1 Namwana Anatumi lao, Nambana wambu dupwa nyisakao mona minyarambu karape, letamo.

2 Jerusaleme wambu dupwa nyiso mona porainyi pyambuo karape.

Nakama lamaiyuo, Randa doko yuu andarele kapa napelyaminyi.

Epapu nakamana koo dupwa kame sisi silyamo, lao lamaipi.

Doko nambame nakamana yulu koo dupwana manda manjo randa doko maiyuo kaepu.

3 Pii mende dopa lao kyakale lao,

Kamongona kata mende yuu muiyane dokona mondo lao retakamipape.

Yuu nenge anda nange muiyane dokona namwana Anatunya kata doko wapuo rolae pyuo karalapape, letamo.

4 Yuu oko dupwa peparae pyao rolena.

Dopa pipala yuu kyau andakepe kukipi dupwa peparae pyao panda lama lama inginya.

Dee yuu koo kyau pyalya pyana pingi dupwa rambi kwuasi sera.

5 Dokopa Kamongona neta renge yulu maro lao panara.

Dokopa wambu peparaeme kandarami.

Doko Kamongo baa rangeme dake lalu lao lao kaeyamo dokona pira.

6 Pii mende ketae palyuo lao, Wai pii mende lamaila puu, lapya.

Lapyamosa aki wai pii mende nambame lamairusi lao piso sipu.

Dokopa lao, Wambu peparae makwa isa ingyuo karo kuku pyaraminde daa letamo.

Jingi bui renge dupwa yuu gii mendasipa iki au pipala loo lenge kandale.

7 Kamongome poo raiya dupwa ketae minyinya lao pelyamosa

isako dupwa yando napala isa jingi dupwa loo lao isa penge.

Wambu dupwa isako manda manjo waiya lao otarami.

8 Doko suu pyao wambu dupwa mee dokona mendeke ingyuo karaminyi pilyamo.

Kamongona pii doko mee isa sulu sera letamo.

9 Jerusaleme, yuu kyau ketae dokona pulyuo papala

waili pii keyange doko lamaipi.

Pii ketae palyuo kee lao,

Sayone wambu dupwa waili pii keyange doko lamai.

Dopa pyuo lao papyuo paka napipi.

Yuu Juta taone wambu dupwa lamaiyuo,

Nakamana Anatu doko epelyamoŋo, lao lape.

10 Kamongo Mupwa Andake Wakasa dokome porainya renge palyuo banya wambu dupwa iso karala epelyamo.

Epo dokopa banya wambu kiiramo nyiyamo dupwa role pyapeta lanyuo epelyamo.

11 Baame banya mena sipisipi dupwa sipisipi rapu pingi akalimi pyamuli pyuo mondo lao rapu pira.

Baame mena sipisipi yakane dupwa nyuo pyasepala

banya kingi kalengena reto kupyuo lanyuo papira.

Baame sipisipi yakane dupwana endangi dupwa anjiki pyuo laminyuo para.

12 Mendalimi ipwa kota pete doko nyuo kingi kapena retapala makande pyuope

panda yake dulu kingi dokome makande pyuo pira ingilyase?

Mendeme yuu dakena yuu dupwa pee kapona pyambwapala minyara ingilyase?

Panda yuu kyau kuki epengepe dupwa nyuo makande pyuo sikyali pirase?

13 Api mendeme Kamongona suu pingi dokona serase?

Api mendeme baa kando dopa pyuo pipingi mana laramopa pirase?

14 Apimoo pipya Anatu saka nalyasa

dopa pipala pirama ramo kapa ingyara lao wato lao petengese?

15 Kamongona lenge kambu dokona wambu yuu muu liti andakena petaminyi dupwa mee kuki ingingi.

Nakamame Kamongome kandapyamo dokopa ipwa goe mendaki dopale ingyuo penge.

Yuu kuki ipwa kota nanesa singi dupwa banya lenge kambu dokona mee sinjimu yaepa dopale ingingi.

16 Yuu Lepanone imwa dokona mena karaminyi dupwa peparae

Anatu pyao kiso mairaminyi kapa pii nara ingilyamo.

Dee isa malu dokona karamo dokome kapa pyuo waiyuo isare kisa narami ingilyamo.

17 Yuu muu peparaena wambu malu petamano lao suu pilyaminyi dupwa Anatunya lenge kambu dokona angi mende daa ingilyamo.

18 Api mendeme Anatupa manda manjo larase?

Apa pyuo embame baa apiyakalende lao polo larese?

19 Yulu pingi akali dupwame mee bange anatuŋu lao kingimi waso

kana golome yambe pyuo

rate kuki kana kulingimi wasingi dokona ketae retenge dopalende daa.

20 Akali mendeme kana kulingipi kana golope dupwa kapa ropo pyara ingya nange dokopa

isa kwaeya nara lapo kando nyerami.

Nyepala baame akali lapo kando mora piso wambu ingyuo wasingi mende koto nyepala

akali ingyuo rolae pisapenge doko wasakana larami.

21 Emba see nangese?

Emba yuu wamba langya nayamisi?

Emba yuu doko apa pipala kanda siya lao see nangese?

22 Baa isa yuu dokona ketaepe yake dulunya pena

banya petenge isa dokona petenge dokome wasiya.

Wambu isa palaminyi dupwa baa sipurali kuki dopale ingilyamo kandenge.

Baame yake doko komau ingyuo minyuo pee lao

komau anda pipala palenge dopale inginya lao pingi.

23 Baame gapomane akali wambu iso karenge porai dupwa

isa palyuo kingi laa nana lao karenge.

24 Nakama angi pingi pyao karapa narami doko

Kamongome porambaiye peyara dokopa

dupwa mee kalendau porakana ingyara.

25 Api mendepa Anatu poo pyasi dokopa manda manjo karara ingilyase?

Baa yale mende mendasa karase?

26 Yake dokona kandalyuo kandape.

Embame bui kandelene dupwa apimi wasiyase?

Mende yanda singi ami ingyuo laminyuo penge dokome

akipare karaminyi lao soo otenge

dee bui mendaki mendaki lao kingi lenge.

Banya porainya renge doko kamame andake wakasa dokome

mendaki mendepe neta pyarepala paa nana lao singi.

27 Isaraele akipamo embena randa dupwa Kamongome sepa napala lao

rolaka naralyamo lao suku lao karepe?

28 Kamongo baa lete karo puu penge.

Baame yuu muu peparae wasiya.

Baa makame kumuo mende pii nara inginginde daa.

Banya suu pingi dupwa mendemepe sakami nange.

Doko nakama see nao soo nyii nao pingisi?

29 Baame wambu lapo kapa ingya nao makame kumuo karenge dupwa porainyi pyambungi.

30 Nakama parange ingyuo kararaminyipape poraya naramo kararami.

Akali parange dupwa makame kumapala mee isa paramiko ingilyamo.

31 Dopa piramopape wambu Kamongo nyisara lao baa keta pyamalyuo kapa ingingi lao suu pyao karaminyi dupwa

porainya renge enenge nyuo kararami.

Yaka kambe banya papakeme ketae poraiyuo soo penge dopale ingyuo kararami.

Nakama makando paraminyipape maka narami.

Dee kata paparaminyipape nakama mee porai ingyuo kararami.