1 Ana pukakiarla ning, king Herot i dat pas dingla na tarai tagun a tarai a lotu sur ir alaulau la. 2 I arsune tar sur e Jems, tas e Jon, pa di umkoli ana liwan na harum. 3 Ning i oroi a tarai Juda la gas ana minat e Jems, i dat pas e Pita otleng ana ning a pukakiar ana lotu ana bret ning belal is ono. 4 Ning ka dat pas e Pita, lamur i akasi uting na rumai a dodot. Pa diat a kunum a tarai a harum la tai alari, la areiat ana ning a kunum. E Herot i mang sur ir beni sur dir warkurai i namatana tarai, lamur ana lotu na Han Lakai. 5 Ning e Pita i kes ting na rumai a dodot, a tarai a lotu rop bel la manah ana nunung tetek e God suri.

6 Ana morom lanigo ona pukakiar ning e Herot ir ben pas e Pita sur a warkurai, e Pita i borbor tar na arpotor tana naur a tena harum. La ka dot tar naur a kuna taum ana naur a sen. Pa dingla na tena harum la tur ting na taman pa la tai alar a rumai a dodot. 7 A angelo anuna Leklek i hanot kulkulan teteki, pa a talapor i sasai tingui na rumai a dodot. I dapis amata e Pita ana risna, pa i atai i mange, “Tur kapit!” Pa sen i tapapak kusun naur a kuna. 8 Pa angelo i atai i mange, “Ur mermer, pa ur suah pas anum naur a su.” Pa i toli larning. Pa angelo i atai ulaki mange, “Ur polpol alar u ana numa kaen, pa ur mur iau.” 9 E Pita i mur purumi kusun a rumai a dodot. E Pita i nuki mang a utna ne a angelo i toli, bel a momolna, i nuki mang i oroi a tatatai ka. 10 Dia bolos a ningnigo na tena tai alar, pa a munaur na otleng, lamur dia hanot ting na taman a aen, ning di purpurum onoi utumo a tnan hanua. Ning dia tur tingia, a taman i sapang oros ka, pa dia purum. Ning dia hanot uting na pukna ning a ngas i han sarara, a angelo i rorom kakat kusuni.

11 Ning a nuknukna e Pita i talapor, i atongi mange, “A tasman momoli mang a Leklek i sune anuna angelo, pa i alaun pas iau kusun a kuna e Herot, pa a ututnala ning a tarai Juda la mang sur lar toli hok.”

12 Ning i tasman lalani mang ka langolango, i han sur a rumai ane Maria, tana e Jon ning a risana otleng e Mak. A galis a tarai la kes taum tingia, pa la nunung. 13 E Pita i pinpindir ting na taman, pa ning a tena titol a basbas, a risana e Roda, i dun sur a taman. 14 Ning i longor lalan pas a elngena e Pita, i gas. Pa ana nuna gasgas, bel i sapang pasi, i dun ulak, pa i atai la mange, “E Pita kanumo na taman i tur.” 15 Pa la atai i mang, “U talar.” Pa i angongos la mang, “I momol ot, i ot ne lapiu.” Pa la atai i mang, “Ngandek anuna angelo ka.” 16 Ika e Pita i pinpindir ngongos, pa ning la sapang pa la oroi i, la kulkulan onoi. 17 Pa i sairas la ana kuna, sur lar kes longoroi, pa i atai la mang a Leklek i ben purum mangmangasa pasi kusun a rumai a dodot. Pa i atai la mang, “Mulor atai e Jems pa na tastasindala ana tortorot ana utna ne.” Pa i han kusun la sur ning a hanua masik.

18 Ana kobot a tena harumla la tai sur e Pita pa a nuknukinla i loklokron mang kanaha i ma. 19 Ning e Herot i longori mang bel ma i kes ting na rumai a dodot, i arsune sur lar tai suri. Ika bel la seren pasi. Lamur i warkurai a tena harumla ning la tai alar a rumai a dodot, pa i arsune onla sur dir umkol la. Lamur e Herot i han miting na papar Judia utumo e Sisaria, sur ir kes tumo.

20 E Herot i balakut tetek a tarai ana naur a hanua Tair pa e Saidon. Pa tarai miting na naur a hanua ning, la han taum sur lar oroi i. Pa lar nunungi sur a bal molmol, anasa anunla naur a hanua la laun ka ana utna na hangan miting na papar anuna king Herot. La bal taum nigo taum o e Blastus, a tnan tena tai alar anuna king, pa i nangan la sur lar oroi a king. 21 Ana pukakiar ning e Herot i kubus tari tanla, i mermer pas ana kaenla anuna king, pa i kes tar ana keskes na king, pa i warwara tetek a tarai. 22 Pa tarai la kukuk na gasgas, pa la atongi mang, “A elngen ning a god ot ne, belsur a barsan i.” 23 Ono otning, a angelo anuna Leklek i umi, anasa bel i atong leklek e God, pa a pompobola la ien a palaona, pa i mat.

24 Ika a warwara ane God i gomo, pa i han sarara uting na hanhanuala.

25 Ning e Sol pa e Barnabas dia titol rop saot e Jerusalem, dia ulak utumo e Antiok. Dia ben e Jon, ning a risana otleng e Mak, pa ditol han taum.