1 Kamongome lao makwa isa ingyuo kuku pyaa nare akali doko Isaraelena yuu kyau dupwa kando lamaiyuo, Namba Kamongo Mupwa Andake Wakasa karenge. 2 Dokome waili pii nakamana lao letamo doko sinya lare, langiya. Isaraelena yanda pimwai dupwame nakama range nyisu yakunaiyape mende pisi nalyamo dokona kendepulinde karamano lao suu pyapala lao dakepa yuu kyau sulu singi dupwa nakamana lyakande, letaminyi.

3 Dokona lao namba Kamongo Mupwa Andake Wakasa karenge dokome pii leto doko dapa letamo lao polo lamaipi. Yuu lili wakale parali maki palenge dupwame Isaraelena yuu kyau dupwa ukiaki minyuo epo nyiyaminyi dokopa Isaraele wambu dupwa kando kilya kando lao piyami. 4 Dokona nakama yuu kyau kuki andakepe ipwa pona kukipi yuu anda lama lamape dee yuu kwaeyasi silyamo dupwape dee taone yuu liti wakale parali maki palenge dupwame pyuo kilya kando kwaeyaminyi dupwa mee apu silyamo dupwape namba Kamongo Mupwa Andake Wakasa karenge dokome apa letene lao selapape.

5 Nakama yuu liti wakale wambu parali maki palami dupwana lao namba Kamongo Mupwa Andake Wakasa karenge dokome imbu singi kana ingyuo rao alyuo karamo dokona piso nakama pyalana pyuo lamaipu. Yuu Itome range nakama angingyuole kando lapu. Nakamame namwa kilya kandalya kandana pipala rae maiyuo epo mena naraminyi nenge malu singi dupwa epo nyakami.

6 Dokona lao pii dake Isaraele wambu dupwa angingyuo lamairi. Nakama yuu liti wakale range dupwame Isaraele wambu pyao bembailanyi pyambuo elya maiyuo dee kilya kandele lao piyaminyi dokona namba Kamongo Mupwa Andake Wakasa karenge dokome imbu singi paleta nakama pipya yango koo palyuo karoŋo dokona lao yuu kyau ipwa pona kukipi yuu lamape dupwa dopa letamo lao lamaipi. 7 Namba Kamongo Mupwa Andake Wakasa karenge dokome yuu liti parali maki dupwa nyuo isa nembaronopa elya nyerami lao kingi ketae nembo lapunu pilyamo. 8 Yuu doloma dopa pyakamirunupape Isaraele yuu kyau dupwana Isaraele wambunya lao isa dupwa deeyako yoko byalu lao angi jingi lyuo lokwaso palyuo piraŋa nakama oo repetale range anda epaminyi. 9 Namba nakamana dorena karapunu pilyamoŋo nakamana yuu doko ape ape pyao dokona nenge jingi randa lakao piru. 10 Nambame nakamana ree palu dokona wambu wai kiso andakyaro dokopa nakama yuu taone pyao lalyinyi nembeyami kwaeyasi silyamo dupwa kamba minyalyuo pirami. 11 Nambame mena bulamakaope dee wambupi dupwa wai kiso andakyakaro. Nakama wamba kara nange wambu dokona lama konda pyuo sipuro kararami dokopa wane maluko konda pyuo jero. Nambame nakama ee wara pyuo nao kapa palyuo wamba palyuo karengenyili pyuo karalapale lao piru doko soo kandapala dokopa namba doko Kamongo dokolyamo lao kando serami. 12 Nambame nakama nambana Isaraele wambu dupwa yuu range dokona palyuo karalapale lao dee lanyuo eparo. Eparono dokopa yuu doko nakama rangena ingyara. Ingyaramo dokopa nakamana wane dupwa dee dopako pyuo papyuo kararaminde daa.

13 Yuu dake kando wambu pyao nao yuu range wane wanakepe waa nyuo pyuo palyuo karenge lao karaminyi doko namba Kamongo Mupwa Andake Wakasa karenge dokome soo leto. 14 Dopa letaminyi soo karoŋo epapu dakepana piso pao rengyape rakane nakamana wane waa nyakao wambu pyao pyakepo naope pii narami lao lapunu pilyamo. 15 Epapu nakamana yuu kwaeyasi doko kando dee giyalya giyana pyuo gyaa kai pyuo laa narami lyakande. Isaraele yuu dokome nakamana wane wanakepe dupwa waa nyaka narako lao namba Kamongo Mupwa Andake Wakasa karenge dokome lapunu pilyamo.

16 Kamongome namba langyuo, 17 Makwa isa ingyuo karo kuku pyaa nare akali doko langilyu. Nakama Isaraele akali dupwa piso palyuo piyaminyi doko nama napala myuku piya. Nambame nakama kandeyo dokopa enda kingi lanyuo petelyamo ipyange dopale ingyuo peya. 18 Yuu dokona wambu pyapalako karo dee kingimi wasisi dupwa kyawa nyuo kingi lao yuu doko kokwayamisa dokona nambana imbu singi doko nakama keta kulimbuo epo palira lao pena lao kaeyo. 19 Nakama dopa pyuo kopetame pyuo paleyaminyi dokona lao kooŋo lao lao koo keta palyapala yuu liti wakale dupwana bolombalo lao pena lao pyao ralinyi nembeyo. 20 Yuu wambupi wakale dupwana peyami dokopa wambu dupwame lao dokopa nakamana Anatu dokome yuu maiyamo doko yaki nyuo kaeyapenge ingiyasa yaki nyiyami leyami dokopa nambana kingi poo pyasi doko kwaeyo peya. 21 Isaraele wambu anja peyami dupwana nambana kingi poo pyasi doko nyuo yuu paranyi nembo peyaminyi doko kandapala nambame nambana kingi doko range sakao kareyo.

