1 Jerusaleme emba epapu eŋa nembo neta dopale ingyuo rao sipurape.

Dokopa Kamongome banya neta renge yulu doko nakama keta ranyi pisilyamo.

2 Yuu muu liti wakale wakale dupwa iminjingi dokome yambe pyaramo kararami.

Dopa piramopape Kamongona neta renge dokome nakama keta yanga paupau lao rao karara.

Dopa pyuo banya eŋa penge renge doko nakama keta palira.

3 Dokopa wambu rara wakale dupwa nakamana yanga paupau lenge dokona eparami.

Dee kiŋi dupwa nakamana yuu gii enenge yangaramo dokona eparami.

4 Nakama lenge pendekae lapala apa pilyape lao kandalapape.

Nakamana wambu dupwa anda epena lao malu palyuo karaminyi.

Nakama ikinyingi dupwa yuu nanesa piso eparaminyipa

nakamana wanenge dupwa wane wanakepe nyaŋa ingyuo wambu wakale dupwame apu soo eparami.

5 Nakama doko kandapala rae wakasa maiyuo kararami.

Dopa pyuo kando mona pulunongo pyao kararami.

Wambu rara dupwana kamongonge bange dupwa

ipwa kota dupwa yalo nakamana lao minyakao eparami.

6 Yuu Mitiane Epape dolapona piso mena kamele malu suku piro karo eparami.

Dopa piraminyipa mena kamele lapo yuu Sipa dorena karo kana golope rendamu pingi bangepe minyuo eparami.

Dokopa Kamongome yulu keyange pipyaŋa lao wambu dupwame waili pii doko larami.

7 Yuu Keta Nepayotepena mena sipisipi peparae

nakamame pyao kiso mairamiŋi lao minyuo eparami.

Doo minyuo eparaminyi dupwa kana pyare lasi dokona pyao kiso maiyuo Kamongo rae mainyi pyambwarami.

Doko Kamongo dokome banya tembole anda doko kamame wakasa ingyuo neta ranyi retara.

8 Ipwa sipu dupwa kopa isa isa puu pae lao epamuli pyuope

dee yaka waiyamu waiya lao bii lao anda epamuli pyuo epelyaminyi dupwa aki lapose?

9 Sipu dupwame yuu nanesa piso

Anatunya wambu dupwa range anda lanyuo imisa pilyamo.

Kamongo dokona kingi ketae pyambuo karena lao

nakamame kana kulingipi kana golope dupwa minyuo epelyaminyi.

Kamongo doo yuu muu peparaena wambu dupwame banya wambu dupwa ketae pyambuo karena lao pilyamo doko

Isaraele wambunya Anatu poo pyasi ingyuo karamo.

10 Kamongo dokome Jerusaleme kando dopa letamo.

Wambu yuu wakale range dupwame nakamana kana kame awali lao doko dee kamba pyakarami.

Dokopa wambu dupwana kiŋi dupwame nakamana yulu pyakarami.

Nambana imbu singi dokome nakama randa jiyu.

Dopa piyunupape dakepa nambame nakama epe kando sakame kumuo kararo.

11 Dokopa kukwa korakamape dupwana nakamana kame kambu dupwa lumbasi sera.

Seramo dokopa yuu muu dupwana kiŋi dupwame

nakamana kamongonge bange dupwa minyakao epo kararami.

12 Dopa piraminyipa wambu yuu liti lapome nakamana yulu pyaka narami dupwa

pyao kokwa soo nembalu nembo nembaro.

13 Dopa pirunupa isa rara wakale wakale dupwamepe

dee yuu Lepanone imwa dokona isa keyange dupwamepe

minyuo epo yuu Jerusaleme dee kamba wasarami.

Doo minyuo eparami dokome nambana tembole anda doko au pinya lao pyuo

nambana taone andake doko netaŋa rao lepo lepo pyuo karena lao wasarami.

14 Akali nakama randa joo kareyaminyi dupwana ikinyingi dupwame epo

nakama mee mende ulipili ingyuo karaminyi karamano lao lasaka pyuo pangu serami.

Wambu nakama angi mende daaŋa lao suu piyaminyi dupwame epo

nakamana kimbu seramo dokona piso nakama lakando lao

Kamongona yuu taone andake, larami.

Lao dokopa, Isaraele wambunya Anatu poo pyasi dokona taone Sayone lenge, larami.

15 Dokopa nakama epe kanda naope yaki nyuo kame soope pii narami.

Dopa piraminyipa yuu taone andake yaki nyuo kaelyaminyi apa soo wambu pali nalyaminyi singi dopale ingyuo see nara.

Nambame nakama andake ingyuo au wakasa pyuo

yuu rae maiyuo karalu karenge inginyi pyambwaro.

16 Dokopa endangimi dokome banya wane rapu pinginyili pyuo

wambu rara dupwamepe kiŋi dupwamepe nakama rapu pirami.

Dokopa namba Kamongo Isaraele wambunya Anatu porai dokome

nakama kyawa lete nyuo kiiramo nyiilyamo lao serami.

17 Nambame kone kana jepenge doko suu pyao kana golo jero.

Dee anepe isape jepenge doko suu pyao kana kulingipi kone kanape jero.

Jepala mee kana jepenge doko kaepala ane jero.

Dokopa nakamana akali mupwa dupwame randa joo kopetame rapu pii narami.

Nambame nakama mona seramo rolae pyuo iso karena lao piru.

18 Yanda pelana suu pyao yanda lakange pii dopale mendepe see narami.

Nakamana yuu doko dee pyao kokwa soo minjuku minyinyi nemba narami.

Nambame nakama konambe mendeke ingyuo kame pyuo minyaro.

Dopa pyuo kyawa lete nyerono dokona lao nakamame namba lakandarami ingilyamo.

19 Dopa piramopape kukwa korakamape

nakamana neta dee kanape renge panda dokona

namba Kamongo doko nakamana yanga paupau lenge kulisa ingyuo rao karalu kararo.

Nambana neta renge dokona yanga paupau lenge doko nakama keta ranyi peyara.

20 Nakamana mona rando ee lenge yuu gii dusipa lumwa pira.

Dokopa namba Kamongo doko kendali ingyuo

neta kanape dolapo yalaponalu rao sulu sero.

21 Dokopa nakamana wambu dupwame rolae doko anjuku lao pyuo

yuu doko nyuo palu palirami.

Nambana yulu andake dupwa nakama keta lasaka pyuo panaro lao

nambame nakama nyuo pingi pyao wara pipala wasiyu.

22 Dee nakamana ree palu kamame kukilipi inyimungu karengepe dupwa

rara andake porai renge palenge dopale ingyuo palirami.

Dokona yuu gii rolae doko eparamo dokopa

doo leto dake waiya lao pyaka sinya laro.

Namba Kamongo dokome leto.