1 Pe Yesus ipe ile ta su ihpa, “Yu upwe ndre ndrokene kile ta oduu. Sa se lau ndre ka hentahrung Yu hodo keti we hendrimat mapwi, pe su we hendre‑et puko‑on mandra‑an tan kapman ta Lapan, kidu kapman ta Lapan kihir tih.”

2 Rang on inum oh ti pe Yesus ikuni Pita, Jems pe Jon, pe su ho‑us Iy hala puliy sih elwe‑en. Sa homou lau indru‑us su pwi. Su hapa hendre‑et ti pe Yesus mundren inna handrai yi. 3 Kolson ti inna peren peren lakopwi. Homou lau odo lokpoi kindranon kindresingi kolau kinna peren kihpa ndre erti pwi. 4 Inum pe su heltuwe Elaijah horu Moses herihir yi, pe herenesohou ndroda Yesus.

5 Pita inlou ile ta Yesus ihpa, “Tisa todo. Huyen lakopwi odo tidu tito ketih. Yu pe Jems pe Jon we otumon pandrol tulpwing. Sim Tadam, sim tam Moses pe sim tan Elaijah.” 6 Pita ipe kuti porah kopwi, odosa su ti honoh ile mo‑on.

7 Inum pe kohut hene ihir pe kanunuwen isorohe su. Pe pohon Lapan ihir odo lon kohut kuti pe ipe ihpa, “Iy kuti Nedu. Yu wasu‑u Iy lakopwi. Oduu atahrung nolou Tadan.”

8 Su hendre‑et ile sehir pe sehir, pe mada’ su ihpilpil kopwi ti pe Yesus Iy kopwi idu. Elaijah horu Moses ti herndrela hepe yi.

9 Su ka hana‑au hasa yi ndre pwoi, pe Yesus ipe ile ta su ihpa, “Sane ndre oduu etndre‑et mahkele, eri etninen kile ta homou lau kolwii, kenon ndre Nedun Ndramat ti kimet oh pe ndre kindretalang yi.”

10 Su hendrininen ile ta homou pwi, odoke su ke ndre su ti hampa ihpa, “Talang odo mat ti homosa?”

11 Pe su hehndremte Yesus, “Ihpa kehe pe su tisa odo Lo ti hapa Elaijah ti we kihir ki‑in munen oh, kinum pe Kristus we kihir?”

12 Yesus ipe ihpa, “Nolou kirti ndre ndrokene. Elaijah ti we kise ki‑in munen pe kisahnan sane ndre sulo‑on he‑en kile huyen. Odoke ihpa kehe pe nolou iyin Buk ta Lapan ti ipe Nedun Ndramat ti we kilnget ngendre‑en sulo‑on pe sa we mbore’ sa tahrung Iy tih? 13 Yu kah kunen kile ta oduu. Elaijah ti insa kah. Odoke sa lau hepupu‑uh punou mo‑on ile pule‑en, ihpa ndre nolou iyin Buk ta Lapan ipe we kihpa ndre eriy tih.”

14 Yesus, Pita, Jems pe Jon kah hehir yi ndre ndroda su disaipel huren tih. Pe su heltuwe sa lau sulo‑on lakopwi hodo ndroda su disaipel se yi tih. Pe su tisa odo Lo ti henehkike‑ei ndroda su disaipel. 15 Sa ndre sulo‑on hendroni Yesus ti pe hehretek ile mo‑on. Sa hohtot hala pe hopwo-es Iy.

16 Yesus ihndremte ihpa, “Oduu edenehkike‑ei ile sa?”

17 Orngon homou idu lenga’ su lau ti inlou ihpa, “Tisa, yu usetudou nedu kamal ise hun Ou. Sinel imin pule‑en pe inahnan iy isenolou pwi. 18 Sinel ti inak ile pule‑en pe inahnan iy intaketi illa pwoi, pe lehen inehndrepit, pe mbruse‑en pohon ihir, pe mundren ndre homou ineselke‑e. Yu uhndremte su disaipel Tadam upwe su hahnan iy kile huyen, odoke su handranon pwi.”

