9
Wambu Dupwame Nakamana Koo Dupwa Polo Leyami
1 Kana mendaki dokonako yuu gii akalisa lama ipisu kisima dokopa Isaraele wambu dupwa epo mendakinya pisipala nakamana koo dupwana lao sakame kumuo nenge naa nao peteyami. 2 Nakama yuu wakale range wambu dupwa liti pipala kareyami. Dopa pipala dokopa kumanda piso wapungi komau wapuo pee awaipi pyapala nakamana koope dee rora ambasupi dupwana yulu koo piyami dupwa kanda soo polo leyami. 3 Leyaminyi dokopa wambu lapome Anatunya mawa pii dupwa keloke gii rema nembo yaka leyami. Lapala dokopa dee keloke gii remako nembo nakamana koo dupwa polo lao dee nakamana Kamongo Anatu lakando kareyami.
4 Jesuamoo Bani Katemele Sepanaya Buni Serepaya Bani dee Kenanimoo dupwa peparae Lipae rara dokona kareyami. Rate kuki dokona karo nakamana Kamongo Anatu lao pii ketae palyuo ateŋa leyami.
5 Lipae rara dupwa ateŋa lao piyami dokona wambu dupwa dopako pyuo misi lao pinya leyami. Jesuamoo Katemele Bani Asapenaya Serepaya Otaya Sepanaya Petatayamoo dusipame lao,
Roya karapala nakamana Kamongo Anatunya lao kingi lakandalapape.
Baa yuu peparae lakando karalu karalapape.
Karapala mee akalimi ingyuo embena kingi kapa lakanda nalyaminyipape
Kamongo embena kingi neta renge doko wambu peparaeme angi ingyuo lakandenale.
Ateŋa Pyao Koo Dupwa Polo Leyami
6 Isaraele wambu dupwame ateŋa dake piyami.
Kamongo doko embako iki Kamongo ingilyamo.
Embame yakepe yakena buipi pyuo wasii.
Embame yuupi ipwa kotape bange silyamo dupwa peparaepe embame pyuo wasii.
Bange dupwa peparae embame letena renge maii.
Aŋala yake panda karaminyi dupwame emba lao pangu soo lakandenge.
7 Emba Kamongo Anatu, embame Aporame rombo palyii.
Embame baa yuu Bapilone yuu kuki Ua doko yaki nyuo lanyuo pee.
Papala embame banya kingi doko alowa pyuo Aporakame lee.
8 Embena yulu dokona yaki nyii nao mondo lao pyakao kareyamo kandee.
Dokona embame baapa kando lao kana minyuo lalu lao lee.
Embame yuu Kenanepe
Iti rangepe Amo rangepe Perasi rangepe Jepusi rangepe Gukase range dupwa palenge dupwanape banya ree palu dupwa palirami lao
Mairu lao doko lalu lao leepya
Embame lenge nyili pyuo pingi dokona embena lalu lao lenge doko kaeya nao minyingi.
9 Namwana rora ambasupi dupwa apa pyuo yuu Isipi dokona randa nyiyami doko kandee kande.
Wambu dupwame Ipwa Kota Pete Kone lenge marenge dokona karo nyisala ipu leyami doko emba sii.
10 Embena wambu dupwa randa maiyami doko emba sepala
Embame yulu pii nange yamarangaramili dupwa kiŋi Peraope banya akali mupwape dee banya yuu range wambupi keta randa maiyuo pii.
Dopa pyuo anamasi minyii dokona embena kingi doko andake ingyuo silyamo.
11 Ipwa kota dokona sukusa embena wambu dupwa pena lapala kata lanyuo peenesa oo lasi siyamo dokona epeyami.
Peteta epeyami dupwa embame ipwa kota kiwa dokona kana nyuo yalyalamuli pyuo nyuo yalu piipya.
12 Korakama dokopa kopa soo lanyuo pao
kukwa dokopa isare rao lanyuo pao piipya.
13 Yake dokona karo epo yuu Sainai kyau dokona embena wambu dupwa pii lamaii.
Mawa pii keyange dupwa maiyuo mana pii rolae dupwa lamaiyuo pii.
14 Juu wambunya koro petenge yuu gii poo pyasi dokona waso karena lao mana lamaiyuo dee embena kendemande Mosese keta embena mawa pii dupwa maiyuo pii.
