ଯାକୁବଙ୍କ ପତ୍ର
ଜାକୁବ ରା଼ଚାମାନି ଆ଼କୁ
ମୂଲୁ ହା଼ଡା
ଈ ଜାକୁବ ପତିତି ଜାକୁବ ଇନାସି ରା଼ଚାମାଚେସି । ଏ଼ୱାସି ଜୀସୁ କ୍ରୀସ୍ତ ତାୟି ଆ଼ହାମାଣ୍ମ୍ବିନେସି, ଏ଼ମ୍ବାଆସିକି କୁଲମିତି ସା଼ଲୱି କିନାସି ଅ଼ଡ଼େ ଜିରୁସାଲମତା ବେ଼ରଣି କିନାସି ମାଚେସି କାମା ୧୫:୧୩ । ପା଼ୱୁଲ ଗାଲା ୨:୯ ଜାକୁବଇଁ କୁଲମିତି “ତୂଡ଼ିୟା ମୁଣ୍ତା” ଇଞ୍ଜାମାନେସି । ଜୀସୁ କ୍ରୀସ୍ତ ଜାର୍ନାଆ଼ତି ୫୦ ବାର୍ସା ଡା଼ୟୁ ଈ ଜାକୁବ ପତି ରା଼ସ୍କି ଆ଼ହାମାଚେ ଇଞ୍ଜିଁ ବୁଦିଗାଟାରି ଏଲେ ଇଞ୍ଜିମାନେରି । ଜାକୁବ ଜିରୁସାଲମତି କୁଲମି ସା଼ଲୱି କିନାସି ମାଚିବେ଼ଲାତା ଈ ପତିଇଁ ରା଼ଚାମାଚେସି ।
ଜାକୁବ ତାନି ପତିତା “ଇତାଲା ଆତାଲା ଦେ଼ସାଣା ରାଞ୍ଜାଣା ବିଚାଣା ଆ଼ହାମାନି ବା଼ର ଗଟା କୂଲୁ ଲ଼କୁ” କାତା ରା଼ଚାମାନେସି ୧:୧ । ଜାକୁବ ୱେହ୍ନି କାତା ବାରେ କ୍ରୀସ୍ତାନା ଲ଼କୁକି ଲ଼ଡ଼ାମାନେ ସାମା “ବା଼ର ଗଟା କୂଲୁ ଲ଼କୁ” ଇଚିସାରେ ଜୀହୁଦି କ୍ରୀସ୍ତାନା ଲ଼କୁ । ଏ଼ନାଆଁତାକି ଇଚିହିଁ ଈ ପତି ପ଼ଡ଼ୱିଆ଼ନି ବାରେ ଲ଼କୁତାକି ହା଼ରେକା କାତା ଏପ୍ହାଲି ତାକି ରା଼ସ୍କି ଆ଼ହାମାନେ । ଜାକୁବ ନାମୁ ଅ଼ଡ଼େ କାମାତି କାତା ୱେସାମାନେସି । କାମାତା ସାତା ନାମୁ ତ଼ଞ୍ଜାଆ଼ନେ ୨:୧୭ । ଏ଼ୱାସି ବାତ୍କୁ ଗାଟି ଲ଼କୁତି ପାର୍ଡ଼ା ବାଚି କିନାଣି ୨:୧-୪ ଅ଼ଡ଼େ ମା଼ର ଏ଼ନାଆଁ ଜ଼ଲିନାୟି ଜାତ୍ନୁ ତଲେ ଜ଼ଲାଲି ୱେସାମାନେସି ୩:୧-୧୨
ପତିତା ମାନାୟି
୧. ଜାକୁବ ତାନି ପତି ପ଼ଡ଼ୱି ଆ଼ନାରାଇଁ ଜହରା କିନାୟି । ୧:୧
