3
Yesu Mkulu kufosa Musa
1 Ivo ndugu zangu, wanhu wa Mulungu, womutangigwe na Mulungu, geseni mbuli ya Yesu iyo yatumigwe na Mulungu kuwa Mkulu wa nhambiko digogogo wa uhuwilo wochiutogola. 2 Kakala kokwaminika kwa Mulungu yoyamsagule kutenda usang'hano uno, fana viya Musa viyakalile mwaminika muna ukuwasang'hanila wanhu wose wa Isilaeli wowatangigwe kaye ya Mulungu. 3 Yesu kolondeka yahishimigwe ng'hani kufosa Musa, fana viya mzenzi wa kaye kana hishima ng'hani kufosa kaye yenyewo. 4 Kwaviya chila kaye yozengigwa na munhu imwe, mbali Mulungu iyo mzenzi wa vinhu vose. 5 Musa kakala msang'hani mwaminika muna isang'hano yake yose muna Ikaye ya Mulungu na kalonga vinhu vondayalonge Mulungu hamwande. 6 Mbali Chilisito kokwaminika muna Ikaye ya Mulungu. Cheye wenyewo ni kaye yake one chihagendelela kuwa magalu na kuigodela lolelo jetu.
Mhumulo ya wanhu wa Mulungu
7 Fana Muhe Yelile viyolonga muna Yamaandiko Yelile,
“Diyelo muhahulika dizi da Mulungu,
8 sekemuwe na mizoyo midala fana viya wasaho zenu viwamulemile Mulungu,
fana viya viwatendile muna yamazuwa yaja viwakalile muna ichuwala, baho viwanilemile.
9 Kuja wasaho zenu waniguma muna yamagezo na wanigeza,
ingawa wawona yaja yonitendile kwa miyaka malongo mane!
10 Ivo niwa na ludoko na wanhu wawo na nilonga,
‘Magesa ya wanhu wano yaga, wolema kutegeleza ndagilizi zangu.’
11 Niilaha kwa ludoko nilonga,
‘Hawezakwingila ng'o hana ihanhu hangu ha kuhumula.’ ”
12 Lelo ndugu zangu muteganye muladi munhu yoyose kumwenu sekeyawe na moyo wihile fana uwo na yelibule uhuwilo mbaka kuigola na Mulungu yeli mgima. 13 Mbali mugendelele kuhulika mbuli “Diyelo” yosomigwa muna Yamaandiko Yelile, igeleni moyo chila zuwa muladi hata imwe wenu sekeyawe mdala wa kuvwiziligwa na uhasanyi. 14 Kwaviya cheye cha hamwe mgati mwa Chilisito ihawa chokwamha kwa ugangamalo mbaka kuhelelo chiya chochihuwila chichili nacho kulawa mwanduso. 15 Fana viyolonga Maandiko Yelile,
“Diyelo muhahulika dizi da Mulungu,
sekemuwe na mizoyo midala, fana viya viwatendile wasaho zenu viwamulemile Mulungu.”
16 Waja wahulike dizi da Mulungu na kulema ni wanhu welihi? Wanhu waja ni wanhu wose walangulizigwe na Musa kulawa muna isi ya Misili. 17 Waja Mulungu yawehile kwa miyaka malongo mane ni wanhu welihi? Waja wanhu wowakalile wotenda uhasanyi, waja wafile muna dibwilingu 18 Waja Mulungu woyawalahile ng'o kuwa hawezakwingila muna ihanhu hake ha kuhumula hoyawasasalile ni wanhu welihi? Ni waja hawamtegeleze. 19 Ivo chowona kuwa hawadahile bule kwingila muna isi kwaviya walema kuhuwila.