4
Kamongome Yuu Muu Peparae Mona Kyuu Lao Sinya Lao Rapu Pira
(Ai 2:1-4)
1 Yuu gii ene eparamo dupwana
yuu kyau tembole misi anda karamo
yuu doko kamame ketaele ingyuo sera.
Seramo dokona wambu rara wakale malu mee dupwa epo kararami.
2 Dokopa nakamana wambu dupwame lao,
Kamongona yuu kyau ketae dokona mwua.
Isaraele wambunya Anatu banya tembole anda dokona mwua.
Namwa baame yulu pimili lao suu pilyamo dupwa mana langira.
Baame namwa kata parami lao rombo palyakayamo dupwana parama.
Kamongona mana pii dupwa yuu Jerusaleme piso epelyamo.
Yuu Sayone piso banya wambu dupwa pii lamailyamo.
3 Baame wambu yuu muu ree lao bange arete pyuo akema lao langa lao karaminyi dupwa nyuo kui lao karara.
Karapala wambu porai wakasa Isaraele role pyaa nao naneta karaminyi dupwape repeta dupwape kote lao yapalya yapana pira.
Dokopa nakamana wua gela dupwa amame pyao rakyuo yuu apu renge ane isa inginyi pyambwapala
kaku duwpa rakyapala kope pyakepenge bange waso pirami.
Yuu muu wakale wambu dupwa dee kamba yanda pela paa nalu nao napala
nakama yanda pela panya rapa rapape pii naramiko.
4 Wambu peparae manda rao mona seramopa
nakama rangena isa girapope pikipi ee repeta palyuo
mendena lao paka nao palyuo kararami.
Anatu Kamongo Porai Wakasa dokome pii dake lalu lao leya.
5 Wambu rara wakale wakale dupwame mendaki lao nakama rangena anatu lenge dupwa lakando pii warombo serami dokopa namwa namwana Kamongo Anatu karalu karenge dokona pii warombo soo lakando karalu kararama.
Isaraele Wambu Anjo Nyuo Peyami Dupwa Range Sukusa Eparami
6 Kamongo dokome dopa letamo. Nambame wambu randa maiyunu wambu wakale dupwame karapusi lanyuo peyaminyi yasu neyaminyi dupwa range sukusa nyuo pyasaro yuu gii doko oo epelyamo. 7 Wambu papae rambungi ingyuo anda nanesa karapyamo petaminyi dupwa nambame enenge ingyuo kanda soo wasaronopa nakama rara ama wakasa andake ingyuo para. Dokopa nambame yuu Sayone kyau dokona karo yuu gii dokopa piso kanda soo rapu piru doko pyuo karalu kararo, leya.
8 Dokopa nakama Jerusaleme wambu Anatu baa rangeme isilyamo dokona nakamana yuu taone andake mupwa wamba siyamo doko dee kamba mupwako ingyuo sera. 9 Nakama akipamo ee poraiyuo kaeyo letamisi? Akipamo nakama enda wane manjana mata pilyamo randange doko suu pyao ingi randalyamisi? Nakama dopa pilyaminyi doko nakamana kiŋi akali mende kara nao kanjili dupwa kumuo piyami dokona suu pyao ingi rando karamisi? 10 Jerusaleme wambu dupwa enda wane manjana nenge sisi pyao ee lenge doko suu pyao ee poraiyuo lalapape. Epapu nakama yuu taone andake doko yaki nyuo pao yuu mee langa pau dupwana palirami. Nakama yuu Bapilone parami. Dopa pyuo yuu dokona yanda pimwai dupwame pyalena piraminyipape Kamongo dokome nakama kiiramo nyeramo eparami. 11 Wambu rara wakale malumi nakama pyalena elyambu pilyaminyi. Nakamame lao dokopa Jerusaleme doko kokwa soo pupyali yaka lao letaminyi. Namwame yuu doko pyao kokwa seramo kandamwali yaka letaminyi. 12 Dopa laminyipape wambu rara dupwame Kamongona lao suu pyapyamo doko see nalyaminyi. Dopa pipyamopape nakama mendakinya nyuo malu palyapala randa maiyuo lisi ingyuo minyuo gisimu gasimu laro lao suu pyapyamo doko see nalyaminyi.
13 Kamongome dopa letamo. Jerusaleme wambu dupwa nakamana yanda pimwai dupwa randa nenge kyai ane isa dopale manda manjo wasanyi pyambwaro. Nakamame wambu rara malu anamasi minyinyi palyuo kararami dokona nakamana bange dupwa peparae nambana ingyuo dee Kamongo yuu muu peparaena ingyuo karamo dokona ingyara.