3
La Jon 'e iiria ta'a 'agila sasari agau fana nigilana nga Kraes
(Mat 3:1-12; Mak 1:1-8; Jon 1:19-28)
1 Ma alata lo'oo, 'e nigi no'o ana akwale'e farisi ma nima ai na'a la Taebirias 'e ba'ita fafia nga fanua ba'ita 'i Rom, ma la Pontus Paelat ka ba'ita fafia gule'e lefu 'i Judea, ma la Herod wane ba'ita fafia gule'e lefu 'i Galili, ma la Filip nga wane ni futanga aana 'e aga suria gule'e lefu 'i Iturea ma 'i Trakonaetis, ma la Lisanias ka aga suria gule'e lefu 'i Abilin. 2 Alata lo'oo la'u mola, la Anas ma la Kaeafas gaa'a rua alafa ni suuabunga na ta'a 'i Jiu na fanua 'i Jerusalem. Ma alata lo'oo, God 'e alafuu te'ala Jon nga wela ala Sekaraea, alata ngaia 'e to'oru no'o 'i 'ubulana gule'e lefu langalanga. 3 Ma la Jon ka leka na gule'e lefu ri'itana ka'o 'i Jodan. Ma ngaia ka fata 'ilo'oo fana ta'a, “Moru abulo mai fa'asia nga rianga amooru, ma moru ka naruabu, fana God 'ani 'olafanataa na rianga amooru.” 4 Ngaia 'e 'ilaka'u la Aesea nga profet 'e giria mai na'o maka 'ilo'oo, ✡ Aesea 40:3-5
“Te'e wane ngaia 'e o'omae 'i 'ubulana gule'e lefu langalanga maka 'ilo'oo,
‘Nga Alafa ngaia te'e nigi mai!
Ta'a mooru fa'aodoa nga tala fana!
5 Ma mooru ka fa'afonua nga lefu ne'e wanawana'a
ma moru ka ofotaa nga tale'e busu ma tale'e iile.
Ma moru ka fa'aodoa nga tala ne'e 'e'eola
ma mooru ka fa'adada nga tala ne'e ngangala'a.* Nga verse lo'oori fa'aladamia nga ta'a na gila 'ame odo, 'e to'omia fana 'agila bulota'i mai fa'asia rianga aaga te'ana God.
6 Ma ta'a te'efou tagila agasia na'a God 'ani fa'amooriga.’ ”
7 Ma ta'a 'e aula gila leka mai te'ala Jon fana 'ani naruabu aga. Ma la Jon ka fata 'ilo'oo fana tani ta'a ngaa'i, “Mooru 'ilaka'u no'o ru'uru'ua na nga waa. Mooru moru madafia iiria naruabunga te'e fa'amoori 'amooru fa'asia kwa'ikwa'inga na God, tafe'ua ma moru 'ame abulo mola fa'asia rianga amooru? Suria manatanga mooru 'e kuta, ma moru sia talafia la'u kwa'ikwa'inga na God. 8 Moru agea mola ni 'ola ne'e faate'enia moru abulo mai fa'asia nga abulongaa 'ame le'a amooru. Ma moru sia manata 'ilo'oo mola 'i 'ubulana manata lamooru, ‘'Ameeru nga ta'a meru futa na nga fufutanga ala Ebraham lo'oo. 'Ato fana kwa'ikwa'inga na God 'ani nigi ameeru.’ Mai nau ku kwairii odo no'o ai famooru, ngaia 'e wada'u mola fana God 'ani ngaria ta me'e fou na ni me'e fou lo'oo, maka launge'enia 'ania fufutanga ala Ebraham. 9 Ma alata lo'oo, God ngaia 'e sasari agau no'o na kwa'ikwa'inga, 'ilaka'u nga wane 'e dau na naifi, maka sasari agau fana tofulana 'ai lo'oo. Ma ni 'ai ne'e 'ame fungu 'ania ta lode ai ne'e le'a, te'e tofuga, maka to'osiga 'i 'ubulana eele.”
10 Sui ma nga ta'a no'ona gila orisia la Jon ma gila fata 'ilo'oo, “'Olataa na'a tameru agea 'ani faate'enia na'a 'imeeru meru abulo mai fa'aisa rianga ameru?”
