1 Kamongo embame namba mondo lao kando soo kaeyapi kandapi.

2 Namba pilyu dupwa peparae embame silini.

Emba kamame nanesa karapalape nambame suu pilyu dupwa soo gisiliniko.

3 Nambame yulu angi pilipi panda mee luu palu silini lao kando silini.

Dee yulu peparae pipunu dupwa embame silini.

4 Kamame pii ene laroli dupwa

dopa larelyamo lao soo oto karene.

5 Namba karapunu pisipunu palipunu dusipana embako karo kapa pilini.

Embena porainya renge dokome namba kyawa minyuo karene.

6 Embame namba apiyakale lao soo gisapinyi doko

nambame soo nyero ingya nalyamo.

7 Nambame embena imambu dokome silini doko yuu anda mende nee pilyandena papala kanda nalase lao parose?

Emba anjalapona kara napindena dokona pao yalu pirusi?

8 Yake panda pulyuo paroramo dokopa emba dokona karareko ingilyamo.

Dee kumuo yuu koko paliru ramo dokopa emba dokona karareko ingilyamo.

9 Namba neta pyakaenge dorena ingyuo yalu pyuo paronopape

dee neta yalyingi dorena nanesale ingyuo paronopape

10 embame dokonako karo namba nyiso

lanyuo papiri ingilyamo.

11 Nambame iminjingi dokome namba karo dokona nyuo yalu pinya laope

dee yangenge doko namba karo dokona iminjinya laope larolapuli kapa lapuli.

12 Dopa lapuliko doŋo iminjingi doko emba keta iminja nao

mee korakama ingyaro karamo.

Iminjingi dokope yangenge dokope emba keta mende ingya nao mee yangenge dopaleko ingilyamo.

13 Nambana yanenge dokona mende embame wasa naende kara nalyamo

Embame namba anyinya rombanda dokona kimbu sera sera pyuo inginyi retee.

14 Embena kingi lakandapenge dokoko nambame lakandelyo.

Embame yulu peparae pilini dupwa wambumi kanda nange keyange wakasa dupwa pilini.

Dupwa nambana mona dokona soo manjo karo.

15 Nambana anyinya rombanda dokona nee pyuo andeyonopa

kuli dupwa kimbu sera sera piyamo dokopa

embame dokona palene lao soo karee.

16 Namba manjapa nayamopa embame kando sii.

Namba ene ando karo yuu gii kararole dupwa

wambo embame sepala

embena buku dokona pyao retee.

17 O Anatu, embena suu pingi dupwa nambame randa koo nao soo nyerolyamo.

Embena suu pingi dupwa mee kuki pyuo ingya nalyamo.

18 Nambame yakalao kandaro ramo dokopa ipwa pota kee kana dupwa nyuo isa palyili laro kararami.

Namba lenge rapala dokopa emba role pyao mee kararoko.

19 O Anatu, nambame yulu koo pingi dupwa pyapili lao suu pilyu.

Reke reke karo randa jingi akali dupwame namba wakale karalase lao kaeyamili lao suu pilyu.

20 Embena lao pii koo letaminyi.

Embena kingi doko randa joo mokwalipi letaminyi.

21 O Kamongo, emba epe kanda nami dupwa nakama nambame epe kanda nalyo.

Dee emba kilya kandaminyi dupwa nakama nambame kilya kando karoko.

22 Nambame nakama imbumi kumuo

nambana yanda pimwaiŋi lao soo karo.

23 Embamenamba makande pyuo kandapala dopa pyuo suu pilini lao kandape.

Dopa pyuonambana suu pilyu doko kando koto nyepe.

24 Namba keta kyambona renge mende palape lao pyapi pyuo kandapala

lete karalu kararo kata dokonalanyuo papipi.