୨. କ୍ରୀସ୍ତାନା ଲ଼କୁଣି କସ୍ତ ବେ଼ଲାତା ସୂସ୍ତି ତଲେ ମାଞ୍ଜାଲି ୱେହ୍ନାୟି । ୧:୨-୨୭
୩. କାମା ତଲେ ନାମୁତି ତ଼ହ୍ନାୟି ମାନେ । ୨:୧-୨୬
୪. ଜ଼ଲିନି ବ଼ଲୁୟାଁତି ବା଼ଡ଼୍ୟୁ । ୩:୧-୧୨
୫. ମାହାପୂରୁତି ବୁଦି ଦାର୍ତିତି ବୁଦି କିହାଁ ହା଼ରେକା ପାର୍ଡ଼ା ମାନେ । ୩:୧୩–୪:୧୦
୬. ବଡପଣ ଆ଼ନି କାତା । ୪:୧୧–୫:୬
୭. ଜାକୁବ ରା଼ନି ବେ଼ଲାତା ନେହେଁତାକି ଜା଼ପିନି କାତା ରା଼ଚିନାୟି । ୫:୭-୨୦
୧
୧ ✡ ୧:୧ ମାତି ୧୩:୫୫; ମାର୍କ ୬:୩; କାମା ୧୫:୧୩; ଗାଲା ୧:୧୯ନା଼ନୁ ଜାକୁବ, ମାହାପୂରୁ ଅ଼ଡ଼େ ପ୍ରବୁ ଜୀସୁ କ୍ରୀସ୍ତତି ହ଼ଲେଏସି, ଦାର୍ତିତା ଇତାଲା ଆତାଲା ଆ଼ହାମାନି ମାହାପୂରୁ ଲ଼କୁଇଁ ଜହରା ।
ନାମୁତି ତାୟିପାରି କିନାୟି
୨ ଏ଼ ନା଼ ତାୟିୟାଁ ଅ଼ଡ଼େ ତାଙ୍ଗିସ୍କା, ମୀରୁ ଏଚିବେ଼ଲା ତାୟିପାରି କିନି ତା଼ଣା ତାୟିପାରି କିୱିଆ଼ଦେରି, ଏଚିବେ଼ଲା ଏ଼ଦି ହା଼ରେକା ରା଼ହାଁତି କାତା ଇଞ୍ଜିଁ ଅଣ୍ପାଦୁ; ୩ ତାୟିପାରି କିନାଣି ଜୀଣା ଆ଼ନି ନାମୁ ଏ଼ଦି ଅ଼ର୍ହାଲି ହୀୟାନେ, ଈଦାଆଁ ପୁଞ୍ଜାମାଞ୍ଜେରି । ୪ ଅ଼ଡ଼େ, ମୀରୁ ଏ଼ନିକିଁ ଏ଼ନି ଗୂଣୁତା ଊଣା ଆ଼ଆନା ନେହିଁ ତୀରି ଅ଼ଡ଼େ ସୁଦୁ ଗାଟାତେରି ଆ଼ଦୁ, ଏ଼ଦାଆଁତାକି ଅ଼ର୍ହିନାୟି ହା଼ରେପୂରେ କାମା କିନେ ।
୫ ସାମା ମୀ ବିତ୍ରା ଆମ୍ବାଆରାକି ବୁଦି ଊଣା ମାଚିସାରି, ଆମିନି ମାହାପୂରୁ ଦ଼ହ ଆହ୍ଆନା ବାରେତାକି ହା଼ରେପୂରେ କେୟୁ ଦେଚାନା ଦା଼ନା କିନେସି, ଏ଼ୱାଣି ତା଼ଣା ପ୍ରା଼ତାନା କିପାସି, ଏମ୍ବାଟିଏ ଏ଼ୱାଣାକି ହୀପ୍କିଆ଼ନେ । ୬ ସାମା ଏ଼ୱାସି ଇଚାଣି ଆନାମାନା ଆ଼ଆନା