1 KamuꞋa na ngela talingaꞋi God ki, muke lia kwaimausuli sulia na falafala nia. 2 Ana kaidaꞋi ki taꞋifau, muke alafe fuana ngwae ki, diꞋia logo neꞋe sa Christ alafe fuaka taꞋifau, ma ka kwatea naꞋa maurilana fuana faꞋamaurilaka. Sulia nia kwaisuꞋusi Ꞌani niaꞋa Ꞌana talana, ma God ka saeleꞋa osiꞋana na kwaisuꞋusiꞋanga nia.

3 Ma duꞋungana kamu na ngwae God ki, muke tua faꞋasia na abulaꞋanga bulibuli diꞋia na ꞋusuꞋa, ma na oga gugutaꞋanga. Muke tua faꞋasia na ru neꞋeri ki taꞋifau, fasi Ꞌiri noaꞋa ta ngwae kasi alaꞋa sulia ta ru bore Ꞌana ꞋunaꞋeri suli kamu. 4 Ma muke tua faꞋasia na alaꞋanga taꞋa ki, ma na alaꞋanga bulibuli ki, ma alaꞋanga ꞋoidoroleꞋanga taꞋa ki. Bore ma nia leꞋa lala fuana muke baꞋatafea God. 5 Ru mamana nau ku saea fuamuꞋa, sa tai bore Ꞌana neꞋe abulalana ka bulibuli nama ka Ꞌusu, nia ꞋafitaꞋi fuana nia ka ruꞋu Ꞌi saena ꞋInotoꞋanga sa Jesus Christ ma God. Ka ꞋunaꞋeri logo fuana sa tai neꞋe ka oga guguta, nia diꞋia naꞋa foꞋosilana na nunuꞋi ru ki.

6 NoaꞋa Ꞌoe kosi alaꞋania ta ngwae kasi sokeꞋo sulia ru Ꞌoro taꞋa Ꞌuri ki, “Nia leꞋa goꞋo Ꞌana fuana ngwae ke Ꞌusu nama ka oga guguta.” God ke baꞋa saetaꞋa ma ka kwatea kwaꞋikwaꞋinga fuana ngwae neꞋe kira aburongo ana ki. 7 Muke tua faꞋasia na ngwae ꞋunaꞋeri ki.

8 Ana kaidaꞋi Ꞌua maꞋi naꞋo, kamu talamuꞋa kamu tua maꞋi saena na maꞋerodo, bore ma taꞋena kaumulu alu naꞋa na ngwae na Aofia ki, ma muka tua naꞋa saena madakolaꞋanga. Nia naꞋa neꞋe abulalamuꞋa ka bolo faꞋinia na ngwae neꞋe kira tua saena madakolaꞋa. 9 Sulia na ngwae neꞋe kira tua saena madakolaꞋanga, God Ꞌafi kira fasi Ꞌiri na abulalada ka leꞋa ma ka saga, ma na alaꞋanga kira ka mamana. 10 Muke ili Ꞌuana na malingaꞋilana tae neꞋe faꞋasaeleꞋa na Aofia. 11 Ma noaꞋa kamu kasi fulia ru taꞋa ki, diꞋia ngwae neꞋe kira tua saena maꞋerodo, kira sasiꞋi. Bore ma, muke faꞋataꞋinia lala na roraꞋa kira ki, ma muke fata faꞋabasuda. 12 Nau ku Ꞌeke liu logo Ꞌani alaꞋanga sulia na ru neꞋe kira sasi ago ani saena maurilada ki. 13 Bore ma kaidaꞋi na madakolaꞋa ke rara Ꞌafida, kike baꞋa saiana na ru taꞋa neꞋe kira sasiꞋi ki. 14 OsiꞋana tae naꞋa neꞋe madakoꞋanga rara Ꞌafia, na ngwae ki kike baꞋa lisia. Sulia nia neꞋe kira ka fata Ꞌuri,

15 Nia ꞋunaꞋeri neꞋe, muke madafi leꞋa ana falafala kamu ki fasi Ꞌiri na abulaꞋanga kamu ka diꞋia na ngwae liatoꞋo ki ma noaꞋa kasi diꞋia laꞋu na ngwae kinaꞋi ru ki. 16 Ma ana kaidaꞋi ki taꞋifau, muke sasia na ru leꞋa ki neꞋe bolo fuamuꞋa fuana sasilana. OsiꞋana kaidaꞋi neꞋe, na ngwae Ꞌoro ki abulalada taꞋa. 17 Nia neꞋe, noaꞋa kamu kasi gwaubaliꞋa, bore ma muke manata leꞋa lala amuꞋa sulia ru neꞋe na Aofia oga kamu ka sasiꞋi ki.

