1 Yuu gii dokopa Pilisitia rara dupwa nyuo malu palyapala Isaraele rara dupwa pyala panya piyami. Dokona lao Isaraele dupwame nakama pyala panya kata nyiyami. Doko Isaraele dupwa komau anda pipala yuu Epenesa dokona paleyami dee Pilisitia wambu dupwa yuu Apeke dokona komau anda dupwa pyuo paleyami. 2 Enakana Pilisitia wambu dupwame Isaraele wambu dupwa pyao yanda andake pyuo wini pipala akali taosande kisima (4,000) pyao kumasiyami. 3 Dokopa ami yanda singi lapo kapu kyuo nakama paleyami dokona epeyami dokopa Isaraele akali mupwa dupwame lao, Akipamo Kamongo dokome epapu namwa kyawa yaki nyuo Pilisitia wambu dupwame namwa pyao isa palyuo nakama wini pinya lapyase? Kamongome namwa role pyao papyuo karapala namwana nyisu petenge dupwa keta kyawa lete nyuo nyisara lao namwame yuu Sailo dokona banya Kana Minyuo Lalu Lao Lenge Pii Palenge Bokote silyamo doko nyela monale, leyami. 4 Bokote ketae dokona aŋala lama wasisi petenge. Doko suu pyao Kamongo Porai Wakasa dokona kiŋinya isa petenge dopale ingingi. Dokona lao nakamame yuu Sailo dokona akali lapo papala. Kamongome bokote doko nyuo soo epeyaminyi dokopa Ilaina ikinyingi akali Opini Pineyasepa lenge dolapo role pyao epeyambi.

5 Kamongona Kana Minyuo Lalu Lao Lenge Pii Palenge Bokote epo pyaka sepeyamo dokopa Isaraele wambu dupwa rae maiyuo pii ketae palyuo leyaminyisa yuu dupwa pyuku pyuku leya. 6 Dokopa Pilisitia wambu dupwame pii poraiyuo leyami doko sepala lao, Ipuru wambu komau anda pyuo palaminyi dokona pii porai letaminyi doko selapape. Doko renge apa pyuo letamisi? leyami. Enakana nakama Kamongona Kana Minyuo Lalu Lao Lenge Pii Palenge Bokote doko Ipuru wambu paleyami dokona epo pyaka silyamo leyami doko sepala 7 nakama pakame kumapala lao, Mee bange anatu mende wambu dumu palimi dokona ipwaamo. Namwa isa pwaamano doo pipyamo kando letaminyi doko suu pyao namwa kando mende wamba pii naya kande leyami. 8 Mee bange anatu porainya renge palenge dupwana kingi raka lao namwa apimi kyawa lete nyerase? Mee bange anatu dupwame Isipi wambu dupwa yuu muiyane dokona pyao kumasiyami. 9 Pilisitia wambu dupwa kando paka nao porai ingyuo karalapape. Karapala akalimi yanda pingi dopale ingyuo pyalapape. Dokona Ipuru dupwa wamba namwana kendemande ingyuo kareyami dopale ingyuo namwa nakamana kendemande ingyasaramaŋa akalimi karo pingi dopale ingyuo kando pyalapape.

10 Pilisitia wambu yanda poraiyuo pipala Isaraele yanda singi taosande akalisa rema (30,000) pyao kumakayami dokopa Isaraele wambu dupwa ralo bolombalo lao peyami. 11 Anatunya Kana Minyuo Lalu Lao Lenge Pii Palenge Bokote doko nyuo minyuo peyami dee Ilaina ikinyingi lama Opini Pineyasepa dolapo opetaeko pyao kumakayami.

12 Akali mende Benjamenena rara dokona yanda pyuo kareyaminyi kamapi yaki nyepala yuu gii mendaki dokopako makando pao suu Sailo dokona kando nyiya. Baa mona randayamo dokona banya komau minyuo pilyuo dee banya lenge kambu kyawasipi awai piya. 13 Dokopa Ilaime Anatunya Kana Minyuo Lalu Lao Lenge Pii Palenge Bokote dokona lao mona randapala banya isa petenge seya dokona kata repeta mee kandaro peteya. Dokopa akali dokome piyamo pii dupwa yuu taone dokona lao pauwiyasa wambu peparae ee lao pakame kumuyami. 14 Dokopa Ilaime doo lao kareyaminyi doko sepala piso soo, Doo letaminyi doko aki kando letamisi? leya. Dokopa akali doko waiya lao Ilai peteyamo dokona papala pii arome doko epo lamaiya. 15 (Ilai baa ee kana akalisa mange mendaki dee ipisu mange lama karo kareyamopa banya lenge doko kwaeyo oo repeta kwaeyalu kwaeyo kwaeyara ingiya.) 16 Akali dokome lao, Namba yanda pimi dokona kyawa lete epapala dokona piso lano makando epo dae epapu epelyo, leya.

Leyamo dokopa Ilaime lao, Nambana wane apa pipyape? leya.

17 Dokopa pii minyuo epeyamo akali dokome isingi lamaiyuo, Pilisitia wambu dupwame Isaraele wambu dupwa kopetame pyao anamasi minyiyaminyisa nakama pakao pumi. Dokopa embena wane Opini Pineyasepa pyao kumakami. Pyao kumakapala dokopa Anatunya Kana Minyuo Lalu Lao Lenge Pii Palenge Bokote doko nyuo pumi, leya.

18 Akali dokome Anatunya Kana Minyuo Lalu Lao Lenge Pii Palenge Bokote dokona lao leyamo pii doko sepala Ilai baa kame kambu repeta banya petenge isa dokona peteyamo doko lungu rao matarena pao paleya. Pao paleyamo dokopa baa ama alemo ingyuo ando rondo lasi peteyamo dokome banya mange doko rukyapala baa kumuya. Baa Isaraele wambu dupwana mupwa ingyuo ee kana akalisa kisima iso kareya.

19 Ilaina kauwange Pineyasena etenge doko wane paleya. Doko nyaŋa kando nyera yuu gii oo repeta ingiya. Ingiyamo dokopa Anatunya Kana Minyuo Lalu Lao Lenge Pii Palenge Bokote doko nyuo pelyaminyi leyaminyi dokope dee banya kauwange akalingipa kumuyambinyi leyaminyi doko soo peteya. Soo peteyamo dokopa aopa enda baa mata pyapala wane mandeya. 20 Mata piyamo dokopa baa randame kumuo oo repeta kumara ingiya. Dokopa enda yango baa nyiso kareyami dupwame dopa lamaiyuo, Paka napipi. Wane ane mende manjene, leya. Dopa lamaiyaminyipape pii see napala isingi lamai naya. 21 Enda baame Anatunya yanga paupau lenge doko Isaraele wambu dupwa yaki nyuo kaeyapyamosa wanena kingi Ikapote leya. Ipuru pii lenge dokona kingi Ikapote lenge dokona renge Anatunya yanga paupau lenge doko pali nange. Dokona lao Anatunya Kana Minyuo Lalu Lao Lenge Pii Palenge Bokote dokonape dee banya kauwange akalingipa kumuyambi dolapona lao suu pyao kingi doko leya. 22 Lapala enda dokome lao, Anatunya Kana Minyuo Lalu Lao Lenge Pii Palenge Bokote doko nyuo peyaminyi dokona Anatunya yanga paupau lenge doko Isaraele wambu dupwa keta yaki nyuo kaeya, leya.