31
Isaraele Dupwa Anda Kapu Kyuo Eparami
1 Kamongo dokome lao, Namba Anatu Isaraele rara peparaena ingyaronopa nakama nambana wambu ingyarami yuu gii doko repeta epelyamo. 2 Isaraele wambu lapo yanda pimwai keta kumarami doko wanjo epeyaminyi dupwa yuu muiyane dokona nambame sakame kumungi renge doko lasaka piyu. Dokopa nakama koo selana lao koto aiye leyaminyi dokopa 3 namba nanesale karo nakama keta nolakayo. Isaraele wambu dupwa nambame nakama yuu peparae mona retengenyili pyuo nambana mona reto retenge puu penge renge doko lasaka pyuo karalu kararo. 4 Nambame nakama dee kamba dopona pili lao andanyi pyambwaronopa nakama nakamana lakuli nyepala pyao rae maiyuo mali lyuo wamya lyuo pyakalyuo pyao kararami. 5 Yuu kyau Samaria dokona dee kamba isa girapo ee wara pirami. Pipala wambu wara piraminyi dupwame girapo ee dokona jingi lyeramuli pyuo lyuo narami. 6 Waa. Yuu kyau Eporaime dokona karo isingi akali dupwame lao lao, Yuu kyau Sayone namwana Kamongo Anatu petamo dokona monale kee larami yuu gii doko epelyamo.
7 Kamongo dokome letamo,
Wambu rara dupwana kamame andake doko Isaraeleŋe lao
lakando kenane pyalapa.
Kamongo dokome banya wambu dupwa kyawa lete nyipya.
Baame wambu pingyasi lapo petaminyi dupwa kiiramo nyipya dokona
nakamana kenane lakando pingi doko pyalapape.
8 Nambame yuu dulurename piso minyuo epo
dee yuu muu peparaena nakama nyuo malu palyaro.
Dokopa wambu lenge koope kimbu koope
enda wane paletape dee repeta manjalana piraminyipi dupwa doloma pipya role pyapeta eparami.
Nakama yuu dokona rara andake ingyuo kamba eparami.
9 Nambana wambu dupwa ee pipya kapu kyuo
ateŋa lao range lanyaronopa anda eparami.
Nambame ipwa guu dupwana iso lanyuo pao
dee nakama lukuma sasaramiŋi lao nambame kata rambe kwuasi dokona lanyuo paro.
Dokopa namba Isaraelena rakange dopale ingyaronopa
Eporaime nambana wane mupwasa ingyara.
10 Kamongo dokome lao,
Wambu rara dupwa nambana pii selapa.
Sepala yuu nanesa ipwa marenge dupwana nambana pii dupwa lamaila pupya.
Nambana Isaraele wambu wakale wakale bolomabalo lao nembeyo dupwa nyuo malu palyaro.
Palyapala mena sipisipi rapu pingi dokome banya mena sipisipi rapu pingi dopale ingyuo rapu piru.
11 Nambame Isaraele wambu dupwa manda rena lao kiiramo nyiyu.
Nyepala dee akali yuu rara ama porai wakasa dupwa keta nyiso kyawa lete nyuo piyu.
12 Nakama yuu kyau Sayone dokona epo raeme kumuo kenane pyao pisirami.
Dee nambana bange witi jingipi ipwa waenepe olipi ipwangepe
mena sipisipi dee mena bulamakaope mairunu dupwa
kando rae maiyuo kando nyerami.
Dokopa nakama palu karo pirami dupwa ee nengepe ipwa apumi nenge pipala mena mena lao andenge dopale ingyarami
dee nakama aki bange mende yano piramo kararami dupwa peparae nakama keta palira.
13 Dokopa wanake dupwa mali lyuo wamya lyuo rae mairami.
Dee akali parange alemope dupwa rae maiyuo mona pyakalyuo pyaramo kararami.
Dokopa nambame nakama mona minyarambunyi pyambwapala nakamana kumanda piso ee lao dupwa alowa pyuo mona pyakalyuo pyao rae maingi renge mairu.
Dee kondange renge paleta karenge dupwa rae mainyi pyambwaro.
