1 Kamongome Mosese lamaiyuo, 2 Isaraele wambu dupwa yuu gii mupwa Anatunya kingi ketae minyalyuo lao elyambu pyuo nenge nao misi andake lao kararaminyi dokopa apa pyuo kararami lao lamaiya. 3 Yuu pakinyamange dusipa nakamana ingyuo silyamoŋo dusipana yulu pirami. Yanda ipingi dokopa imambu soo pisirama lao suu pyalapape. Yuu gii dokona yulu pii napala elyambu pyuo misi lao pisirami. Yuu anja lapona karare dokona pii mende daa. Koro petenge yuu gii doko namba Kamongona ingyuo silyamo. 4 Dakepa nambana yuu gii andake dusipana wambu peparae nyuo malu palyuo misi lena lao lao retelyo. Yuu gii angi rolae doko pyaka seramo dokopa embame wambu dupwa dopa pinya dopa pinya lao lamairi.

5 Kamongo kingi ketae pyambuo nenge Pasopa Nenge doko kana mupwa yuu gii akalisa ipisu kisima dokona neta anda penge dokopa pyaka sepa pingi. 6 Kana dokona yuu gii akalisa ipisu kingi paki dokopa borete isi pyambwa nao nenge yuu gii doko pyaka sepa pingi. Pyaka sepa piramo dokopa nakama borete isi pyambwange doko naa narami. 7 Yuu gii mupwa dokopa nakama yuu peparae yulu pinginyili pyuo pii napala nambana kingi iki suu pyao lakando pisirami. 8 Yuu yanda ipingi nyepo Anatu baa nenge kiso mairami. Yuu gii yanda ipingi dokona nakamana nenge nenge yulu dupwana mende minyanda napala misi lao mee pisirami. 9-10 Nakama Kamongome yuu jipyamo dokona epapala dokopa witi eepe wara pyuo manjo nyiyami kande dokopa wambo kyawa nyuo puu pyarami doko purisi akali dupwa mairami. 11 Koro petenge yuu gii dokopa yangamana Kamongome nakama kando rolae petaminyi lao soo nyinyaleŋe purisi dokome witi yama doko Kamongo maiyakara. 12 Yuu gii witi jeraminyi dokopako nakamame mena sipisipi kali yakane ee kana mendaki pasi yanenge kwaeyo rete pyuowape pii nange mende namba joo isarena kiso sunjura pinyi nembarami. 13 Dokopa role pyapeta nenge reto jerami dokona ingyuo palawa kilokerame lama nyuo isa olipi ipwange pipya pyasapala kiso jerami. Dokona kyaa dokome Kamongo baa soo epe sera. Dokonako ingyuo waene ipwange sanapenge kuki mendakinya (lita mendaki) minyuo konda pyuo jerami. 14 Nakamame Anatu bange ene maipa napala dokopa witi wambo wambu pingi dupwana kyakape kisasipi witimi wasisi boretepe dupwana mendepe naa narami. Naa naraminyi doko nakamana para pyasi wambu dupwame ee kana peparae dopako pyulu pyuo kararami.

15 Koro petenge yuu gii dokopa yangamana witi jingi yama mende namba jepala dokopa koro yanda ipingi ingilyape lao yaka lao kararami. 16 Koro yanda ipingi paparamopa dee yangama (yuu gii 50) dokopa namba Kamongo doko witi enenge lapo jerami. 17 Ree palu mendaki mendaki laome borete lama lama lao minyuo epo bange angi jilyamanoŋo lao soo jerami. Palawa kilokerame lama nyepala isi kuki pyambuo borete mendaki mendaki lao waso kisapala nakamame witi wambo wambu piyamo jiyaminyili pyuo namba Kamongo dokona lao jerami. 18 Bange lapo opetae konda pyuo kiso jepenge. Nakamame sipisipi yakane yanda ipingi nyepo ee kana mendaki pasipi bulamakao kali mendaki meme lamape pyao jerami. Mena mumba palyuo yanyi nyuo pisi dupwa jii narami. Bange dusipa Kamongo keta minyuo epo isareme kiso sunjura pinyi nembo jerami. Joo karo dokopa waene witipi opetae dokona konda pyuo jerami. Dokona kyaa dokome namba Kamongo dokome epe soo kararo. 19 Mena meme kali mendeme koo dupwana lao pyao kiso dee sipisipi yakane kali ee kana mendaki pasi lama nyuo pipala mona mendaki palyuo yalya kando karalana lao jerami. 20 Purisi dokome boretepe mena sipisipi yakane lamape namba Kamongo doko purisi dupwana lao jilyuŋu lao jera. Jeramo bange dusipa poo pyasi ingyuo para. 21 Yuu gii dokopa nakamana nenge nenge yulu dupwana mende minyanda napala misi lao mee pisirami. Pisiraminyi dokopa nakamana para pyasi wambu dupwame yuu muu dupwana karo yaka lao dopako pyulu pyuo pyuo kararami.

