1 Nambana Anatu nambana Anatu, akipamo namba kame soo yaki nyipisi?

Namba saka napala nyisapili lao ee lapu.

Lapunupape emba nyisala epa napi kandapi.

2 Nambana Anatu, korakama dokopa emba nyisapili lao kee lapu.

Lapunupape pii isu pii napi.

Namba kukwa dokopa kee laoko karo

luu sikya sikya pilyamo.

3 Dopa pipunupape emba poo pyasi karenge doko

kiŋi karapinyisa emba lakandelyaminyi.

4 Namwanakauwange rora ambasupi dupwame emba keta pyamalyapala kareyami.

Dopa pyuo kareyaminyisa embame akali dupwa nyiso pyuo nyii kande.

5 Nakamaemba kingi lapala dokopa koo keta palirami kata doko wanjiyami.

Nakama emba kapa ingingi lao suu piyaminyi dokopa nakamana mona kenda nayami.

6 Dopa piyamopape namba epapu wambu ingya nalyamo.

Namba mee kau kui dopale.

Wambu dupwame namba kando awa nao giyalya giyana pyuo karaminyi.

7 Wambu namba kandaminyi dupwame kando giyuo karaminyi.

Nakama kambu kelo wale pyuo ayemba wangaro wangaro pyuo lao karaminyi.

8 Nakamame lao, Emba Kamongo keta pyamalyapala karee kande.

Akipamo baame emba pyuo nyii nalyase?

Kamongome emba kando awuara ramo doko

akipamo nyisa nalyase? letaminyi.

9 Namba mandeyaminyi dokopa embame mondo lao rapu pyuo nyii.

Dee dopako pyuo namba nyaŋa siyu dokopa embame namba kyawa minyuo kareepya.

10 Namba mandeyami gii dokopa piso embena kingi kapena siyunupa

emba nambana Anatu ingyuo karee.

11 Randa dupwa repeta ipyamopa

mendeme namba nyisarami ingya nalyamo dokona

embame namba yaki nyepala nanesa kara napipi.

12 Nyisu petenge akali malu mee mena bulamakao kalyuwa dopale ingyuo karapala

namba nyuo sukusa pyambwasi karaminyi karo.

Yuu Besane bulamakao kalyuwa wambu pingi karenge dopale karaminyi.

13 Nakama mena laene ingyuo nenge kata ŋaa lapala

gasimwa poko namba gala lapala pyao nao pilyinyi nembalana pyuo karaminyi.

14 Dopa piminyi dokopa nambana porainya renge doko pao otelyamo.

Ipwayuunya kulimbuo penge dopale ingyuo pupya.

Nambana kuli peparae bolombalo lapya.

Nambana porainya renge doko mena kapa sungu pele letamo.

15 Nambana pendoko doko yuu sinjimu yando nasi ingyuo oo lapya.

Dee nambana kekenge yando napala neketaiye dokona parapya.

Embame namba sinjimu dokona soo kumalale lao yaki nyuo kaeyapi.

16 Akali koopingi malumi epo karo namba kako pilyaminyi.

Nakamame suwa dopale ingyuowua lao namba repeta epelyaminyi.

Nakamame nambana kimbupi dupwa nao rokwanyi nembelyaminyi.

17 Nambana kuli dupwa peparae kapa kandarami ingilyamo.

Nambana nyisu petenge dupwame namba lenge poraiyuo rapala kanda yoyo letaminyi.

18 Nakamame nambana komau dupwa nyepala apimi nyera lao reto lake pyuo petaminyi.

19 Nambana Kamongo, namba yaki nyepala wakale kara napipi.

Embame iliki maliki laa napala aopa epo namba nenge rekya lao nyepe.

20 Namba wua kakupi nenge dupwana kyawa minyuo

suwa dupwa keta lete nyuo pipi.

21 Mena laene dupwame namba naa nana lao pyuo nyepe.

Dee mena bulamakao kalyuwa rae lenge dupwame namba nala eparaminyi dokopa namba range kapa nyisaro ingya nalyamo.

22 Emba dopa pilinyiŋi lao nambana wambu dupwa misilarami dokopa

kenane embena lao ranaisa poko pyaro ingilyamo.

23 Isaraele wambu Jekopena para pyasi Kamongona kendemande dupwa

nakamame Anatunya kingi doko ketae pyambuo

kingi wapambupi lakao baa lakando pisipwape.

24 Baame wambu pendewa dupwa yaki nyuo kaeya nange. Nakama randa nyilyaminyi dupwa kandapala meŋe lao kaengende daa.

Baame nakama mata mai nange.

Mata mai napala nyisinya lenge dokopa yano pyakamingi.

25 Mitiŋi andake lao pisirami dokopanambame embena yulu piinyi dupwana kingi lakando laro ingilyamo.

Dopa pyuo wambu embapa kingi wapambupi lakao lakandelyaminyi dupwana lenge kambu dokona

bange kiso jero lao lalu lao lasi dupwa kiso jero ingilyamo.

26 Pendewa dupwa nenge nalana suu pyarami dupwa nakonda pirami.

Wambu Kamongo keta eparami dupwa baa lakandarami ingilyamo.

Dopa pyuo nakama yuu dokona yulu pyuo nenge nao kapa palyuo karalu karena.

27 Dopa pyuo yuu muu peparaeme liti kuki mendepe neta paa nao dee kone pupuripi peparaemepe

Kamongo lao suu pyao loma soo kingi wapambupi lakao misi larami ingilyamo.

28 Kamongo baa kiŋi ingyuo karamo dokome

yuu muu dupwa iso karamo.

29 Moŋokyaŋe singi wambu dupwa baa mupwa lao pangu soo

dee mendalipi karo kana ingyuo isa lumbi lyeraminde daa dupwa opetaeme baa keta pangu soo mona maiyuo kararami.

30 Rengyana ando kararaminyi dupwame banya yulu pyakamirami.

Akali dupwame Kamongona lao enakana manjirami dupwa lamairami ingilyamo.

31 Kamongome banya wambu dupwa nyiso kyawa lete nyiyaŋa lao laraminyi doko

wambu ene manjipa nalyaminyi dupwa manjirami dokopa serami.