11 Mai ngaia ka lamadu'aga maka 'ilo'oo, “Lauta te'efuta wane ngaia to'o na rua me'e ruu, ngaia 'ani kwatea nga ruana me'e ruu no'ona aana fana nga wane ne'e 'ame to'o na ta me'e ruu. Ma lauta te'efuta wane ngaia 'e to'o na fangalaa, ngaia 'ani dalo'ia.”
12 Ma tani wane na gila ngaria bata fana takisi, gila nigi la'u mai fana naruabunga, ma gila ka orisia ma gila ka 'ilo'oo, “Wane kwaifa'ananaunga, 'olataa na'a tameru agea 'ani faate'enia na'a 'imeeru meru abulo mai fa'aisa rianga 'ameeru?”
13 Ma la Jon ka fata 'ilo'oo la'u, “Moru ogua mola bata ne'e to'omia bata na'a tagi 'e iiria. Mooru sia soea mola bata ne'e riufia bata lo'oori.”
14 Ma tani wane ni fununga gila ka orisia la'u 'ilo'oo, “Ma 'ameeru lo'oo, 'olataa na'a tameru agea 'ani faate'enia na'a 'imeeru meru abulo mai fa'asia rianga ameeru?”
Ma ngaia ka fata 'ilo'oo faga, “Mooru sia ulange'enia ta wane fana kwatelana bata famooru. Ma mooru sia fa'ama'ua mola ta'a fana ngarilana bata aaga. Ma mooru ka aile'a mola fe'enia nga bata na gila foria mooru 'ania.”
15 Ta'a gila kwaimamani fana nigilana mai nga Kraes, nga wane na God 'e firia 'ani fa'amooria nga ta'a aana, sui ma gila ka madafia 'ilo'oo, “Bala la Jon no'o na Kraes.” 16 Tafe'ua, ma la Jon 'e alafuu 'ilo'oo faga, “Nau ku naruabu amooru mola 'ania ka'o, tafe'ua ma wane na te'e nigi mai ngaia 'e ba'ita riufi nau. Mai nau ku 'ame to'omia 'aku rubea nga me'e butu 'i 'a'aena. Mai ngaia te'e naruabu amooru 'ania Anoe 'ola Abu ma 'ania eele.† Nga taunga'inga na nga wane ni taunga'inga fana rubelana me'e butu fa'asia 'a'aena nga wane ba'ita aana. 17 Mai ngaia 'e sasari agau no'o fana to'ole'enilana ta'a te'efou, 'ilaka'u nga wane 'e 'efoa nga 'u'ui 'ola 'e le'a fa'asia nga 'e'efona. Ma ka ogua ni 'u'ui 'ola le'a 'i 'ubulana nga 'ifi ni goni'olanga, maka do'ofia no'o nga 'e'efona 'ubulana nga eele ne'e sia mae la'u.”
18 Ma la Jon ka kwairii suria nga Kwairiinga Le'a lo'oo faga 'ania fatanga 'e aula, ma ngaia ka fata faga fana 'agila lo'o suria nga fatalana God. 19 Ma alata lo'oori la'u mola, la Jon 'e fata tegela iiki fala Herod, nga wane ne'e Kiingi fafia gule'e lefu lo'oo, tofuna la Herod ngaia 'e feea ni Herodias, nga 'afe na 'asina la Filip, ma ngaia 'e agea ni 'ola 'e ria 'e aula la'u mola. 20 Ma nga 'ola ne'e 'e ria 'e iiki no'o na la Herod 'e agea na'a, ngaia 'e gemasia la Jon, maka arua 'ubulana lokafu.
Nga naruabunga ala Jisas
(Mat 3:13-17; Mak 1:9-11)
21 Mai na'ona alata la Jon ngaia 'e to'oru 'ubulana lokafu, ngaia 'e naruabu no'o na ta'a 'e aula. La Jisas 'e leka mai, ma la Jon ka naruabu ana. Alata Jisas 'e fo'a, ma nga lalo ka 'ulasi, 22 ma nga Anoe 'ola Abu ngaia ka sifo mai fafia 'ilaka'u te'e me'e bola. Ma te'e kwala 'e 'ola 'e leka mai fa'asia 'i Langi maka 'ilo'oo, “'I'oo no'o na'a wela agu na'a nau ku kwaimaa famu, mai nau ku aile'a ba'ita fe'eni'o.”
