1 (Legic galeŋawac; Dawidiac legic ʒéra.) Yawe ic biria ionarunec metecgé nénna. Kaiʒiliweŋ ic ionac murunec saiwa menénna. 2 Ieneŋ qeriginanéŋ haka biria niŋareŋ mema nalé séc yaré mihicŋianʒu. 3 Ieneŋ mokoleŋ ésécnec ezelaŋgina qericgic ʒéraguc waŋanʒac. Waŋu ezelaŋgina bawaiguc imi qaté mokoleŋac kua doku ʒéraguc he énécmizac. (Ohec)

4 O Yawe galeŋgé nénna. Kaiʒiliweŋ ic méraginaiguc embi niŋac. Yaré qeqe ic ionarunec hetecgé nénna. Ieneŋ imi néfacgé némbiŋ ʒé wanʒu. 5 Séwi eŋeŋ ic ieneŋ mebiri némbiŋ ʒé bétac hainémma hésanéŋ ufic mema héna ewiaiguc haima baec séséŋna éségic hezac. (Ohec)

6 Ni Yawe yomuhuc ʒéma gézézua; Gi Anutuna, O Yawe, guru héhélinawac gezac haina. 7 Nuac aŋgéŋ titi Miŋ Kewu Yawe, gi yaré naléiguc orucnawac saiwa menénnec.

8 Yawe kaiʒiliweŋ icac ewa siŋ imi ménda nimmina. Manambatucac niniŋ biria imi muŋguc ménda seligimac. Qahac waŋu séwi eŋeŋ wambu niŋac. (Ohec) 9 Lelecgé néŋanʒu imi eneŋ orucgina meyacgic, ʒéna eŋaŋ ezelaŋginawac ʒéranéŋ liliŋgéma eŋaŋ hoturu énécmimac. 10 Geric lokocnéŋ ionac mama hoturu énécmimac niŋ wanʒua. Gericiguc néfacgé énecmina baec séséŋ imuaru hiŋgacma muŋguc ménda érému. 11 Ʒébiri qébiri ic ieneŋ baeciguc ménda seligima nammu. Yaré qeqe ic imi birianéŋ méndacmima kemma inimac.

12 Ni ninʒua Yawenéŋ ʒérabéra mihicŋima kecʒu ionac acgina goiya héianʒac. Waŋu maqeqeya ieneŋ aciguc eŋgic ʒédiŋi énécmianʒac. 13 Hélacnec ic solaŋa ieneŋ guac qacgawac ewa hia ac ʒému. Ic dindiŋa ieneŋ kicgaiguc tacyac wammu.