3-9 Errk ukal Bethany tod udnal il abm alkal. Inchimiy ingin undamarr Simon-ang udnann il. Simon ijam arrmel il, ijam ukal leprosy. Jesus egng ilgag ijanm ul, ilimb abm aber adel ulangan, uk olom alaminjinjal owol udnam udnam algngarr il ulangan. Uk olom alaminjinjal ukal nard algngarr il, uk ilbmb money amayerr afanam il. Ew erarr il, egamennd ontagirr il ingun.

Edn errayennd ininannam edn, errgenn amban errbel edn ingun. “Aneg arr ambarr il ononggiy? Ambul angg money atat afayenn itomiy ambul, uk olom alaminjinjal itolg $300 afayenn ambul. Ilimb abmbangandag ednangan, money ew aremag ednangan, ambul uwayenn ednangan.” Ilimb edn elberr edn ingun, abm aber itom. Adnant alwur oyel edn ingun.

Jesus errgel il ednangan, “Ugnggil urr! enenolg elben errb urr! Abm anengand alwur artartin urr? Udnam ambarr il adun. Edn money aremarr igigun edn, urranganjerr titod amb igigun edn. Eladnarrang igigun edn. Urr money ilg urr, urr uwag ednangan, money aremag uw urr ednangan! Ay onggod aremag inag. Ay angg err uw igungan ay. Abm aber onggom angg adel il, uk olom alaminjinjal owel udnam ilg adenn ambarr il adun, uwal il adun. Abm ugngal arrcharr ambengan ay, uk olom alaminjinjal ogngg ontagirr il adun, abm owel udnam artin ay. Abm ay idnnan elben urrangan ay; abm elgoriy iyannd ingin onggom aliyangan edn, edn iyannd aliyangan edn ingun abm aber angg, errk ednang undamam aliyangan edn. Udnam afarr il adun.”

Ilimb Judas Iscariot il abm omoriy Jesus-ing ingang igurr ednangan il, Priests atatag igurr ednangan il.

Errgel il, “Iyannd arrfingan ay ingun Jesus, ilimb uwangan ay urrangan. Puy urr atuwil!” Priests atat edn aliyarr edn ingun Judas, ilimb ekelekel edn ingun, money adndurag ikirr edn ingun. Ilimb eliyarrwiyanm il ingun.

12-16 Errk egngenniy ilimb egng arronggom ijanm edn. Inn arrirr edn, inn sheep amboch arrirr edn, inn arronggoraag. Ilimb abm omoriy ingin errgel edn ingun: “Abm arrin igug anndan, egng arronggom arrchenag?”

Ilimb abm ujir elarr il. Errgel il ulangan, “Kungar elgor it ugnggarr errn. Puy ubal ugnggar. Abm algam ononggab itom ewangan ubal, og algngalgnganam ewangan ubal. Orren arrkarrkil ubal ingun. Inchim ononggabiy elkengan il. Itolg elkal ubal, abm ukirringg ukil ubal ingun. Galanggannd errg ubal ingun: ‘Jesus il elarr alinnan il, abm alinn ampayinag inun alinn, errk ayin anndangan? Errk abm inannag anndan, errk ebmbebmbolrnj, inndod egng ijanag anndan?’ Ilimb errk adniy eleg ambangan.”

22-25 Edn egng ijijanm edn, egng damper afarr Jesus il, ibangarr alkalg ampayirr il: “Angg ayin iyarrwiyal anndangan.” Ilimb egng itom ubmarrubmarr il, abm omoriy ingin undamag uwal il ednangan. Errgel il ednangan, “Angg afal urr, idnnan aden onggom.”

Ilimb egng orch afarr il, onderr ibangarrag uw errgel il, uwal il ednangan. Abm elgoriy amb ijarr edn. Errgel ednangan, “Olbong angg aden. Abm elgorag ontagin ay urrangan, ulfinam. Olbong aden ilgag ambey ambung abm elgor anggiy ibangarr alkalg. Idnnan elben ay urrangan, egng orch onggod ar uw ijangan ay, ilimb errk alkalng undamarr adniyerr onderr uw ijan alongan ay.”