15 Wambu dupwa lopayami dokopa yake dokona piso borete maiyuo dee ipwa nanayami dokopa kana dokona ipwa guu lanyi peyakamyuo piipya.
Embame yuu mairu lao lalu lao lene doko nyuo kalyinya lao lamaii.
16 Dopa piyamopape namwana rora ambasu dupwame nakama range andanyi nembo
mona kana pokapala embena mawa pii dupwa kando kamba lao kareyami.
17 Embena yulu piinyi dupwa nyuo kame sepala kamba leyami.
Embame yulu pii napengele lapo pii kande dupwa kame sepala kamba leyami.
Nakama kyaŋe soo karo akali mupwa mende Isipi dokona kapu kyuo wambu dupwa kendemande ingyuo karena lao dee lanyuo pena lao rangeme rombo palyiyami.
Dopa piyamopape emba Anatu dokome nyuo kame singi.
Emba ipyapala mona keyange palenge.
Emba mona reto karenge.
Emba waiya lao imbwa nange.
Embena kondo sakange kumungi renge doko kamame andake.
Embame nakama yaki nyii nange.
18 Wambu dupwame kingimi mena bulamakao yale mende pyuo wasapala
doko namwa Isipi karo nyuo lanyuo epeya dokoŋo leyami.
Yuu malu mee leyaminyi dokopa Kamongo emba isipyao leyami.
19 Dopa leyaminyipape embena kondo sakame kumungi renge doko kamame wakasa
dokome yuu muiyane dokona embame wambu dupwa kyawa yaki nyuo kaeya naye.
Kukwa korakamape kata lasaka piinyi doko isare kopape dolapo nyisa nyii naye.
20 Emba keta renge keyange palenge dokome nakama apa pyuo pirami dokona lao mana lamaiyuo
dee nenge myanape ipwape nena lao maiyuo kareya.
21 Ee kana akalisa kisima dusipana yuu muiyane dokona epo kareyami dokopa nenge naramili dupwa maii.
Nakamana komau dupwa kangu paa nao
dee nakamana kimbu dupwa randa pyuo rondo laa nao piya.
22 Embame wambu rarape yuu isingipi dee nakamana yuu range dokona repeta singi yuupi anamasi minyinya lee kande
kiŋi Sayone banya iso karenge yuu doko Esepone anamasi minyiyami.
Dee kiŋi Okona yuu Besane doko opetaeko anamasi minyiyamiko.
23 Embame akali wai kisinyipa yakena bui karapyamo mendeme yaka laa nalyaminyi dopale inginyi pyambii.
Nakamana rora ambasu dupwa yuu doko mairunupa palirami lao lalu lao leene dokona
nakamame anamasi minyuo epo palena lee.
24 Nakamame yuu Kenane doko pyao isa palyiyami.
Embame wambu yuu dokona paleyami dupwa pyao anamasi minyii.
Minyapala dokopa wambu dupwape dee kiŋi dupwape yuu Kenane kareyaminyi dupwa nakama keta maipala pyalana suu pilyaminyili pyuo mee pinya lapala kaeyo.
25 Yuu taone andake kana kame porai dokome minyaro karengepe yuu amenge pingipi anda bange keyange kana malu parali dupwa pale palepe ipwa yuwale kyasi sinya singipi olipi isape jingi lyingi isa lapope dee isa girapo ee dupwape peparae embena wambu dupwame nyiyami.
Nakama nalana suu piyami dupwa mee napala ando rondo lasi ingiyami.
Embame bange keyange maingi dupwana lao moname nyiyami.
26 Dopa piinyipape embena wambu dupwame emba kando kamba lao embena Mawa Pii dupwa yalo kareyami.
Nakama emba keta kapu kyuo epena lao repe repe lao kareyami poropeta akali dupwa pyao kumakayami.
Nakamame emba kando yuu yangama yangama lao kilya kando lao kareyami.
27 Dokona embame nakamana yanda pimwai dupwame nakama anamasi minyapala iso karena lao pii.
Nakamana randa nyepala emba nyisapili lao kee leyami dokopa
embame yake dokona piso nakamana pii sepala nyiso karee.
Embame kondo sakame kumungi dokome nakamana nyisu petenge dupwa keta kiiramo nyeramiŋi lao akali mupwa dupwa mai.
