1 Yakop pe su lewen ka henelila sal ile, eri pe engel se hahrah tadan. 2 Iy indroni su, pe ipe ihpa, “Kurti kotilen Lapan,” ile pe iy iduwe rangan lok erti ile Mahanaim.

3 Yakop iduwe ndramat tadan odo takun nolou eri hala munen, hala ndrongon tinton ke Iso hala Seir. Seir eri ise lon lok mandra-an Idom. 4 Iy ipe ile ta su ipe we su halpa kile tan Iso eri we kihpa ndre kurti, “Mandra-an todo Iso, yu Yakop, lewen marai tadam, uduwe nolou ise ndrongon ou ihpa ndre yu umwin ndrongo Laban uu pe ko use tapa kutih. 5 Yu todo makau, donki, sipsip, meme pe lewen marai kamal pe pedih. Yu uduwe nolou ise ndrongon ou, mandra-an todo, upwe ou ndrinem keweh kile todo.” 6 Ndramat odo takun nolou ti hasa ndre ndrongo Yakop yi, pe hapa ihpa, “Odu atla ndrongon Iso, eri pe iy isondrih ou insa sal. Iy ndroda lewen su kamal ndre hangat.”

7 Yakop inuh ile mo-on pe idawene hutun. Ile pe iy itlangan lewen marai tadan eri ile rimir. Su sipsip, meme, makau pe kamel tadan ti iy itlangan su hala rimir yi. 8 Iy idawene ihpa, “Ipe ye Iso kise pe kipu pahun kile ta su ndramat hemir iy ndre he-en munen, eri su iy ndre hodo omur ti we hohtot ha-au.”

9 Inum ti pe Yakop isurok ihpah, “Lapan tan papu Abraham pe tan tomo Aisak, ehrung yu! Lapan, Ou apa ile todo apa yu kule yi ndre lone pe ndrongo morlo-i su, pe apa we ahnan sane todo ndre sulo-on kile ke huyen. 10 Yu lewen marai Tadam, yu ndramat mo-o, undranon iy ndre huyen pe karundrum tadam ile todo ti pwi. Yu uhndor wo Yordan ule hodoh ule Harran ti todo hangka-an pwi, he-ei ke kendro ise lumwe. Yu use yi mehkele ndrodan ndre lewi rimir. 11 Yu usurok upwe Lapan, Ou ehnuwii yu, kihne Iso kise pe kipu handrai punou kile puli-i. Yu undrunoh. Iy ipei ti kihne we kispo pahun pe kiruhe odu ndre sulo-on, ndrodan ndre su pedih pe kom mone. 12 Antawonon iy ndre Ou apandranan ile todo tih? Ou apa we ahnan sane todo ndre sulo-on kile ke huyen pe apa we yayan nedu pe papu su we hohor hala sulo-on, hahpa ndre on he-en ngerin ndras, pe homou we kindranon kindrendrumon su pwi.”

13-15 Yakop imtir lukumwen sei iyin lok iy isurok odo eriy kutih. Iy itlang maping ti pe ihlite sane ka-an tadan se. Sane iy ihlitei kuti hangahang tadan ile tan tinton ke Iso. Sane iy ipu tan tinton eri meme ndrukwil runget pe meme kamal rungeh, sipsip ndrukwil runget pe sipsip kamal rungeh, kamel ndrukwil tulngeh ndre nedu’ su mapwi hossus, makau ndrukwil hangoh pe makau kamal sungoh, pe donki ndrukwil rungeh pe donki kamal sungoh. 16 Iy itparan su ka-an kurti ile ndre limmir. Handrai hoso ndre ndrakan odo ta handrai. Iy iduwe meme hala sehir, sipsip hala sehir, kamel hala sehir, makau hala sehir pe donki hala sehir. Inum oh pe iduwe ndramtan ndre limuu mada’ su ise ta su ka-an ndre limmir kutih, pe iy ipe ile ta su ihpa, “Atla munen, pe atawe reu ki-in lenga’ ndramat iyin munen pe ndramat idu ndruwen. Oduu otto omur ti etawe reu ki-in ndrokoro’ oduu kihpa ke eriy, nombrun otso ke hopus.”

17 Iy ipe ile tan ndramat ndre we ki-in munen ti ihpa, “Ala uu pe ahrah tan Iso pe iy kihndremte ou kihpa, ‘Mandra-an tadam ti si pe ou apa ala kehe? Sane ka-an ou okunii kurti ta si?’ 18 Eri pe ou apa kihpa, ‘Sane ta Yakop, ndramat lewen marai tadam tih. Iy ipu tan Iso pe yu ukuni hasa munen. Iy eri mapwi ipei omur.’ ”

19 Iy ipaninyan ile ta su ndramtan ndre limuu ndre mada' su ise ta su ka-an ndre limmir ti ihpa, “Nolou kudu eri we oduu atpa kile tan Iso ipe ye oduu adahrah tadan tih. 20 Ada-amelyen kolwii. Atpa kile tadan kihpa, ‘Yakop lewen marai tadam eri mapwi ipei omur.’ ” Yakop idawene ihpa, “Yu we kuduwe sane ka-an kuti hala tadan ti we kiduwe tawene tadan keweh kile todo, pe uh yu kuhrah tadan eri we iy kipu huyen kile todo.” 21 Iy iduwe sane ka-an iy ipu tan Iso ti hala munen, pe iy ti imtir iyin ndre Mahanaim.

22 Idu ke ndre lukumwen erti pe Yakop itlang pe ikuni mbrulun ndre rumuu, horu pedih lewen marai ta Resel pe Leah, su nedun ndre sungoh-pe-homou pe hohntor wo Jabok hala hodoh. 23 Inum ti pe iy iyeu ile ndre hodoh pe ihtakalan su ndramat tadan hokuni sane tadan hala hodoh, 24 pe iy ke ndre homou iyeu imin hodoh.

Eri pe orngon homou ihir ile ndrongon iy pe horu hernehmundre kopwi uu pe lok ndre iltanga-ar. 25 Ndramat kurti indre-et ihpa ndre iy kindranon kindroruson Yakop pwi, ile pe iy irson hangka-an ile pursuwyon Yakop, pe pursuwyon itluhu. 26 Ndramat kurti ipe ihpa, “Ohron lumwem todo, pe yu ku-eu. Lok ilelih meseren.”

Yakop ihpa, “Eri ou apatihteh yu ki-in munen oh, pwi ti yu we kundrehron lumwe ki-eu odo tadam pwi.”

27 Ndramat kurti ihndremte ihpa, “Ou rangam ti si?”

Pe Yakop ihpah, “Yu rongo Yakop.”

28 Ndramat kurti ihpa, “Rangam ti we Yakop pwi yi. Ou opkwe ile ndroda Lapan pe ndramat kah, odoke ou ewen ndre pule-en ea, ile pe rangam eri ka we kile Israel.”

29 Yakop ihpa, “Apahran rangam ti kile todo yi!”

Odoke ndramat kuti ihpa, “Ou apa ohtunom rongo ti kile sa?” Inum ti pe iy ipatihteh Yakop.

30 Inum pe Yakop ihpa, “Yu undroni Lapan ile modo, odoke yu undrimat pwi.” Ile pe iy irson rangan lok ile Peniel.

31 Mundroi ise ndre eleng pe Yakop illa iyeu odo Peniel. Iy inelila inehndrum odosa pursuwyon ti indretuluhu tih. 32 Idu pihe uu pe isto mahkele eri su yayan Israel eri hasana-an pursuwyon sane ka-an ti pwi, odosa Lapan idahat hangka-an idu pursuwyon Yakop pe itluhu tih.