16
Hagar pe Ismael
1 Mbrulun Abram, Sarai, ti kah pedih il, odoke homou nedun mapwi. Sarai ti tadan pedih lewen marai homou rangan Hagar, iy pedih Isip. 2 Ile pe Sarai ipe ile tan Abram ihpa, “Lapan ihndrepti yu, pe yu undrupo kom pwi. Ou ala emtir ndroda Hagar, kile pe iy kipu homou nedu.” Abram ihwaso-on nolou tan Sarai. 3 Ile pe Sarai iduwe pedih lewen marai tadan Hagar ti ile mbrulun Abram. Abram kah ilmin Kenan iyenon krismas sungoh, idu mundrun punou kuti ihir. 4 Abram imtir Hagar pe Hagar ile ndriyen.
Hagar ndriyen, ile pe iy kah tawene tadan ti ipe yi iy ti kah iyin pule-en Sarai. Hagar kah isentaryan Sarai pwi. 5 Ile pe Sarai ipe ile tan Abram, “Ou kopwi ahnan pe Hagar isentahrung yu pwi. Yu ndre yu uduwe iy ile tadam, odoke idu ndre iy ile ndriyen, eri iy kah mboren tahrung yu. Huyen, Lapan kopwi tunon toru si ipu huyen pe si ipu mo-on.”
6 Abram isomwi Sarai ihpa, “Ou ohrung oh. Hagar ti lewen marai tadam, pe ou kopwi madam iso tadan. Ou apa opo kihpa kehe kile tadan, eri sane tadam.” Ile pe Sarai ke ipu mo-on ile ta Hagar, pe Hagar iyeu.
7 Hagar iyeu pe ilihir wo ngat hene ise lok on ke porah ndramat hosonto eriy pwi. Wo ngat erti ise ngerin sal ile Sur ea. Engel ta Lapan itureh tadan imin koson wo ngat erti, 8 pe ipe ile tadan ihpa, “Hagar, lewen marai ta Sarai, ou owus kehe pe ka ala kehe?”
Hagar ipe ile tan engel ihpa, “Yu una-au tam bos todo ke Sarai.”
9 Engel ihpa, “Ala yi pe ala ndre lewen marai tadan. 10 Yu we kuduwe papum pe tinombrum pe ombrum su we hala sulo-on, pe we homou ndramat kindranon kindrendrumon su pwi.” 11 Inum pe engel ipe yi ihpa,
“Ou we eduwe kom ise ndrinem ti kamal,
pe we eyuwen rangan kile Ismael,* Ismael ti ihpa ndre ‘Petngendrei Ihrung’ ile nolou Kurti.
odosa ou emin mo-on pe Lapan ihnuwii ou.
12 Odoke nedum kamal kiti we kihir kihpa ndre
donki puyep.
Iy we kimpo ke pahun kile pule-e’ sa hokor pe hokor,
pe sa we hompo kihpa ke eriy kile pule-en yi.
Iy we kindrimin ndroda su tinton pe timso-on pwi.”
13 Hagar idawene ihpa, “Orkom, mahkele eri yu ti undroni Petngendrei pe usohou Tadan.” Ile pe iy irson rangan Lapan ndre isohou ile tadan ti “Petngendrei Iltuwei Yu.” 14 Ile pe sa heneyuwen rangan wo ngat ise ndrokoron Kades pe Beret ti ile “Lapan Moren Ndre Ineltuwe Yu.” Wo ngat kurti ma ilsou.
15 Ile pe Hagar iduwe nedun Abram homou kamal. Abram iyuwen rangan ile Ismael. 16 Krismas tan Abram ti kah ndrorungeh-pe-onoh, idu mundrun ndre Hagar iduwe Ismael.