18
Jeremaya Baa Yuumi Kapo Wasinginya Anda Peteya
1 Kamongome namba langyuo, 2 Yuumi pere warake wasingi akali banya anda parenepa dokona nambana pii emba langiru, leya. 3 Dopa leyasa papala pere warake wasingi akali banya wasingi taepo repeta yulu pyuo peteyamo kandeyo. 4 Pere wasiyamo dokona pao kwaeyamo ramo dokopa dee minyuo uki minyapala wara dokome pere mendere wakale wasapa piya.
5 Dokopa Kamongome namba langyuo, 6 Nambame nakama Isaraele wambu dupwa pipya pere wasingi akalinya pere wasalana suu pyapyamo doko kaepala uki minyuo wakale wasiyamuli pyuo pii narose? Akali wara minyaro karo mende mende pyuo wasalana suu pilyamuli pyuo pingi kandale. Dopa pyuo nakama nambana kingi kapena karaminyi dupwa dokona palyuo piru. 7 Nambame yuu lapo maso yuu liti mende lalyuo kokwa sinyi nembaro laronopa 8 wambu dupwana suu pingi yulu koope dupwa mata maiyuo kaeyarami ramo dokopa namba laro dokona palya nao alowa pyuo kaeyaro, leya. 9 Dopa pirunupape nambame lao dokopa yuu liti mende pyuo andanyi nembaro laronopape 10 koo pirami ramo doko pinya larono suu pingi doko kaeyaro, leya. 11 Dokona lao embame Juta wambupi Jerusaleme palaminyi dupwape randa mainya pipunu dokona dakepa oo randa mainya rapa rapa pyuo kaelyo letamo lao lamaipala koo pilyaminyi dupwa yaki nyuo kata koo papilyaminyi dupwa alowa pyuo kaena lao lamaipi, leya. 12 Lamairinyipa nakamame isingi kamba lao, Akipamo pii naramase? Namwa mona kana pokapala koo pinya suu pilyamuli pyuo pirama larami, leya Kamongome.
Wambu Dupwa Kamongo Doko Yaki Nyuo Kaeyami
13 Kamongome lao doko,
Isaraele wambu dupwame renge ama koo wakasa lapo pilyaminyi.
Renge dopale yuu liti wakale dupwana pyaka siyape lao piso sepe.
14 Yuu Lepanone kyau ama ketae dokona ase doko yuu lapo see nangese?
Yuu manda renge kyaunya ipwa guu lapala epo penge dupwa sokongese? Dopa pii nange.
15 Dupwa alowa pii napyamopape nambana wambu nakamame namba kame soo kaeyapala
mee bange kingimi wasisi dupwana lao rendamu pingi bange kiso mailyaminyi.
Nakama paraminyi kata rolae doko ranilyaminyi.
Wamba paenge kata doko yaki nyuo kaeyapala
nakama kata kyakana pelyaminyi.
16 Nakama rangena yuu andape kwao paliminyipa
kandapala giyalya giyana pyuo karalu karaminyi.
Kata lalyalana pirami dupwame kando epe nasepala
nenge longanyi nembo pakarami.
17 Nambame nambana wambu dupwa nakama mata maipala
yanda pimwainya lenge kambu dokona
porambaiye poraindeme sinjimu poo lao soo pyambuli laro.
Lapala randa andake eparamo dokopape nyisa naro,
leya Kamongome.
Wambu Dupwame Jeremaya Randa Mainya Suu Piyami
18 Sepala dokopa wambu dupwame lao, Jeremaya randa maiyuo pyao ralinyi nembamanale, leyami. Lapala dee lao purisi akali lowa mana lengepe dopa pipa dapa pipa lao mana langingi akalipi poropeta akali pii nolako lenge dusipa lao karalu kararami. Dokona lao Jeremaya banya pii laramo doko sakame naramaŋa randa maiyuo kote lamanale, leyami. 19 Dokona lao nambame ateŋa lao dokopa dopa leyo. O Kamongo, embame nambana pii kale yukupala soo dokopa nambana yanda pimwai dupwame namba randa jinya letaminyi doko soo karakape. 20 Mendeme keyange piramo dokona koo dokome yole mairaminyi kapase? Dopa piraminyi kapa ingya napyamopape rakaya palena lao kyuwa kyasingi dopale ingyuo namba randa jinya suu pyami. Wamba dokopa Kamongo embame nakama imbu singi nyii napili lapala nakamana lao langyala epeyo kande. 21 Dopa pyuo karakamyuo kande doko kaepala dakepa nambapa koo pilyaminyi dokona Kamongo embame nakamana wane wanakepe dupwa lopanyi nembapala kumanyi nembape. Yanda dupwana angi nyuo suu lape. Enda dupwana ikinyingi akalingipi kumanyi nembakamipi. Wanyane akali dupwa yandana nyuo papala kumaraminyipa andapae dupwa anga yakane kapape kisapala kumunyale. 22 Wambu yanda kambu dupwame repe repe lamai nao nakamana anda epapala andambupi nenale leto. Dopa pyuo andakare pisaraminyi dupwa pakame kumapala aa lao ipwa kaku nyinyale. Rakaya palena lao kyuwa kyasili lao namba randa jinya kone makalyaminyi. 23 Dopako pyuo nakamame namba pyao kumaselana suu pyao karaminyi doko Kamongo emba silini kande. Nakamana koo pilyaminyi doko kame sakami napipi. Koo dupwa nakama keta sinya kaeyape. Embame imbu singi nyepala dokona nakama isa palyuoko karena lao kandaro karape, leya Jeremayame.