19 Yesus ipe ile ta su ihpah, “Oduu lau kiti taduu bilip pwi. Yu we kumwin ndrodan oduu elwe‑en kihpa ndre kehe yi? Yu we kukun pede‑en ta oduu pat hesiki yi? Atakuni anah ti kise!” 20 Su lumwe’ su ise lumwen anah kuti ile hu Yesus.

Sinel imin pule‑en anah kuti indroni Yesus ti pe ihnan anah ti iselke‑e, pe anah ti ideketi ile poi pe ingkilkil. Anah ti mbruse‑en le. 21 Ile pe Yesus ihndremte taman anah kuti ihpa, “Iy impo ihpa kuti kah rang heski?”

Taman anah ti ihpa, “Iy mapwi lehyen ti impo ihpa ke kutih. 22 Hangka‑an ndre inahnan iy ti ipe kinahnan iy kimet, ile pe impiyen iy ile lo yih pe lo wo. O Yesus, uh Ou owonon, eri akarundrum pe ehnuwii oru nedu.”

23 Yesus ipe ihpah, “Yu uwonon, odosa Lapan kenon kipu sane ndre sulo‑on odo henuwii si ndramat ndre tadan bilip tih. Odoke ou ti opo bilip ndre pwi?”

24 Taman anah kuti isomwi Yesus sowin kopwi ihpah, “Yu upu bilip, odoke bilip todo ti mandra‑an pwi. Ehnuwii yu, kile pe bilip todo kile mandra‑an.”

25 Yesus iltuwei ihpa ndre sa lau ka henehndur hala koson, ile pe Iy inlou puko‑on ile ta sinel ti ihpa, “Singlen walul pe pohpiw, yu upwe ile tadam, asa moleu pe owou odo mundren anah kirtih, pe ala yi kolwii!”

26 Sinel ti idehel ile mo‑on, pe irson anah kuti ile poi, inum pe indreh iyeu. Anah kurti hepe mehleu pwi iyin poi, pe sa lau ndre sulo‑on hapa yi iy indrimat. 27 Odoke Yesus lumwen ile lumwen pe isori iy imin eleng. Anah ti moren pe idu eleng.

28 Idu ndre omur, Yesus pe su lewen kopwi hodo lon um ti pe su hehndremte Yesus ihpa, “Ihpa kehe pe odu etndranon etndre‑as sinel kuti pwi tih?”

29 Pe Yesus ipe ihpa, “Tapa surok kopwi kenon ki‑es su iy ihpa ndre kurtih. Handrai pe handrai yi ti indranon pwi.”

30 Yesus pe su disaipel ha‑au odo lok ertih. Su ha‑au ho‑us Galili ea. Yesus mboren sa lau hehtuno sa Iy imin kehe tih, 31 odosa Iy mapwi intatuhne su disaipel Tadan tih. Iy ipe ile ta su ihpah, “Sa we heduwe Nedun Ndramat ti we kile lumwe’ sa lau. Sa lau we hapwi Iy kimet. Pe rang tul kinum ti pe Iy we kitlang yi.”

32 Su hendretakuni lon nolwo‑on ti pwi, odoke su horu‑ur pe hendrehndremte Yesus pwi.

33 Su hehir Kaperneam pe hala lon um. Inum pe Yesus ihndremte ihpa, “Oduu edenehkike‑ei sa mahkele odo sal tih? 34 Odoke su kolo’ su ke ndruwot. Su hendrepahran pwi odosa, su hodo sal ti pe henehkike‑ei ile si we madan kiso pule‑e’ su tih.

