1 Anatu, embena rolaena renge dokona palyuo kote lalenyili pyuo lena lao kiŋi baa mana lamaipi.

Dokopa emba range katalunji nembo pii lenge dopale lamairi.

2 Dokopa embena wambu dupwa pipya pii katalunjidokona lao

dee pendewa dupwa pipya gapomane yulu angi rolae dokona palyuo iso karara.

3 Yuu dokona kapa palyuo nao karapala

rolaenarenge doko soo nyisi kararami.

4 Dopa piramopa kiŋi baame mee pendewa wambu dupwa pipya kote kata angi dokona pao lena.

Dopa pyuo nyisapenge kata dupwana nyiso

dee ingi pungipi nao wambu pipya moŋo maiyuo karenge dupwa isa nembo karenale.

5 Embena wambudupwame emba neta doko rao karalu karenge doko suu pyao kingi wapambupi lakao embena kingi lakando karalu karenale.

Kana doko rao karalu karara doko suupyao emba lakando puu pena.

6 Kiŋi baa ee yuupinya apunda kulimbwanyi peyalamuli pyuope

dee apunda pura pura pyao epo yuu pyuku lanyi pyambwalamuli pyuo karena.

7 Rolaena renge doko baa kararamo gii dusipana mondo lao ando paramopa

kukwa kana rao karalu karo kararamo dupwana banya wambu dupwa kapa palyuo nao petenale.

8 Banya isingi yulu doko ipwa kota mendasa piso pao kota pete mendena suu lao

dee ipwa Yuporisa lenge dokona piso pao yuu wangu dolapona kapa kapa pira.

9 Dokopa yuu muiyanena palenge wambu dupwame baa mupwaŋa lao pongwa nao banya kingi lakandarami.

Banya yanda pimwai dupwame isa yuu sinjimu dupwana yuu paro oko soo soo pirami.

10 Dopa pyuo yuu Sepene range kiŋipi dee yuu ipwa kota sukusa singi dupwana kiŋipi dupwame baa bange kipungi ingyuo maiyala eparaminyipa

yuu Arapia rangepe yuu Itiopia rangepe dupwana kiŋi dupwame dopako pirami.

11 Dopa pyuo kiŋi peparaeme baa mupwa lao mona mairaminyipa

yuu muu dupwana wambu peparaeme banya yulu pyakamyuo pirami.

12 Baame pendewa wambupi bange aeya nange wambupi dee wambu mendeme nyuo sukusa pyambwa nangepe dupwame

baa kyakale larami dupwa kyawa minyara.

13 Baame poraya nange dupwape pendewape dupwa sakame kumuo karo

dee bange yano piramo kararami dupwa kyawa minyuo karenge.

14 Nakama banya mona nyingi bange angi dopale ingyarasa dokona

nakama pipya pyalana pingi wambu dupwa keta nenge rekya lao nyingi.

15 Kiŋi baa karo yaku nao kumunya.

Baa yuu Arapia range wambumi kana golo maiyuo karena.

Banya lao ateŋa doko lapa lapa pyuo sakaminya.

Anatumi kalya pyuo nembenge renge doko baa keta palipa palipa pyuo pena.

16 Yuu dokona nenge witi jingipi kakana pyakaminya.

Yuu kyauli dupwa ee nengepeme pana naramopa

yuu Lepanone dokona nenge kakana pipyamo nelyaminyi dopaleko inginya.

Yuu taone andake dupwanawambu wai kiso simbunyi pyale laramopa

yangi kuku alemakai pokwalipi ingyuo pena.

17 Banya kingi doko kame see nao suu pyale pyale karena.

Banya karenge arome pii doko neta rao karalu karenge dopale ingyuo pena.

Yuu muu ree lao baa lakandenale.

Wambu peparaeme kiŋidoko rae maiyuo karapyali lao

Anatumi nakamba elyape keta pisinya lao pirami.

18 Isaraele wambunya Kamongo Anatu dokona kingi doko iki lakando palena.

Baame yeelyo yulu elyape ingyuo dapwa pilyamo.

19 Banya kingi neta renge ingyuo karamo doko lakando karalu kararaminyipa

banya neta renge yulu dokome yuu pinjingi dolapona kapa kapa pinyale.

20 Dakena epo akali Jesena ikinyingi Dapitimi ateŋa pii lao epo lumwa piya.