14 Dopa pipala nambame purisi dupwa nenge keyange dupwa mairu.
Dee nambana wambu dupwa mende aeya naramo pisirami dupwa kando nyuo nenge piru,
lao namba Kamongo dokome lapusa pilyamo.
Kamongome Isaraele Wambu Dupwa Kando Sakame Kumuo Pyuo Nyiya
15 Kamongo dokome lao,
Yuu Orama dokona pii mende leyamo siyami.
Ee andake lao kumaralerale nyuo lao
Enda Oresolo banya wane wanakepe dupwana lao ee lao peteya.
Mona minyarambu nyisalana leyami dokopa
Banya wane wanakepe lete pisa nalyaminyiŋi dokona daa leya.
16 Embena ee letene doko kaepala
embena ee ipwange dupwa pyao nembape.
Embena wane wanakepe dupwana lao yulu pipi dokona
emba yano nyere.
Nakama nyisu petenge yuu dokona piso kapu kyuo eparami.
17 Embena lao rengya mende keyange pyakara.
Embena wane wanake dupwa kamba kapu kyuo anda eparami.
Namba, Kamongo dokome lapusa pilyamo.
18 Isaraele wambu dupwa mona randame kumuo laminyi doko namba silyu.
Kamongo namwa mena kali rae lenge mona kana pokonge dopale ingyuo kareyama.
Dopa piyamanopape namwa kamba lao nao warombo selapa lao mana langii kande.
Emba Kamongo, namwana Anatu.
Namwa emba keta lanyuo ipupi.
Dokopa kapu kyuo emba karene dokona epanya epelyamano.
19 Namwa emba mata joo peyamanopape
dee range epanya piyama.
Embame namwa randa jiinyi dokopa
namwa rangeme kyawa suu lao kondome kumuyama.
Doko namwa enye wane parange karo yulu koo dupwa piyama dokona elyayama.
20 Isaraele nakama nambana wane mona wakasa retenge ingyuo karaminyi.
Wane nambame mona angingyuo retenge dupwa nakama iki.
Yuu lapo nambame nakamana kingi dokona arome pyao dokopa
nambame nakama mona reto suu pyao lenge.
Nambana mona doko nakama keta silyamo.
Nambame nakama sakame kumuo kararo.
21 Nakama Isaraele dupwame kata angi doko kongwalu mende pipala pano wapuo retalapape.
Nakama anjukunya namba yaki nyepala neta peyaminyi kata doko dee kotalapape.
Kotapala poraiyuo suu pyalapape,
Isaraele wambu dupwa yuu taone nakama yaki nyuo peyaminyi
dupwana anda ipupwape.
22 Yuu gii akipare nakama Anatunya yulu mondo lao pyakami nao mona lamana palyuo kararamisi?
Akalimi enda rapu pyuo karengenyili pyuo endame akali rapu pira ramo ama wakale ingyuo pira.
Doko suu pyao nambame yulu enenge mende ama wakale ingyuo pipu.
Rengya Anatunya Wambu Angingyuo Palu Karo Pirami Doko
23 Isaraele wambunya Kamongo Anatu Porai Wakasa dokome lao, Nambame wambu dupwa nakamana yuu palenge dokona kamba palyuo karo pinya laro dokopa yuu Juta dokonape dee dokona yuu taone dupwanape nakama dee kamba lao,
Kamongo dokome Jerusaleme yuu kyau yapasi panda poo pyasi baa palu karenge doko
elyape keta pisinya
larami. 24 Wambu dupwa yuu Juta dokona palyuo dee taone dupwana palyuo pirami. Piraminyipa nakamana lapome ee wara pirami dee lapome sipisipi rapu pyuo pirami. 25 Dokopa wambu makarami dupwa nambame mona keyange palyinyi pyambwaro. Dee loparami dupwa nambame nenge pirunupa nao sikya piramo kararami. 26 Dokopa wambu dupwame lao, Namba luu palipu doko luu rende palyuo yongo keyange karo sipurelyo, larami, Kamongome letamo.