35 Yesus imin pwoi oh pe iyuwen su, pe ipe ile ta su ihpah, “Iy si lau ndre ipe ki‑in munen eri kiduwe iy kise pahndra’ sa ndre sulo‑on, pe kiduwe iy kile ndramtan marai ta sa ndre posingat.”

36 Iy ikuni anah homou netlehyen pe iduwe iy idu munen. Inum pe Iy isokohan anah kuti pe ipe ile ta su disaipel ihpah, 37 “Si lau ndre kidawonon Yu pe kipu huyen kile ta homou kom ihpa ndre homou kudu, eri impo huyen ile Todo. Pe si ndre kipu huyen kile Todo, eri impo huyen ile tan Iy si ndre ihtakalan Yu use tih.”

38 Jon ipe ile ta Yesus ihpa, “Tisa, odu etndroni orngon homou ina‑as sinel ile rangam, pe odu atpa iy kipu kahrii, odosa iy ti isemin ndrodan tidu ti pwi.”

39 Yesus ipe ihpa, “Oduu etsinip anan kolwii. Si ndramat ndre impo mirakulo ile rongo, eri we kindripo nolou mo‑on kile puli‑i pwi. 40 Odosa iy lau ndre kisempo mo‑on kile ta tidu pwi, eri iy ta tidu. 41 Uh homou lau kihlingi ou kile hepe kangkahan wo odosa ou ti tan Kristus, eri Yu kupwe ndre ndrokone kile taduu, iy lau erti we kikuni ndre mbrunen.”

42 Yesus ipe lakopwi yi ihpah, “Iy si lau ndre kihnan pe homou nenkom kideketi odo bilip ile Todo, eri kimpahar. Kile huyen ti lehpe iy kindrahnan homou kom ti mapwi eri sa lau hehndrusi pat mandra‑an kile won pe hepiyen iy kile lon ndras. Odosa, pede‑en odo iy kihnan homou nenkom kideketi odo bilip ile Todo ti mandra‑an lakopwi. 43-44 Uh hakai lumwem kihnan ou opo to‑ir, eri emndrelei pe epiyen ke‑eu. Kile huyen ti ou lumwem ke hakai pe ala heven. Kihne ou lumwem ndre rukei pe sa hepiyen ou ala hel. Yih odo hel ti isemat pwi.* Sa sape ndramat se ti hapa nolou sehir ti iyin lain kuti yi, ihpah, “Odo lok eriy, eri ul ndre hana‑an sengi’ su ti hesenum pwi. Pe yih ndre intune‑en su ti isemat pwi.” 45-46 Pe uh ndrikem hakai ti kihnan ou opo to‑ir, eri ou emndrelei pe epiyen ke‑eu. Ou ndrikem ke hakai pe ala heven ti huyen. Kihne ou ndrikem rukei pe sa hepiyen ou ala hel.† Endre-et toksave odo 9.43-44. Endre-et lain 48. 47 Pe uh sih madam ti kirwi ou pe ou opo to‑ir, eri etluhtii pe epiyen ke‑eu. Kile huyen ti ou madam ke sih pe emin lon kapman to Lapan. Kihne ou madam ndre ruweh pe sa hepiyen ou ala hel. 48 Odo hel, eri ul ndre heneni sengi’ su ti hesenum pwi, pe yih ndre intune‑en su ti isemat pwi.

49 “Sa hentawe sol illa mundren song pe yohou odo ofa ndre sulo‑on, kile pe ofa ti kile huyen odo madan Lapan. Yih ti ihpa ke eriy. Yih ti we kihir ta sa lau ndre sulo‑on.

50 “Sol ti huyen, odoke uh kanyan ti kinum, eri ou we ahnan kanyan kihir yi ti kihpa kehe? Sol ti intawe kanyan song illa huyen, ile pe oduu yi ti edihir kihpa ndre sol huyen, pe etawe penuw kimin lenga’ oduu homou homou.”‡ Nolou Grik indrepahran lain 49 pe 50 ti inna huyen pwi.