ନାମୁତଲେ ପ୍ରା଼ତାନା କିପାସି, ଇଚିହିଁ ଆମ୍ବାଆସି ଆନାମାନା ଆ଼ନେସି, ଏ଼ୱାସି ଗା଼ଲି ତଲେ ଇତାଲା ଆତାଲା ଆ଼ହିମାନି ସାମ୍ଦୁରିତି ତୀରି ଆ଼ଆଗାଟି ଏ଼ୟୁ ଉଣ୍ତା ଲେହେଁତାସି । ୭ ଏଲେତି ଲ଼କୁ ପ୍ରବୁ ତା଼ଣାଟି ଏ଼ନାଆଁ ବେଟାଆ଼ଇଁ ଇଞ୍ଜିଁ ଆ଼ସା କିଆପେସି; ୮ ଏ଼ୱାସି ରୀ ମ଼ନ ଗାଟାସି, ଇଞ୍ଜାଁ ତାନି ବାରେ କାମାତା ତୀରି ଆ଼ଆଗାଟାସି ।
ବାତ୍କୁ ଗାଟାସି ଅ଼ଡ଼େ ବାତ୍କୁ ହିଲାଆଗାଟାସି
୯ ବାତ୍କୁ ହିଲାଆଗାଟି ତାୟି ତାନି କାଜାପା଼ଣା ତାକି ରା଼ହାଁ କିପାସି, ୧୦ ବାତ୍କୁ ଗାଟାସି ତାନି ଊଣା ଆ଼ହିମାନାଣି ତାକି ବଡପଣ କିପେସି, ଏ଼ନାଆଁତାକି ଇଚିହିଁ ବାତ୍କୁ ଗାଟାସି ଜା଼ଡ଼ାତି ପୂୟୁବଣ୍ତା ଲେହେଁ ଡୁଲା ହାନେସି । ୧୧ ଏ଼ନିକିଁ ୱେ଼ଡ଼ା ଲା଼ଇ ହ଼ତାସାରେ ଜା଼ଡ଼ା ଏ଼ନିକିଁ ୱା଼ୟାହାନେ ଅ଼ଡ଼େ ଏ଼ଦାନି ପୂଙ୍ଗା ଡୁଲିନୁ ଇଞ୍ଜାଁ ତାନି ଅ଼ଜୁତି ୱା଼ଣା ମେଣ୍ଙ୍ଗାହାନେ, ଏଲେକିହିଁଏ ବାତ୍କୁ ଗାଟାସି ଜିକେଏ ତାନି ବାରେ କାମାତା ୱା଼ଡ଼ିନେସି ।
ତାୟିପାରି ଅ଼ଡ଼େ ଜୂପ୍କା ତ଼ହ୍ନାୟି
୧୨ ଆମିନି ଗାଟାସି ତାୟିପାରି କିନାଣି ଅ଼ର୍ହିନେସି ଏ଼ୱାଣାକି ନେହେଁ, ଇଚିହିଁ ମାହାପୂରୁ ତା଼ନୁ ଜୀୱୁ ନ଼ନି ଲ଼କୁଣି ଆମିନି ଜୀୱୁଗାଟି ଟ଼ପେରି ହୀହାଲି ଆ଼ଞ୍ଜାମାନେସି, ତାୟିପାରି କିତାଣି ଜୀଣାଆ଼ତି ଜେ଼ଚ ଏ଼ ଲ଼କୁ ଏ଼ ଆ଼ଞ୍ଜାମାନି ଟ଼ପେରି ବେଟା ଆ଼ନେସି । ୧୩ ଆମ୍ବାଆସି ତାୟିପାରି କିୱି ଆ଼ତିସାରେ, “ନା଼ ଈ ତାୟିପାରି କିୱି ଆ଼ନାୟି ମାହାପୂରୁ ତା଼ଣାଟି ଆ଼ହିମାନେ” ଇଞ୍ଜିହିଁ ଇନାଆପେସି, ଇଚିହିଁ ମାହାପୂରୁ ଲାଗେଏତି ପା଼ନ୍ଦାଟି ତାୟିପାରି କିୱି ଆ଼ଅସି, ଅ଼ଡ଼େ ଏ଼ୱାସି ତା଼ନୁଏ ଆମ୍ବାଆରାଇଁ ତାୟିପାରି କିଅସି । ୧୪ ସାମା ମାଣ୍ସି ତାନି ଲାଗେଏତି କାମା ତଲେ ଜୂପ୍କା ଅ଼ଡ଼େ ନା଼ଡ଼ିକିୱି ଆ଼ହାନା ତାୟିପାରି କିୱିଆ଼ନେସି; ୧୫ ଅ଼ଡ଼େ ଡା଼ୟୁ ଲାଗେଏତି କାମା ପୂରାମା଼ସା ଆ଼ହାନା ପା଼ପୁତି ଜାର୍ନି କିନେ, ଇଞ୍ଜାଁ ପା଼ପୁ ଗାଡି ପାଡାଆ଼ହାନା ହା଼କିତି ଜାର୍ନି କିନେ ।
୧୬ ଏ଼ ନା଼ ଜୀୱୁତି ତାୟିୟାଁ ଅ଼ଡ଼େ ତାଙ୍ଗିସ୍କା ମୀରୁ ନା଼ଡ଼ି ଆ଼ଆଦୁ । ୧୭ ବାରେ ନେହିଁ ଦା଼ନା ଅ଼ଡ଼େ ବାରେ ତୀରିତି ବ଼ର ଲାକଟି; ଇଚିହିଁ ଉଜେଡ଼ି ଗା଼ଡ଼ିକିତି ଆ଼ବା ତା଼ଣାଟି ୱା଼ନେ, ଆମ୍ବାଆରି ତା଼ଣା ଏ଼ନି ବାଦ୍ଲି ଆ଼ନାୟି କି ଇଚାୟିୱା ସା଼ୟିଁ କିହାନା ଆନ୍ଦେରି ଆ଼ନାୟି ହିଲେଏ । ୧୮ ମା଼ର ଏ଼ନିକିଁ ତାନି ଗା଼ଡ଼ି ଆ଼ତି ତା଼ଣାଟି ରଲେଏତି ର଼ ମୂଲୁତି ପା଼ଡ଼େୟି ଲେହେଁ ଆ଼ନାୟି, ଏ଼ଦାଆଁତାକି ଏ଼ୱାସି ତାନି ଅଣ୍ପୁ ତଲେ ସାତା ବ଼ଲୁ ତଲେ ମାଙ୍ଗେ ଗା଼ଡ଼ି କିୟାତେସି ।
ୱେନାୟି ଅ଼ଡ଼େ କାମା କିନାୟି
୧୯ ଏ଼ ନା଼ ଜୀୱୁତି ତାୟିୟାଁ ଅ଼ଡ଼େ ତାଙ୍ଗିସ୍କା, ମୀରୁ ଈଦାଆଁ ପୁଞ୍ଜାମାଞ୍ଜେରି, ମୀରୁ ବାରେତେରି ୱେଞ୍ଜାଲି ଜାଗ୍ରାତା ଆ଼ଦୁ, ଇଞ୍ଜାଁ ୱେସାଲି ଦାଗା ଆ଼ଆଦୁ ଅ଼ଡ଼େ ଦେବୁଣିଏ କ଼ପା ଆ଼ଆଦୁ, ୨୦ ଇଚିହିଁ ମାଣ୍ସିତି କ଼ପା ମାହାପୂରୁତି ନ଼କିତା ଦାର୍ମୁ କିହାଲି ଆ଼ଡେଏ । ୨୧ ଏ଼ଦାଆଁତାକି, ମୀରୁ ବାରେ ପ଼ଲ୍ଆ ଗାଟାଣି ଅ଼ଡ଼େ ବାରେ ଲାଗେଏତି ପିସାତୁହ୍ଦୁ, ଆମିନି ମାହାପୂରୁ ହିୟାତି ବ଼ଲୁ, ମୀ ଜୀୱୁତି ଗେଲ୍ପାଲିତାକି ଆ଼ଡିନେ, ଏ଼ଦାଆଁ ସୁଦୁଗାଟି ଅଣ୍ପୁ ତଲେ ଆହ୍ଦୁ ।
