1 Wal Ilaihu bin kipgon tok, “Mi bradin nomo lilbit, en mi sheiksheikbat oloba 2 wen ai irrim God jingat adbala brom det thanda, 3 en wen ai luk det laitining im laitlaitbat langa skai. 4 God det brabli strongbala bos oldei jingat adbala weya im dalim ebribodi wanim dei garra dumbat. Im jingat jis laik det thanda. 5 Im dum brabli klebabala ting weya wi nomo sabi. 6 Im dalim det rein en sno blanga buldan hebiwan, 7 en tharran na oldei meigim wi stap dumbat wek, en im meigim wi jinggabat blanga God pawa. 8 En detlot ting na meigim ola enimul lukabat blanga draiwan pleis blanga jidan. 9 Det win en det rein kaman kolwethataim, 10 en wen God blo langa detlot riba en bilibong, dei jidan brabli aisiwan jis laik rok. 11 God oldei dalim det rein en laitining blanga kaman, 12 en dei go oloba langa det skai, 13 blanga larramgo woda, samtaim blanga panishim wi, en samtaim im jidan brabli kainbalawei langa wi.”

14 Wal Ilaihu bin kipgon tok langa Job, “Wal yu jinggabat brabli gudwei blanga ol detlot klebabalawei blanga God na. 15-16 God sabi ebrijing, bat yu dalim mi hau God meigim laitining shain oloba langa skai, en hau im oldei pudum detlot klaud langa det emtiwan pleis. 17 Det win oldei bloblobat brabli hotwan en yu oldei barnbarn nomo lilbit. 18 Wal God gin spredimat detlot klaud langa det skai. Yu reken yu gin album im wen im dum lagijat?

19 “Wal yu dalim melabat hau melabat garra tok langa God. Melabat nomo sabi hau blanga dalim God blanga melabat trabul. 20 Maitbi ai garra dai if ai dalim God ai wandim tok langa im. 21 Nobodi gin lukinat det san afta wen det win bin blowimwei detlot klaud brom det skai. 22 Bat det braitwan lait blanga God, im shain mowa braitwan langa det san. 23 Nobodi gin luk God, en im garram detmatj pawa. Im olweis gibitbat ebribodi feyago. 24 Wal wi bradin langa God, dumaji im nomo teiknodis langa detlot hu oldei jidan praudbalawei en reken dei sabi ebrijing.” Lagijat na Ilaihu bin tok.