18 Aia, ma muke tua faꞋasia kwaꞋu lilingaꞋanga Ꞌani waen, osiꞋana ru neꞋeri ke baꞋa faꞋali kamu. Bore ma muke fungu lala Ꞌani na AnoꞋi ru Abu fasi Ꞌiri nia ke talaꞋi kamu. 19 Ma ana kaidaꞋi kamu ka fiku, muke fata Ꞌani Sam ki, ma muke ngulia na ngu abu ki. Muke faꞋataꞋinia na saeleꞋanga kamu ki ana kaidaꞋi muke tafea God Ꞌani ngulilana faꞋi ngu ki. 20 Ana kaidaꞋi ki taꞋifau, ma fuana na ru ki taꞋifau neꞋe ka dao maꞋi, muke baꞋatafea God na MaꞋa sulia na fikuꞋa kamu faꞋinia na Aofia kia sa Jesus Christ.

21 Muke sasi Ꞌuana roꞋongaꞋa sulia na kwaiogaiꞋanga kamu ki kwailiu, osiꞋana na manata doeꞋanga kamu ana sa Jesus Christ.

22 KamuꞋa na Ꞌafe ki, muke roꞋosulia na araꞋi kamu ki, diꞋia logo neꞋe kamu roꞋosulia na Aofia. 23 OsiꞋana na ngwae araꞋi ka toꞋo ana ngasingasiꞋanga fafia na Ꞌafe, diꞋia logo neꞋe sa Jesus Christ toꞋo ana ngasingasiꞋanga fafi kia na ngwae neꞋe kulu faꞋamamana ana ki. Ma sa Jesus Christ neꞋe faꞋamauri kia, ma kulu ka diꞋia naꞋa na nonina. 24 Ma ka usulia logo na falafala neꞋeri, na kini neꞋe nia Ꞌafe naꞋa ka roꞋo nama sulia na araꞋi nia ana ru ki taꞋifau, diꞋia logo kulu na ngwae faꞋamamana ki kuka roꞋo logo sulia sa Jesus Christ.

25 Kamu ngwae araꞋi ki, muke alafe fuana Ꞌafe kamu ki, diꞋia logo sa Jesus Christ neꞋe alafe fuaka na ngwae neꞋe kulu faꞋamamana ki, ma nia ka alaꞋania talana kira ka saungia olisi kia fasi Ꞌiri nia ka faꞋamauri kia. 26 Nia sasi ꞋunaꞋeri fuana faꞋa abulana na ngwae faꞋamamana ki, ma ka faꞋasikasikada Ꞌani siuabuꞋanga ma Ꞌani fatalana. 27 Ma nia ka sasi logo ꞋunaꞋeri fuana kwatelana naꞋa ngwae faꞋamamana ki fuana talana, diꞋia kulu na Ꞌafe leꞋa nia ki ma ka noaꞋa ta ru kasi taꞋa osiꞋana kulu sikasika naꞋa, ma kulu ka saga naꞋa, ma kulu ka leꞋa Ꞌi maana. 28 Kamu na ngwae araꞋi ki, muke alafe fuana Ꞌafe kamu ki, diꞋia logo neꞋe kamu alafe fuana na nonimuꞋa talamuꞋa. Na ngwae ka alafe fuana na Ꞌafe nia, nia alafe logo fuana na nonina Ꞌana talana. 29 NoaꞋa ta ngwae kasi sulangaꞋinia nonina talana. Bore ma nia ka sarea lala ma ka lia sulia nonina talana, diꞋia logo sa Jesus Christ neꞋe sasia fuana ngwae faꞋamamana ki. 30 Ma kuluꞋa na ngwae neꞋe kulu faꞋamamana ana niaꞋa, kuluꞋa naꞋa neꞋe nonina sa Jesus Christ. 31 Sulia na KerekereꞋa Abu ba fata Ꞌuri, “Na ngwae ke baꞋa faꞋasia teꞋa nia faꞋinia maꞋa nia, ma ka araꞋi. Aia, na ngwae neꞋe faꞋinia na kini neꞋe, kera ka alua naꞋa taꞋi ru.” 32 God faꞋamanata kia Ꞌani ru leꞋa ki Ꞌani alaꞋanga neꞋeri, ma nau ku saiana nia fata sulia sa Jesus Christ ma kuluꞋa ngwae neꞋe faꞋamamana ki. 33 Ma na KerekereꞋa Abu ka faꞋataꞋinia logo ru sulia na araꞋi ki faꞋinia Ꞌafe ki ba Ꞌuri: Na ngwae neꞋe Ꞌoko araꞋi naꞋa, Ꞌoko alafe fuana na Ꞌafe Ꞌoe, diꞋia logo neꞋe Ꞌoko alafe fuamu talamu. Ma na kini neꞋe Ꞌoko Ꞌafe naꞋa, Ꞌoko fuꞋusi doe ana araꞋi Ꞌoe.