27 Namba Kamongo dokome leto. Isaraele wambunya yuu dokonape Juta wambunya yuu dokonape nambame mena wambupi dupwa peyaronopa kete pyao nyera leyo yuu gii doko repeta epelyamo. 28 Nambame nakamana ee dupwana yukunyi nembo nakamana taone dupwa kokwa sinyi nembo pyao lalyuo oteyo doko suu pyao nambame dee dopona pyuo minyalyalopono ingilyamo. 29 Yuu gii doko pyaka seramo dokopa wambu dupwame lao,
Endangipi rakangepe dupwame isa girapo jingi keke pingi doko nelyaminyipa
nakamana wane wanakepe dupwame keke doko nakanjilyaminyi
lenge dopa pyuo dee laa narami. 30 Dokona ingyuo wambu mendeme isa girapo jingi keke pingi doko nara ramo doko baa rangeme banya nenge pinjingi dolapona nakanju sera. Dee wambu mendaki mendaki lao baa rangena koo dokona kumara.
31 Kamongo dokome lao, Isaraele wambu pipya dee Juta wambu pipya pii enenge kana minyuo lalu lao larono yuu gii doko epelyamo. 32 Pii enenge kana minyuo lalu lao larono doko nakamana kauwanemoo pipa yuu Isipi dokona neta nyiyu dokopa nambame kii minyuo pao kana minyuo pii lalu lao leyono dopale daa. Dokona namba nakamana akalingi dopale ingyuo kareyonopape nakamame kana minyuo pii lalu lao lenge doko minyuo pyuo kara nayami. 33 Kana minyuo lalu lao lenge pii enenge nambame Isaraele wambu pipa larono doko dapale ingyara. Nambana lowa dupwa nakamana mona anda dokona pyao retapala nakamana suu pingi dokona pyao palyakaro. Dopa pipala namba nakamana Anatu angingyuo kararonopa nakama nambana wambu angingyuo parami. 34 Nakamana andare dokona yango sukusa dopa pinya dapa pinya lao kara naramioko. Yuu gii dokopa wambu kuki andakepe peparae namba soo nyerami. Nambame nakamana yulu koo dupwa nyuo kame sakamirunupa dee koo piraminyi dupwana deeko suu pyale pyale kara naro. Namba Kamongo dokome lapusa pilyamo, leya.
35 Kamongo yuu yangama korakamape dokopa neta dokome rena lao
dee kukwa dokopa kana buipi dupwame rena lao pingi.
Baame ipwa kota dupwa kasakole minyuo ranju ketae epena lao pingi.
Banya kingi Kamongo Porai Wakasa.
36 Dokona yake yuupa dolapo pinginyili pyuo kuara yangara pyuo kararamo
dusipana peparae Israele rara doko palu karalu kararami, lalu lao letamo.
37 Yuu gii mendepa akali mendeme yake doko makande pyuo
dee isa yuu dokona susa dokona koko pao soo oto pipyali doko
Anatu baame Isaraele wambu dupwa dokopa iki mata maipyali.
Doko nakama peparae koo piyaminyi dokome dopa pipyali,
Kamongo dokome lapyasa pilyamo.
38 Kamongo dokome letamo, Yuu taone Jerusaleme doko nambana ingyuo dee kamba pirami doko yuu Ananele Anda Londe dambirena piso epo Donge Kame Kambu dokona suu larami yuu gii doko repeta epelyamo. 39 Dokopa yuu make wangu doo yuu dorena palyuoko pao pao neta anda penge dorena yuu kyau Garepe dokona pao dee yuu Goa dokona palu awali lara. 40 Yuu pau lama lama wambu kumasipi dee nenge pinjingipi dupwa malu palyuo nembenge doko peparaepe dee ipwa Kitone doko yuu peparaepe pao Mena Ose Kame Kambu neta pyakaenge dorena suu lao doko nambana lenge kambunya poo pyasi ingyuo sera. Yuu taone doko dee kamba kokwa soo kwaeyo lalyuo isa paa nara.
32:1—35:19 Kiŋi Nepukatenesa baame yuu Jerusaleme pyao nyuo kareyamopa Jeremaya banya taone angi dokona yuu lapo ropo piya. Dopa pyuo lasaka pili lao Kamongome leyamuli pyuo Jerusaleme doko isa paramopape Juta range dupwa dee anda epapala elya pisi ingyuo pisirami.