୨୨ ସାମା ମୀରୁ ଏ଼ୱାଣି ବ଼ଲୁ ୱେନାତେରି ଆ଼ହାଁ ଜାହାରାଇଁ ନା଼ଡ଼ି କିହାକଡାଆନା, ବ଼ଲୁତି କାମା କିନାତେରି ଆ଼ଦୁ । ୨୩ ଇଚିହିଁ ଆମିନିଗାଟାସି ବ଼ଲୁତି କାମା କିନି ଲ଼କୁ ଆ଼ଆନା ୱାର୍ଇ ୱେନି ଲ଼କୁ ଆ଼ନେସି, ଆତିହିଁ ଏ଼ୱାସି ଦାର୍ପେଣିତା ତା଼ନୁଏ ତାନି ମୂମ୍ବୁ ସିନିକିହା କଡିମାନି ମାଣ୍ସି ଲେହେଁତାସି, ୨୪ ଏଚେ଼ତା ଏ଼ୱାସି ତାଙ୍ଗେ ସିନିକିତି ଜେ଼ଚ ହାଜାନା, ଏ଼ୱାସି ଏମ୍ବାଟି ହ଼ଚା ହାଚି ଡା଼ୟୁ ଏ଼ନିଲେହେଁତି ମାଣ୍ସି ଦେବୁଣିଏ ବା଼ଣାଆ଼ନେସି । ୨୫ ସାମା ଆମ୍ବାଆସି ତୀର୍ପୁ ଇଚିହିଁ ଗେଲ୍ପାଲି ଆ଼ଡିନି ନେହିଁ ମେ଼ରାତି ସିନିକିହାନା ମେ଼ରାତି କାମା କିନେସି, ଅ଼ଡ଼େ ଆଜିତାକି ୱେନି ଲ଼କୁ ଆ଼ଆନା କାମାକିନାସି ଆ଼ନେସି, ଏ଼ୱାସି ତାନି କାମାତା ନେହାଁସି ।
୨୬ ଇଚିହିଁ ଆମ୍ବାଆସି ଜାହାରାଇଁ ତୀରି ଗାଟାତେଏଁ ଇଞ୍ଜିଁ ଅଣ୍ପା କଡିନେସି, ଇଞ୍ଜାଁ ତାନି ୱେନ୍ଦରିତି ଲକ୍ଆନା ତା଼ନୁ ତାନି ହିୟାଁତି ନା଼ଡ଼ି କିନେସି, ଇଚିହିଁ ତାନି ଦାର୍ମୁକାମା କିନାୟି ଉଜେଏତାୟି । ୨୭ ତାଲି ତାଞ୍ଜି ହିଲାଆ କକାରି ପ଼ଦାଁଣି ଅ଼ଡ଼େ ରା଼ଣ୍ତେଣି ଇୟାସିକାଣି ତାମି ଦୁକୁ କା଼କୁଲି ବେ଼ଲାତା ସା଼ୟେମି କିନାୟି ଅ଼ଡ଼େ ଦାର୍ତିତା ମାନି ବାରେ ଲାଗେଏତି କାମାଟି ଗେଲ୍ପା କଡିନାୟି, ଈଦି ମା଼ ମାହାପୂରୁ ଅ଼ଡ଼େ ଆ଼ବା ନ଼କିତା ନେହାୟି ଅ଼ଡ଼େ ସୁଦୁ ଦାର୍ମୁତି କାମା ।
✡୧:୧ ୧:୧ ମାତି ୧୩:୫୫; ମାର୍କ ୬:୩; କାମା ୧୫:୧୩; ଗାଲା ୧:୧୯