Nga idu futalanga
suria la Jisas
suria la Jisas
(Mat 1:1-17)
23 Ma alata lo'oo la Jisas ngaia 'e to'omia no'o oru akwale'e farisi fafia futalana, ngaia 'e eta no'o fana lekanga kwairiu fana kwaifa'ananaunga. Ma ta'a te'efou, gila manata 'ilo'oo la Jisas ngaia nga wela ala Josef lo'oo mola.
La Josef lo'oo ne'e futa mai ana la Hilae.
24 La Hilae ngaia 'e futa ana la Matat,
la Matat 'e futa ana la Lifae,
la Lifae 'e futa ana la Melkae,
la Melkae 'e futa ana la Danae,
la Danae 'e futa ala Josef lo'oo.
25 La Josef lo'oo nga wela ala Matataeas,
la Matataeas 'e futa ala Emos,
la Emos 'e futa ala Neham,
la Neham 'e futa ala Eslae,
la Eslae 'e futa ala Nagae.
26 La Nagae nga wela ala Meata,
la Meata 'e futa ala Matataeas,
la Matataeas 'e futa ala Semein,
la Semein 'e futa ala Josek,
la Josek 'e futa ala Joda.
27 La Joda nga wela ala Joanan,
la Joanan 'e futa ala Risa,
la Risa 'e futa ala Serababel,
la Serababel 'e futa ala Sialtiel,
la Sialtiel 'e futa ala Nirae.
28 La Nirae nga wela ala Melkae,
la Melkae 'e futa ala Adae,
la Adae 'e futa ana la Kosam,
la Kosam 'e futa ana la Elmadam,
la Elmadam 'e futa ana la Er.
29 La Er nga wela ala Josua,
la Josua 'e futa ana la Elaesa,
la Elaesa 'e futa ana la Jorim,
la Jorim 'e futa ala Matat,
la Matat 'e futa ala Lifae.
30 La Lifae nga wela ala Simion,
la Simion 'e futa ala Juda,
la Juda 'e futa ala Josef,
la Josef 'e futa ala Jonam,
la Jonam 'e futa ala Elaeakim.
31 La Elaeakim nga wela ala Milia,
la Milia 'e futa ala Mena,
la Mena 'e futa ala Matata,
la Matata 'e futa ala Netan,
la Netan 'e futa ana ala Defete.
32 La Defete nga wela ala Jesi,
la Jesi 'e futa ana la Obed,
la Obed 'e futa ala Boas,
la Boas 'e futa ana la Salmon,
la Salmon ne'e futa ala Nason.
33 La Nason nga wela ala Aminadab,
la Aminadab 'e futa ala Admin,
la Admin ne'e futa ala Anae,
la Anae 'e futa ala Hesron,
la Hesron 'e futa ala Peres,
la Peres 'e futa ala Juda.
34 La Juda nga wela ala Jekob,
la Jekob 'e futa ala Aesak,
la Aesak ne'e futa ala Ebraham,
la Ebraham 'e futa ala Tera,
la Tera ne'e futa mola ala Neho.
35 La Neho nga wela ala Sirag,
la Sirag 'e futa ala Riu,
la Riu 'e futa ala Pileg,
la Pileg 'e futa ala Eba,
la Eba 'e futa ala Sela.
36 La Sela nga wela ala Keinan,
la Keinan ne'e futa ala Afaksad,
la Afaksad 'e futa ala Siem,
la Siem 'e futa ala Noa,
la Noa 'e futa mola la Lamek.
37 La Lamek nga wela ala Metusala,
la Metusala 'e futa ala Enok,
la Enok 'e futa ala Jered,
la Jered ne'e futa ala Mahelalel,
la Mahelalel 'e futa ala Kenan.
38 La Kenan nga wela ala Enos,
la Enos 'e futa mola ala Set,
la Set ne'e futa ala Adam nga wela ala God.