1 Imuac goi héihéi waŋ énécmiyu kecanʒu nambérac imuhucya ésécnec Anutuguc kéréndéŋ wamma kecmu. 2 Ini imi Kristonéŋ goi héihéi waŋ énécmiyec séciguc eŋaocnec iwawai méŋ wamma mewiŋ ʒé goi héihéiyawac qeriaiguc wammu. Kristo inéŋ neŋaŋ niŋac wamma eŋeya kekecya waima mulu manaŋ héméŋa hiabia ésécnec Anutu héimiyec. 3 Ini imi sucginaiguc kaisero ʒéma haka biria hénia hénia ʒéma hémbaoc haka imuhucya imuac qara acguc méŋ ménda ʒéhicŋimu. Iminéŋ ic embac météré énécmimia ionac hakagina séha wanʒac. 4-5 Kaisero ʒéma ic qerigina ʒapi qeqeya ʒéma hémbaoc (baniarawac mepé qepési ai) wammu imi eneŋ mocʒoŋ yanda Kristo ʒéma Anutuac ama yandaiguc mératéc méŋ ménda memu. Imi ini niŋyacgéma nindacʒu imuac niŋac ac ʒapi qeqeya ʒéma ʒéʒoraŋ ac ʒéma lisi ac imi ménda ʒému, néŋ néwéciguc ewa hia ac ézému.

6 Méŋac méŋ ménda wai énécmigic ac gorosoŋa énézéma ikoc waŋ énécmiwu niŋac. Haka imuhucyawac niŋac Anutuac qeri gericnéŋ ac qeqe haka imuac nambérac héra ionac muru maanʒac. 7 Imuac mia ic imuhucya iniguc késayu késa ménda wammu. 8 Ini becnec imi siŋi tunumaŋac buŋa kecgic, néŋ deguc imi Miŋ Kewuninawac qeriaiguc asac mararaŋac buŋa kecʒu. Imuac asac mararaŋac nambérac imuac séciguc kecmu. 9 Asac mararaŋac héla gocmia imi mia haka hiabia, haka solaŋa ʒéma haka héla. 10 Némacnéŋ Miŋ Kewunina ségiségi mihicŋi mianʒac imi batucgé hémma, 11 ini imi siŋi panamaŋac ai iwawai héla qahac imuac ménda toroqemu, néŋ énézégic haka biria héŋtegicmu. 12 Ieneŋ sasaŋgiaguc waŋanʒu imi kuananéŋ ʒémaŋ ʒéwa gamu mamasuŋaguc waŋu réwérizua. Hémbiŋac séc imi mocʒoŋ asac mararaŋaguc, 13 hénia imuac niŋac, iwawai mocʒoŋ asac mararaŋ néŋ qetagaliyu wininianʒac imi kicninanéŋ hémbiŋac séc waŋanʒac. 14  Imuac ac méŋ yomuhuc ooyawac hezac; Gaugina hekecʒu ini yacgic! ini humuc ic ionac sucgina igucnec yacgic! Kristonéŋ qetagalima asari énécmimac.

15 Imuac ini hakagina dimuhuc wamma kecmu imi niŋtegicmu. Imuhuc wamma ic embac niŋtegic qiŋtegicgina qahac ésécnec qahac, néŋ niŋtegic qiŋtegic ginaguc wamma kecmu. 16 Nalé imi biria yéwériyaguc, imuac niŋac ini nalé imi qaurac ménda qemu. 17 Imuac bec ini ewa soho ic ménda wammu, néŋ Miŋ Kewuninawac ewa siŋ imi dimuhuc hezac imi nitegicma kecmu. 18 Waiŋ doku seliaguc ewa soho ménda wammu. Imi mia kekec soho sohoya. Néŋ Uŋa téréyanéŋ sécgé énécmiyu kecmu. 19 Mepé qepési legic, ʒéma ewa hiawac legic, ʒéma legic téréya eŋaŋ héiamuma ewa qeriginanéŋ Miŋ Kewuninawac muru legic héimima mepésimimu. 20 Haka hénia hénia hicŋi énécmianʒac séc Miŋ Kewunina Kristo Yesuac qaraiguc nalé séc Anutu maŋgocnina ewa hia ac ézému.

21 Waŋu Kristo ee héihéi wammima eŋaocnec méra bacginu kecamumu. 22-23 Kristonéŋ hénaoriŋ ionac orucgina wamma eŋeya séwi wamma kecʒu ionac aŋgéŋ titi ic wanʒac ésécnec, embac méŋac euyanéŋ iniŋa iwac oruha wanʒac, imuac niŋac embac ini euhécgina ionac méra bacginu kecma Miŋ Kewuac muru wammianʒu ésécnec waŋ énécmimu. 24 Néŋ hénaoriŋ eneŋ Kristoac wammianʒu ésécnec embac ini imuhucyanec euhécgina tohotoho waŋ énécmima kecmu. 25 Ic ini acguc iniŋhécgina ionac goigina héiénécmima Kristonéŋ hénaoriŋ ionac goigina héi énécmima ionac niŋac wamma eŋeya kekecya wai énécmiyec imuac séciguc waŋ énécmimu. 26 Imi mia dokunéŋ naec énécmima ackuaʒécnéŋ ʒuac énécmima météré énécmiyec. 27 Imuhuc waŋ énécmima eŋeya kiwaiguc hénaoriŋ téréya kumu énécmima métac métac me kiric misicya qahac téréyanec solaŋanec wammu niŋac imuhuc waŋ nénécmiyec. 28-30  Neŋaŋ imi Kristoac séwi tasia kecʒiŋ imuac niŋac, Kristonéŋ hénaoriŋ héra galeŋgé nénécmianʒac. Ic méŋnéŋ méŋ eŋeya séwiya niŋac méʒé titi ménda waŋamuma nalé séc nene gumu amuma kecanʒac. Imuac ic ini imuhucyanec eŋaŋ iniŋhécgina imi eŋaŋ séwigina ésécnec goigina héi énécmimu. Ic méŋnéŋ méŋ iniŋa goiya héimianʒac inéŋ imi eŋeya séwiya goiya héiamuanʒac tacnec wanʒac. 31 Hénia imuac niŋac ic méŋnéŋ neŋgoc maŋgocya wai érécmima kemma eŋeya iniŋaguc toroqema séwi éréhécnéŋ séwi momacguc wammaoc imuhuc ʒéyu ooyawac hezac. 32 Waŋu imuac hénia saŋa imi qeu hiŋgac hiŋgara. Ni imi Kristo ʒéma Anutuac hénaoriŋ ionac niŋac momacnec imuhuc ʒézua. 33 Waŋu ini imuhucyanec eŋac eŋac eŋaŋ iniŋhécgina imi eŋaŋ ésécnec goigina héi énécmimu. Waŋu embac ini acguc euhécgina onac eegina héi énécmimu.