. 12 Alama yenu ti eto: mwininsikana mwaana aputaputeliwe vakuwo, attattikheliwe nkashothi enjakaamo nyama.”

13 Nasaapiru khupuwa malayikha a waatta, khuphakanyeya na ntthile lamwanzo, khusala ansifu Nnyizinku araka:

15 Wakathi malayikha apale aruteliyeevo pinkuuni, amakhampuzi khuuzana yoori: “Nlaweni Belemu noone etthu erettikhaniyeewo, etile Mbwana anuuziyeeyo.”

16 Yo khuhirupazi, khulawa khunsikana Mariyamu na Yuusufu na mwaana otule attattikheliwe nkashothi zinjakaamo nyama. 17 N'oomoona mwaana otule, yo khusala alupa epile ooziweezo ti nlayikha monkoni wa Ye. 18 Ooshi apale aasiiliyeeyo hapari aari olupaaye amakhampuzi apale, khwiiya ooshanka. 19 Ila Mariyamu aatthiiye varoho vawe vitthu epile aari osiilaazo, khusala apheleleza maana aya. 20 Paata ya toole, amakhampuzi apale khurutela ntthuttu anttitthimisaka Nnyizinku na ansifwaka khwa zooshi aasiiliyeezo na ooniiyeezo, etthiipile nlayikha laawooziyeezo.

21 N'oofiya siikhu naane, mwaana otule khukhiriyisiwa, khutthajiwa nzina la Yinsa, nttintthile aalupiyeeyo nlayikha ahineemitthiwe.

22 N'oovira siikhu zootwahareshiwa Mariyamu na Yuusufu, nkhama etthiipo zaari olupaazo kano za napiyu Munsa, khunthuula mwaana otule khunlawana Yeruzaleemu yoori enkheleliwe mmakhono wa Mbwana 23 maana yaatikhiwa nkano wa Mbwana yoori: “Mwaana wamwanzo wanlume ona yoophakuliwa khwinkhiwa Mbwana.” 24 Yuusufu na Mariyamu khwinkha twaha nkhama etthiipo zinrumaazo kano za Mbwana: “makhoko mawiri ama jiwa piiri.”

25 Wakathi aya opo Yeruzaleemu aariwo mwinyi mmote aari wiitthiwaaye Simiyooni, aari wa shariya na woomoova Nnyizinku. Ye aari owejela wuusurwiwa wa atthu a Ezirayeele. Rooho Ttakatthiifu yaari vamote na-ye 26 na khunthoonyeza yoori khaari ofwa ahimooneeni Al-Masiihu wa Mbwana. 27 Simiyooni khweetta Nnyupa wa Nnyizinku alokoziwe ti Rooho Ttakatthiifu, wakathi apapaze antaniyeevo Yinsa yoori aretteliwe etile yaalupiweeyo nkano, 28 Simiyooni khunthuula mwaana otule mmakhono mwawe khunshukhurwela Nnyizinku araka:

33 Papaawe na mamaawe khwiiya ooshanka mwaasa wa mattakhuzi apale aari onlupezaaye Simiyooni mwaana otule. 34 Simiyooni khuwaaparikhiya, khumuuza Mariyamu maama wa mwaana yoori: “Mwaana otu Nnyizinku anthawula yoori atthu awaatta a Ezirayeele ajikwise ama awoosuru. Ye alama ya Nnyizinku ila atthu a waatta anlawa ankatthale. 35 Mwaasa wa ethiito, wuupuwela wa nroho wa atthu a waatta onteela osaruwa; weeyo Mariyamu enteela wuupattha huzuni khuluyeene nkhama phanka yoonoliwa yoori eshije nafusi yawo.”

36 Attaaphale aarivo sharifwa mmote aari wiitthiwaaye Aana. Aari mwaana wa Fwanuweele wa lihimo la Asheeri, aari wa wuuluvala. Eekhalaniye mannawe nyaakha sapa, 37 paata yomfwela mannawe, khuhiraliwi mpakha opattha nyaakha thamaaniini na mine. Khaari olaamo Nnyupa wa Nnyizinku nthana na osikhu, khaazi yawe yaari omwaaputu Nnyizinku ofuka na olompa. 38 Wakathi otthuupo khwaaza onshukhurwela Nnyizinku attakhulaka monkoni wa mwaana otule, awoozaka atthu ooshi apale aari owejelaaye wookhowa wa Yeruzaleemu.

39 Yuusufu na Mariyamu nawiisha oretta zooshi epile zaari orumaazo kano ya Mbwana, khurutela Kalileya sitati ya Nazareeti owaya. 40 Mwaana khusala awula saaneene na khwiiya njuwi nwulweene, rehema ya Nnyizinku yaari vamote na-ye.

41 Wakhula mwaakha Mariyamu na Yuusufu aari weettaka Yeruzaleemu onjampo la Paashikowa. 42 Wakathi Yinsa apatthiyeevo nyaakha khumi na miwiri, Mariyamu na Yuusufu khulankha khusala alawa onjampo la Paashikowa nkhama etthiipile aazowereliyeezo, alawaka anthuuliye Yinsa. 43 N'oofiya khuretta njampo ntthile khwiisha, khusala arutela owaya. Yinsa khusala Yeruzaleemu, mamaawe na papaawe woohijuwi. 44 Yo aari woona yoori ori khuntti etile yaari orutelaaye onti, khuvira siikhu ntero eettaka weettetta, aphano khwaaza omweekesa awoozelaka ajamaaze na ashirikhaawe. 45 Khuhisala ampattha, khurutela Yeruzaleemu olawa omweekesa. 46 Eviriyeevo siikhu ttatthu, khunsikana ari Nnyupa wa Nnyizinku eekhaliye na anamasomisa awulu a tiini eettaka onsiila na omuuzela. 47 Ooshi apale aari onsiilaaye khunshankela mwaasa woojuwa wawe na nanna aari owaajipwaazo. 48 Aphano apapaze n'oomoona khushanka, mamaawe khumuuzela araka: “Mwanaka! Niini epi oniretteliyeezo? Miiyo na papaawo naari wa wantipweya naaza raku oweekesa.”

49 Ye khujipu yoori: “Mwaari okeekesela-ni? Khamwaari ojuwa yoori miiyo kaarina ya wiiya Nnyupa wa Paapa?” 50 Yo khuhiweeleyi etthu aari olupaaye.

51 Yinsa khurutela nti wa Nazareeti na papaawe na mamaawe khusala awaashututela. Mamaawe aari oretta athokorelaka vitthu epile zooshi nroho mwawe. 52 Yinsa khusala avira awulaka nkatthi wa ojuwa, hirimu na nrehema ya Nnyizinku na atthu.