22 Nakamana ee dokona witi jingi wambu piyamopa pyakepo manjo kande dokopa kame nemba nembasa petamo dupwa petena kaeyalapape. Dee lapo suku dupwana kalyinyi palyiyami kande dupwa dee pao pyakepo manjo nyii nalapape. Pendewa wambu dee wambu wakale lapo nakamana yuunya epo petenge dupwana ingyuo sakaminya kaeyalapape. Kamongo doko nakamana Anatuŋu.

23 Kamongome Mosese kando lao, 24 Kana yanda ipingi dokona yuu gii mupwa dokopa yuu gii angingyuo imambu soo mee pisirami. Dopa pyuo pisiraminyipa bikuli pii laramo dokopa misi lala epo nyuo malu palyarami. 25 Dokopa nakamana nenge nenge yulu dupwana mendepe pii napala namba Kamongo doko nenge kiso jerami, leya.

26-27 Kamongome Mosese dopa lamaiya. Kana yanda ipingi nyepo dokona yuu gii akalisa dokopa bange lapo wambunya koo dupwana nyuo kame sakaminya lao jerami. Yuu gii dokopa nenge wasaka pyuo misi iki kingi wapambupi lakao pisipala namba Kamongo nenge kiso jerami. 28 Namba nakamana Kamongo Anatu dokome nakamana koo dupwa nyuo kame sakara lao nakama yulu pii nao mee kararami. 29 Daaŋa lapala nakama wambu dupwana mendeme yuu gii dokopa nenge nara ramo doko baa nambana wambu ingyuo kara nara. 30 Mendeme yuu gii dokona yulu pyuo lara ramo doko namba Kamongo rangeme baa pyao kumasero. 31 Mawa pii dake nakamana para pyao parami dupwane ingyara. Yuu anjale palyuo kararami dokona pii mende daa. 32 Imambu singi yuu gii angingyuo suu pyao karo yuu gii mange mendaki neta yapao sii piramo dokona piso pao yuu gii akalisana dee neta yalu piramo dokopa nenge kuki injisi mendepe naa narami, leya.

33 Kamongome Mosese kando pii dapa lao Isaraele wambu dupwa lamainya leya. 34 Kana yanda ipingi dokona yuu gii akalisa ipisu kingi paki dokopa anda kauwana nenge nenge yuu gii doko pyaka sera. Pyaka sepala yuu yanda ipingi dusipana mee sooko para. 35 Koro dakena yuu gii mupwa dokopa nakama rangena yulu yaki nyepala nyuo malu palyuo namba lakando misi lao pisirami. 36 Koro dakena yuu gii yaka lao nakamame namba nenge kiso jerami. Jepala yuu gii mange lama karo dokona kamba epo nyuo malu palyuo lakando piso nenge kiso jerami. Yuu gii doko mee misi iki lao piso yulu pii narami.

37 Yuu gii andake dusipana nakama malu palyuo piso namba lakando nenge kiso joo bange kiso sunjura pinyi nembo witipi waenepe joo mena pyao kiso joo nambame nakama yuu peparae dopa pipwape dapa pipwape lao langiyunuli pyuo piraminyi dokopa nambana kingi ketae pyambuo kararaminyisa pira. 38 Nakamame koro petenge yuu gii dokopa imambu soo nambana lao suu pyao piso bange maipa pyuope bange joo pii lalu lao lasi dupwana manda manjo paramo dupwa joope dee range lapo maso jimwali lao suu pyao kararaminyipape nakama yuu gii andake dasipa opetae poraiyuo minyuo misi lao bange joo kararami.

39 Nakamana ee dokona nenge manjo nyuo otapala dokopa kana yanda ipingi dokona yuu gii akalisa ipisu kingi paki dokopa nyuo malu palyuo yuu gii yanda ipingi nyepo nambame langiyunuli pyuo pyuo pisirami. Yuu gii dusipana yuu gii mupwa doko angingyuo imambu soo pisirami. 40 Nakamame yuu gii mupwa dokona nakamana isa jingi lyingi dupwana lyuo nyuo dee yala isa wangyape isa yoko malu mandenge wangya dupwape lakyuo nyuo pipala yuu gii yanda ipingi nyepo nakamana Kamongo Anatu dokona lenge kambu dokona baapa lao ketae nembo rae maiyuo pisirami. 41 Kana yanda ipingi dokona yuu gii yanda ipingi nyero yuu gii mupwa ingyuo nambanaŋa lao retarami. Nakamana para pyasi wambu dupwame ee kana peparae dopako pyulu pyuo pyuo parami. 42 Nakama Isaraele enda akalipi dupwa anda kauwa dupwana yuu yanda ipingi nyepo palyuo kararami. 43 Dokona lao nakamana para pyasi dupwame nakama dopa pyuo palyuo kararaminyi kandapala dokopa Kamongo dokome Isaraele wambu yuu Isipi dokona kareyaminyi dupwa nyuo lanyuo epeyamopa nakama anda kauwa dupwana palena leyaŋa lao soo nyerami. Baa nakamana Kamongo Anatu.

44 Dopako pyuo Moseseme Isaraele wambu dupwa yuu gii andake dupwa apa pyuo minyuo pyuo Kamongona kingi ketae palena lao pyuo kararami lao lamaiya.