28 Mona kyuu lao siyamo kareyami dokopa dee yulu koo dupwa pyuoko kareyami.
Dopa piyaminyisa nakamana yanda pimwai dupwame dee kamba nyuo anamasi minyinya lao kata maipala kaeye.
Dopa piinyi dokopa nakamana koo dupwa polo lao dee emba nyisa lao piso siyami dokopa
yake panda karo sepala embena kondo sakame kumungi renge dokome deeko kyawa lete nyuo karee.
29 Embena mana pii doko rape rape lao pinya lapala repe repe lamaiyuo karee.
Akali mendeme embena Mawa Pii minyuo karenge doko lete para kata singi.
Dopa piyamopape wambu dupwa moŋo kyaŋe siyami dokome embena Mawa Pii dupwa yaki nyakao mata maiyami.
Ayemba suu pipala mona kana poko emba letenyili pyuo pii narama daa lao kareyami.
30 Ee kana peparae embame wambu dupwa pipya imbu singi nyii nao waa waa lao repe repe lamaiyuo karee.
Embena poropeta akali dupwa keta nakama pii lamainyipa embena wambu dupwa kale poeyasa see nayami.
Dokona lao wambu yuu lili wakale lapome embena wambu dupwa iso karena lao panda maiyuo kaeye.
31 Dopa piyamopape embena kondo sakame kumungi renge doko kamame wakasa ingiyasa nakama pyao kokwa soo koo keta palya nana lao yaki nyii naye.
Emba ama sakame kumungi Anatu dokome ipyuo mona keyange palyuo dopa pyuo nyiso karenge.
32 Anatu, Namwana Anatu doko emba kamame wakasa.
Emba ama porainya renge palenge doko wambu soo pako karaminyi.
Embena pii lalu lao lao kana minyingi doko emba yaki nyii nange.
Asiria kiŋi dupwame namwa piyaminyi yuu gii dokona piso pao
epapu dokona namwa randa andake nyuo karamano.
Namwana kiŋi dupwape namwana lita dupwape namwana purisi dupwape namwana poropeta dupwape namwana rora ambasu dupwape dee namwana wambu peparaepe randa nyuo kareyami.
Dokona namwa randa kuki lama nyiyamape lao suu pyape.
33 Namwa koo pingi dokopa embame namwa rolae pyuo pyalana pyuo randa jingi.
Dopa pyuo namwa koo pilyamanopape embame namwa yaki nyii nange.
34 Namwana rora ambasupi namwana kiŋipi namwana litape dee purisipi dupwa peparaeme embena Mawa Pii doko minya nayami.
Nakamame embena repe repe piipi embena pinya lao pii poraiyuo ingyuo lengepe dupwa see nayami.
35 Embame nakama elyape keta pisi dokopa kiŋi dupwame embena wambu dupwa mondo lao iso kareyami.
Embame yuu amenge kapape paleta pee lasi doko mainyipape koo dupwa wanja nayami dokome embena yulu pii nayami.
36 Dakepa doko embame namwa yuu amengeko nenge kakana pingi jiinyi dokona epapu kendemande ingyuo karamano.
37 Lao namwa koo piyamano dokome embame kiŋi dupwa namwa isinya lao jiinyisa yuunya nenge jingi wara piyama dupwa nakama keta pelyamo.
Namwana mena dee namwape nakama mende pinya suu pyaminyili pyuo piminyisa randa nyuo mona rumbingi karamano.
Wambu Dupwame Dopa Pirama Lao Lao Palyapala Pyao Reteyami
38 Yulu dupwa peparae piyamo dokona namwa Juu wambu dupwa epapu namwa pii kinyi mendakinya palyuo lapala pepa pyao retelyamano. Dokona namwana litape namwana Lipae rarape namwana purisipi dupwame nakamana kingi pyao make retelyaminyi.
10:1—13:31 Wambumi kana minyuo lalu lao lao kingi reteyaminyi kingi dupwa pyasi palamo. Dee apa pyuo wambu kana minyuo lalu lao lengenyili pyuo kararami pii palamo (rombo 10). Wambu dupwa yuu Jerusalemepe yuu Juta taone wakale dupwanape wambu akipare kareyami. Dee purisipi Lipaepe dupwana kingi pyasi palamo. Dee kana kame pyuo otapala misi leyaminyi dokope apa pyuo tembole anda dokona misi larami pii dupwape dee yulu lapo Niyamaya baa alowa piyamo dupwape rombo 11-13 dokona pyasi palamo.