26-31 Ilimb odnjen hymn errgel edn. Olwon-g igurr edn adniy, olwon ukal Olives. Errk ukuy odn-genm edn adniy, uk ar olbmbannd odn-gen.

Jesus errgel il ednangan, “Ay iyannd urraden ambangan urrangan. Urr elor amb ugnggingan adun urr. Edn anamokom olfernj ar alnggur iyanm edn adun. Galanggannd errgenn edn adun: ‘Alkarnj abm angg olon adenn ambanag il ambungan. Abm itom il urrangan ar sheep atuwinag il urrangan. Ilimb ibangarr alkarnj odnndorag abm arringan ingun. Abm arsheep arrngal ambengan urr.’ Ay idnyur ambennag ay ilimb. Ibangarr alkarnj arrmangannd artinag adun il, ilimb ifanny elkengan ay, Galilee itolg adengan ay ogngg, orren.”

43-50 Galanggannd Jesus uw errgennam, abm elgor itom edn olon igunag edn. Judas-an idndamag igunm edn olon. Abm omoriy abmbannd ingang Jesus-ang, abm itod amb elbenm il ingun Jesus.

Priests amay edn, scribes edn, abm ukirrngg edn abm elgor awar it elarr edn ednangan. Ar uyulgng ilg elarr edn ednangan, ulgnggul errbaniy. Uwam adel ag edn, Judas ogngg abm elgorag errgel il ednangan, “Puy ambul! Ay iyannd uw iyarrwiyanag ay urrangan. Abm algam ononggab ew arrchangan ay ingun. Abm itom il! Arrfil urr ingun! Iyarrwiyaniy algngal urr ingun!” Judas-an olon adel il, algal amb igurr il ingun Jesus. Errgel il, “Master!” Ilimb ew arrcharr il ingun. Ilimb abm elgoriy atatan-g arrfirr edn ingun Jesus. Abm omoriy ononggab Jesus-ang ingang ar uyulgng ignggirr il, abm ononggab adndur ekarr il arurrf. Abm itom amb il Priest amayang.

Jesus errgel ednangan, “Ar uyulgng ilg, aneg adel urr adun ulgnggul ilg awiy, abm arrfinag al adun urr? Abm ay alwur obmbay anganj ay! Abm ay itod amb inann ay, Temple-iy inann ay urranganjerr. Ar ogngg arrfinm adun urr?” Abm omoriy ingang undamarr ugnggirr edn ingun Jesus-ang. Ew orrchel edn.

51-52 Abm elngkelngg ononggabiy arrkarrkinm il ingun.

60-61 Ilimb priest amay ononggiy algnggay errnenn il ednangan. Jesus-ag errgel il ingun, “Uw innday errgerrg inang? Abm inun angg elbelben inun, inang arag errg inang?” Uw arem errnenn il. Uw anganj uw errgel il.

62-64 Ilimb priest amay il onderr uw errgel il ingun: “Christ ayin inang? Abm inang atat alkalng ayin?” Jesus errgel il ednangan, “Iyang ay. Abm ay angg olangarr amay urrang ay. Iyannd ew adun urr, alkal ilg inannag al ay, iyaranggal orrm atuwin alinn urrangan. Abm orrchar ilg elkengan ay olon.” Priest amayerr kawun egidurr il ingin undam, adnant alwuriy egidurr il, alwur amay ilg. Abm onggolg inannam ednangan, errgel il ednangan, “Akudnag ambul! Arrmel ambul! Ayin urr aliyarr urr ingun? Abm uw elemag ednangan err elal ednangan. Abm itom il ibangarr alkalg orrnjen errb il. Abm arrin errg urr?” Ilimb abm ukirrngg edn oyol il ugnggay ambel edn errgel, “Ak ulfin il.”

65 Abm errayennd edn, ewednjemennd idunm edn ingun Jesus. El onpor errnenn ambanm edn ingun, uyamiy arrinm edn ingun. Ilimb errgel edn ingun, “Elbel inang! Abm annul arrirr inun?” Abm arrchunnd err algngarr edn ingun, uyam ifimennd arrinm edn ingun.