1 Ee kana enenge dokopa Isaraele wambu peparae dupwa yuu muiyane Sene lenge dokona epapala yuu Katese dokona paleyami. Paleyaminyi dokona enda Miriame baa kumuyasa malu piyami.

2 Dokopa nakama malu palyuo paleyaminyi yuu dokona ipwa epa nayamosa wambu dupwame mona mendare palyuo Mosese Eronepa kando mumu leyami. 3 Mumu lao lao, Namwana yangonge dupwa Kamongona komau anda lenge kambusa dopa pyuo namwa kukuyamali doko kapa ingiyali, leyami. 4 Akipamo embame namwa yuu muiyane dakena lanyuo epeese? Namwana mena dupwa pipya kumaramiŋi lao dae lanyuo epeese? 5 Akipamo embame namwa yuu Isipi yaki nyuo yuu koo mende anda nange dakena lanyuo epeese? Isa pikipi isa girapope isa pomekanetepe jingi dupwa yuu dakena kara nao dee kamame ipwa kuki mendepe epa nao pingi lamo, leyami. 6 Leyaminyi dokopa Mosese Eronepa wambu malu palyuo peteyaminyi dupwa yaki nyepala Kamongona komau anda kambu konandowame dokona pao kareyambi. Karapala wapambu pii pyapala pangu siyambinyi dokopa Kamongona yanga paupau lenge renge doko pano epeyamo kandeyambi.

7 Dokopa Kamongome Mosese pii lamaiyuo, 8 Pangali isa Kana Minyuo Lalu Lao Lenge Pii Palenge Bokote lenge kambusa silyamo doko nyepala embapa Eronepa wambu peparae epena lao nyuo malu palyalapape. Dopa pipala nakamana lenge kambu dokona karo kana doo dumu petamo doko kando pii lamaipi. Dopa pirinyi dokopa ipwa potemo epara. Dopa pipala kanana ipwa potemo eparamo doko wambupi nakamana mena dupwape narami. 9 Kamongome leyamuli pyuo papala Moseseme pangali doko nyiya.

10 Baapa Eronepa kana peteyamo lenge kambusa dokona wambu peparae nyuo malu palyapala Moseseme lao, Nakama mona kana pokonge dupwa selapape. Nambwame kana dakena nakamana ipwa epena lao nyakarambase? leya. 11 Lapala Moseseme banya pangali isa doko minyalyapala yuu lama lao kana dokona piya. Piyamo dokopa ipwa ama soo kaeyo malu mee epeyamopa mena wambupi peparaeme neyami.

12 Dopa pyuo neyaminyipape Kamongome Mosese Eronepa lamaiyuo, Kamongome Isaraele wambu keta banya porai renge poo pyasi kapa lasaka pira lao soo nyii nambinyi dokona nambame nakamba yuu jero lalu lao leyono dokona wambu dupwa lanyuo paa narambi, leya.

13 Isaraele wambu dupwame Kamongo kando mumu lao kareyaminyipa Kamongo baa poo pyasinyi lao nakama lasaka piyamo yuu doko Meripa lenge.

14 Mosese baa yuu Katese karo akali lapo pii minyuo yuu Itome kiŋi doko lamaila pena leya. Papala nakamame lao, Pii dake embena akali yango Isaraele rara dupwa peyami. Namwa randa neyamano dupwa emba silini, leyami. 15 Namwana rora ambasu dupwa yuu Isipi dokona papala ee kana malu nembo kareyami. Kareyaminyi dokopa Isipi wambu dupwame nakamape namwape kopetame pyuo randa jiyami. 16 Dokopa Kamongome namwa nyisinya lao baa kande ee lao kareyama. Ee lao kareyamano doko sepala yuu Isipi yaki nyuo lanyuo pena lao banya aŋala mende peya. Epapu namwa yuu taone Katese lenge embena yuu liti dokona karamana. 17 Embena yuu dokona sukusa kata pupwa, lape. Namwape namwana mena bulumakao dupwape kata yaki nyuo wangu embena ee dupwanape isa girapo ee dupwanape paa narama. Paa napala embena ipwa kamuo nenge yuwale dupwana kamuo naope pii narama. Namwa kata andake dokonako pao karo pao embena yuu doko yaki nyerama, leyami.

18 Dopa leyaminyipape Itome wambu dupwame nakama isingi lamaiyami. Namwana yuu dokona nakama kapa pyuo epo paa narami. Nakama panya lao eparami ramo namwame nyisa epapala nakama pyarama.

19 Dokopa Isaraele wambu dupwame lao namwa kata andake dokona iki parama. Dokopa namwape namwana mena dupwamepe nakamana ipwa dupwana mende narama ramo namwame ropo pyakarama. Namwame mee kata dokona sukusa panya suu pilyamano, leyami.

20 Dopa leyaminyipape Itome wambu dupwame dee kamba lao, Nakama dakena epa narami lapala nakamape yanda singi porai malu mee dupwamepe Isaraele wambu dupwa pyala epeyami. 21 Itome wambu dupwame nakamana yuu dokona Isaraele wambu dupwa epo paa narami leyaminyisa Isaraele wambu dupwa kapu kyuo kata wakalena peyami.

22 Isaraele wambu dupwa peparae yuu Katese yaki nyuo yuu kyau Ori lenge yuu Itome liti dokona singi dokona epo pyaka siyami. 23 Dokona Kamongome Mosese Eronepa lamaiyuo lao, 24 Nambame Isaraele wambu yuu mairu lao lalu lao leyo dokona Erone baa kapa paa nara. Yuu Meripa dokona nambame pii langiyunuli pyuo pii nayambi dokona baa kumara. 25-26 Dokona Eronepa banya ikinyingi Eliasapa lanyuo yuu kyau Ori dokona papala Eronena purisi komau wapungi doko kolo nyuo Eliasa wapwakamiri. Erone baa dokona kumara, leya. 27 Kamongome leyamuli pyuo Moseseme piya. Nakama wambu peparae malu palyuo kareyaminyi lenge kambu dokona yuu kyau Ori lenge dokona pulyuo peyami. 28 Dokopa Moseseme Eronena purisi komau dupwa roko nyepala Eliasa wapwakamiya. Wapwakamiyamo dokopa Erone yuu kyau dokona kumuya. Dopa pyuo kumuyamo dokopa Mosese Eliasapa lupyuo epeyambi. 29 Epeyambinyi dokopa wambu peparaeme Erone kumapya lamo leyambinyi doko siyami. Sepala nakama peparae yuu akalisa rema baa kondo lao kumanda peteyami.