1 Pii dake wambu piso palyuo pelene dupwame kale yukupala selapa.

2 Pii serami dupwa kamongo pendewape

dee kuki epengepe peparaeme soo nyuoko pipwape.

3 Nambame pii suu pyaro dupwa koko pao suu pyaro.

Pyapala soo nyinginya renge doko laro.

4 Dopa pyuo nambame kongwalu pii pyasi doko soo gisalena sokondali pyuo karapala

renge doko rambyalu lao dokopa dokona polo larono serami.

5 Yanda pimwai yulu koo paleta dupwame namba nyuo sukusa palyaraminyi dokopa

randa eparamopa namba pakame kumuo kara naro.

6 Wambu koo pingi mendeme isa bangena mona yukupala karara dokome mena bangepe dupwana iki range dokona ketae pyambuli lao lao kararasa pira dokona

namba randa eparamo dokopa pakame kumuo kara naro.

7 Wambumi mende koo dupwana lao baa range kapa kiiramo nyii nara.

Baa rangeme Anatu keta bange mendeme ropo pyapala lete karara kapa pii nara.

8 Renge doko akalinya koo renge dupwana bangeme ropo pyaramo dokona manda manja napala andake ingyuo pelyamo.

Banya minyuo epo ropo pilyamo dupwame

9 baa malu anda pali nao lete eparande daa.

Dee dopako pyuo baa lete renge mairamo kararandedaa.

10 Akali mona palenge palya nangepe dee kopetame pingipi pii nangepe

peparae kumuo penge doko kandelyamano.

Nakamana mena bangepe dupwa para pyaramo dupwa keta reto kumuo penge.

11 Dakepa yuu andape range sipyamo piso karo piminyipape rengya nakama malu pirami.

Mare dokopa malu anda doko nakamana anda yuupi ingyalu ingyuo ingyaralyamo.

Nakama angingyuo dokona palyuo otarami ingyara.

12 Akalinya kamongonge renge dokome baa kuma nana lao kyawa minyarande daa.

Baa mee mena suwape ingyuo kumuo para ingilyamo.

13 Wambu rangena suupingi dokona iki pyamalyapala karaminyi dupwa keta aki rengende pilyamo lao kando karamanale.

Mena bangepena angingyuo minyaro karaminyi dupwasa leto.

14 Nakama mena sipisipi kumuli lapa pirami.

Piraminyipa kumunginya renge dokome nakamana mena sipisipi rapu akali ingyaro karara.

Wambu dasipa kumapala nakamana yanenge kakapangepe

nakama rangena anda nanesa karo kumunginya yuu dokona palyuo waiya lao rumbyuo kwaeyarami.

Kwaeyaraminyipa rolae pingi dupwame nakama anamasi minyarami.

15 Dopa piramopape Anatumi namba kyawa minyara.

Baame namba kumungi rengena porai dokona piso kingi rekya lao nyera ingilyamo.

16 Akali dupwa kamongoyami kande dokopape dee nakamana mena bangepe dupwame kamame andakiya kandedokopa

mona kendame kumuo kara napipi.

17 Baa kumaramo dokopa minyuo paowape

dee kyangali suku suku retapala malu anda palirande daa.

18 Akali baame yulu wakasa mora piso pingi lao suu pyao karo

isa yulu dupwana kamongo ingyuo paramosa lakandaraminyipape

19 kumungi gii dokopa imbwange kauwangepe kumuo penge kata dokona puu pao para ingingi.

Yuu iminjaro karalu karo karenge dokona para.

20 Akalinya kamongonge renge dokome baa kuma nana lao kyawa minyarande daa.

Baamee mena suwape kumuli lara.