22 Dakepa doko namba Kamongo Mupwa Andake Wakasa karenge dokona pii Isaraele wambu nakama lamainya pilyu doko lamaiyakape. Nambame renge mende pyupono lamo doko Isaraele wambu nakamana reke lao pinya pilini lao suu pyasaramiŋi doko daa. Nakama yuu liti wakale wakale dupwana peyaminyi dokona nambana kingi poo pyasi doko nyuo yuu paranyi nembo peyaminyi dokona lao piru. 23 Nambame yuu liti wakalena nakama pao nambana kingi nyuo yuu paranyi nembo peyaminyi dupwana yulu angi mende kandapala nambana kingi doko poo pyasilyamo lao kando serami dokona palyuo pirunu dokopa dupwame namba doko Kamongo lao serami lyakande. Nambame nakama nyuo yulu pipala namba doko poo pyasiŋi lao yuu dupwana wambu lasaka piruŋu. Namba Kamongo Mupwa Andake Wakasa karenge dokome letoŋo. 24 Nambame nakama yuu liti wakale wakale kuki andakepe dupwana karaminyi doko nyepala lanyuo epo yuu nakamana range dokona dee lanyuo eparo. 25 Nambame nakamana kopetame koo pyuo isa kanape suu pyao karaminyi dupwana ipwa karo pisi nange dokome kulimbwanyi palyuo wate poo pyao nyero. 26 Nambame nakamana mona suu pingipi dolapo enenge inginyi pyambwakaro. Nakamana mona kana poko kamba lenge doko nyuo nembakapala laronuli pyuo rape rape lao pingi suu pingi doko jero. 27 Nambame nambana imambu doko nakamana mona rena palyapala nambana lowa pii kuki epengepe jiyunu dupwa apa pyuo minyilyaminyi lao kando kararo. 28 Dopa pipala dokopa nakamana rakange kyawa dupwa yuu maiyunu dokona kararami dokopa nakama nambana wambu kararaminyipa namba nakamana Anatu kararo. 29 Dopa pyuo paramo dokopa nambame nakama keta renge kwaeyo para mendepe epa nanya lao nyiso kararo. Nambame nakama keta lopo dee see naraŋa lapala kenapa ee dupwa ando kakana pyakaro. 30 Dopako pyuo lopo kone seramopa yuu liti andake dupwa pipa moŋo nyuo palya namili lapala isa jingi nenge isa dupwana lokwaso palyuo kakana pinyi nembakaro. 31 Dokopa nakamana yulu koo piyaminyi dupwa suu pyao lao karapala akipamo piyama lao elyame kumarami. 32 Nambana yulu keyange pilyu dupwa Isaraele wambu nakamana reke lao pilini lao masarami doko daa. Nakama nambana yulu keyange doko kando koo dupwana elya nyimili lapala pipunu pilyamo, dopa lao namba Kamongo Mupwa Andake Wakasa karenge dokome pii dake lapunu pilyamo.

33 Namba Kamongo Mupwa Andake Wakasa karenge dokome dopa leto. Nambame nakamana koo dupwana pyuo poo pyao nyepala dokopa nakamana taone dupwana range palyuo karalapa larono dokopa yuu andape kwaeyasi dupwa range dee kamba minyalyarami. 34 Wambu nakamana yuu dokona kata okosowape epo pao karo kandeyami dupwame doko aki yuu lao see nayaminyipa isoko dupwa yoko lapu lapu pipala kaeya. Dopa pyuo peyamopape nambame dee singinyili pyuo penale apa yuu pyao epo palipa laro. 35 Wambu epo dee kandarami dupwame lao yuu taone dake wamba lalyale pau lao kwaeyo apa siya kande doko yuu porai ingyaramopa ee Etenena nenge andenge dopale ingyuo wambu palengende pyuo kareyalyamo larami. 36 Dopa lao yuu wakale range parali maki yuu palenge wambu dupwame yuu doko Kamongo nambame yuu taone lalyale pau lao siyamo dupwape dee yuu isa ee nengepe dupwa minyalyilinyi larami doko. Namba Kamongo dokome piso lao lao kaeyo leto. Doko dokona palyuo piru.

37 Namba Kamongo Mupwa Andake Wakasa dokome letamo. Isaraele wambu dupwame nambame nakama nyisapili lao piso sela imili lao suu pilyu. Dee nakamana wambu doko ipwa pota kee kana ingyuo kakana pena lao suu pilyu. 38 Taone lalyuo buru bara pasi silyamo dupwa rengya dokopa wambu simbuo rangu papala yuu Jerusaleme dokona mena sipisipi Anatu pyao kiso maiyamisa menapa yuupa aopa laro karo pyao kiso maiyami kande dopale ingyaro karara. Doo pyuo parami doko kandapala namba doko Kamongo lao soo nyerami.