1 Poropeta akali kingi Ilainja lenge yuu Tisipi yuu Giliate dokona singi range dokome kiŋi Ayape lamaiyuo lao, Kamongo Isaraele wambunya Anatu lete karalu karenge dokona namba yulu pyakamingi dokona kingi lao nambame emba pii dake langilyu. Ee kana dumbinya lamape remape mendena apupi pipyaepe epa nalu nao nara. Namba apu dee epara larono dokopa eparako, leya.

2-3 Dokopa Kamongo dokome Ilainja lamaiyuo, Emba yuu dake yaki nyepala neta pyakaenge dorena papala ipwa Jotane neta pyakaenge dorena ipwa kukinde kingi Seriti lenge epelyamo dokona repeta yalu pinya leya. 4 Lapala dee lao, Emba ipwa kuki dokona kamuo nao karare. Dee yaka orapene lenge dupwame emba nenge minyuo epo jinya lao lamaipu, leya.

5 Leyamo dokopa Ilainja Kamongona pii warombo sepala ipwa kuki epenge Seriti lenge dokona repeta palyuo piso kareya. 6 Dokopa baa yaka dupwame yangama alemanji lao nenge minyuo epo maiyami dee ipwa kuki dokona ipwa epeyamo kamuo neya. 7 Dokopa enakana dusale apu epa naya dokome ipwa kuki dokona ipwa epeya doko sokoya.

8 Dokopa Kamongo dokome Ilainja lamaiyuo lao, 9 Epapu yuu taone Serepate lenge yuu Saitone repeta singi dokona emba karala pupi. Dokopa enda waiyande doo palenge dokome emba nenge pinya lao lamaipu, leya. 10 Dokona lao Ilainja baa yuu Serepate peya. Pao yuu taone dokona kame kambu dokona peyamo dokopa enda waiya doko isa ponale yapo nyuo kareyamo kandeya. Kandapala baame enda doko kando lao, Ipwa kamuo jinya, leya. 11 Dopa leyasa enda doko ipwa nyela peyamo dokopa dee kamba kee lapala nenge borete lapo opetae minyuo epo jinyako leya.

12 Dokopa enda dokome isingi lao, Embena Kamongo lete karalu karenge Anatu doko kando lalu lao lao, Namba borete mendepe reta napu. Namba retapu dusipa kingi kete pyao dopale palawa kuki lama pere dokona silyamo dee isa olipi ipwange lama pee dokona petamo. Namba dae isa ponale mungyuo nyela ipuŋu minyuo anda papala nenge kuki retapu dolapome nambana wane dokopa nambapa suu pyao nenge wasaro. Dolapo nao ote pyuo narambanopa dee enakana lopo dokome nambwa angi kumaramba lyamo, leya.

13 Leyamo dokopa Ilainjame enda doko lamaiyuo lao, Mona randa napala mee pao embena seramo dupwana wambo nambana borete kuki mende wasakapala minyakao ipu. Enakana seramo dupwa embapa ikinyipa ingyuo range wasareŋe, leya. 14 Dokona lao Kamongo Isaraele wambunya Anatu dokome dopa lapya. Namba Kamongo dokome apu peyapa narono dokopa pere dokona palawa ota nara dee pee dokona isa olipi ipwange dupwa ota narako lapya, leya.

15 Dokopa enda waiya dokome Ilainja pinya leyamuli pyuo piya dokopa yuu gii malu dupwana nakama nenge kapa siyamo neyami. 16 Doko Kamongo dokome Ilainja keta lalu lao lao lamaiyamuli pyuo pere dokona palawa ota naya dee pee dokona isa olipi ipwange ota nayako.

17 Dokopa enakana mendepa enda waiya dokona ikinyingi doko anga piya doko ama pyao konda nyepala kopetame piyamopa baa kumuo oteya. 18 Dokopa enda dokome Ilainja kando lao, Anatunya akali doko. Embame namba keta akipamo yulu dake pilisi? Anatumi nambana koo dupwana kamba suu pyapala dokona dee nambana wane kumungi dokona pyambwakana lao ipisi? leya.

19 Dokopa Ilainjame enda doko lamaiyuo lao, Wane doko namba jinya, leya. Lapala wane doko endangimi kupyaro kareya doko nyepala soo anda ketae baa paleya dokona papala ratena ketae reteya. 20 Retapala baame ateŋa poraiyuo pyao lao, O Kamongo nambana Anatu, enda waiya dake kando yulu koo dopale doko akipamo pilisi? Enda baame namba kapa ingyuo rapu pipapyamopa dee epapu embame banya ikinyingi doko pyakamilyane, leya. 21 Enakana Ilainja baa yuu remasa wane yongo dokona ketae pangu sepala ateŋa lao, O nambana Kamongo Anatu, wane dake kamba lete pyuo nyepe, leya. 22 Dokopa Kamongome Ilainjana ateŋa dokona isingi yano pyakamiya. Doko wane baa yongo peparae lenge rapala ŋee ŋaepe siya.

23 Dopa piyamo dokopa Ilainjame wane doko minyuo anda isarena endangi peteyamo dokona minyuo papala enda baa kando lao, Kanda, embena wane ikinyi doko lenge ralamo, leya. 24 Dokopa enda dokome isingi lao, Epapu namba silyu doko, emba Anatunya akali angi Kamongo dokome emba angi kinyi pii langipyalamo lao epapu namba silyu, leya.