1 “A matanitu misaot na langit i arlar ana tamana barim a wain, i purum ana kobot ning ot sur ir deke sur al tena titol sur lar titol ting na nuna barim a wain. 2 La kubus warwara taum pas taum ana tena titolla sur lar los arlou tagun takai a pukakiar a titol, pa i sune la uting na nuna barim a wain. 3 Ana siuk a puka kamis, i han ulak pa i oroi pas dingla na tarai maleng la tur ororos ka ting na pukna na tinan taum. 4 Pa i atai la mang, ‘Mulo otleng, mulor han, pa mulor titol ting na nuk a barim a wain, par tokom mulo ana sa ning i tostos.’ 5 Pa la han.

“Ana tnan kamis i han pa i deke ulak sur al tena titol, pa ana natol a puka kamis ana rah i han ulak sur al tarai. 6 Ana dilima na puka kamis ana rah i han ulak, pa i oroi pas dingla na tarai maleng la tur ororos ka. Pa i atai la mang, ‘Sur asa ning mulo tur ororos ka a kidol a pukakiar ne?’ 7 La kelesi mang, ‘Bel tik i ben mila sur ta titol.’ I atai la mang, ‘Mulo otleng mulor han pa mulor titol ting na nuk a barim a wain.’

8 “Ning ka rah morom, a tamana barim a wain, i atongi tana ningnigo tagun anuna tena titolla mang, ‘Kabah pas a tena titolla ute, pa ur tokom la. Ur turpasi sur tokom nigon la ning la hanot murmur pa ir han tuk onla ning la hanot nigo.’

9 Na tena titol ning di ben pas la ana dilima na puka kamis la hanot, pa di tokom la taktakai ana arlou tagun takai a pukakiar a titol. 10 La ning di ben nigon pas la, la hanot. La nuki mang lar kibas a tnan arlou. Ika, bel! La otleng di tokom la taktakai ana arlou tagun takai a pukakiar a titol ka. 11 Ning la ka lolos pas, la ururai tetek a tamana a barim a wain, 12 la atongi mang, ‘La ning la hanot murmur bel la titol bongnan la, ika mila, mila tol a rakrakai a titol pa a kamis i rang mila, pa u tokom la otleng arlar omila.’ 13 Pa i keles ning a halinla mang, ‘Halik, bel a alaulau u. I mangasa, bel da kubus warwara pas sur a arlou tagun takai a pukakiar a titol? 14 Ur kibas pas anuma mani, pa ur han. A mang sur ar tokom la ning la hanot murmur arlar hom ning u nigo. 15 I mangasa, bel i sot sur ar tol asaning a mang suri ana nuk a mani? I mangasa, u nuknuk laulau hok, anasa a asangan a wakak a toltol tetek a tarai ne?’ 16 Larne, la ning anone la mur, lar nigo, pa la ning anone la nigo, lar mur.”

17 Ning e Iesu i han amon usaot e Jerusalem, i ben masik pas anuna ning a bonot pa pisir naur a kakak a asaer, pa i atai la mang, 18 “Oroi i, ine dala han amon usaot e Jerusalem. Dir saran a Nat a Barsan tetek a leklek a tena artabarla tetek e God pa a tena asaerla tagun a warkurai. Lar warkurai i sur ir mat, 19 pa lar saran tari tetek la, ning belsur a tarai Juda sur lar morot laulau ono, lar mirasi, pa lar sai ahati saot na rakai kutus. Natol a pukakiar ir rop pa ir laun ulak.”

20 Lamur e kabatnan naur a nat e Sebedi i han tetek e Iesu taum ana naur a natnalik. I kes ana bokona hana namatana pa i nunungi sur ta utna. 21 Pa e Iesu i dekeni mang, “Asa ning u mang suri?” Pa i kelesi mang, “Ur malmaling sur naur a natuklik ne, diar kes taum hom ting na num a matanitu, takai ana sot a kum, pa takai a halindiau ana kair.” 22 E Iesu i kelesi mang, “Bel mutol tasman asaning mutol nunung suri. I mangasa, mur tolsoti sur mur gang ana kap a mamahat ning ar gang ono?” Dia kelesi mang, “Miar tolsot pasi ka.” 23 I atai diau mang, “A momolna ot, a kap a mamahat ning ar gang ono, mu otleng mur gang ono. Ika a keskes ana sot a kuk pa a kair, bel anuka titol sur ar sarani. E Tata ir sarani tetek la ning ka sang tari sur la.”

24 Ning a bonot a kakak a asaer la longori, la balakut tetek ditas ning. 25 E Iesu i kabah taum pas la, pa i atongi mang, “Mulo tasmani mang a tena warkuraila anuna tarai ning belsur a tarai Juda, la warkurai a tarai pa la oroi purpurum la. Pa anunla na ningnigo la saran a rakrakai a warkuraila tetek anunla na tarai. 26 Ika tetek mulo bel ir manglarne. Esi ning i mang sur ir leklek ta mulo, ir anatarna pasi sur ir tena titol anumulo. 27 Pa esining i mang sur ir ningnigo ta mulo, ir tena titol oros tetek mulo. 28 Larka otleng ning a Nat a Barsan bel i hanot sur dir titol teteki. I hanot sur i ot ir titol tetek a tarai, pa ir saran tar anuna lalaun, a arlou, sur ir lou langolango pas a galis a tarai.”

29 Ning e Iesu pa nuna kakak a asaerla la han mitumo e Jeriko, a tnan kunum a tarai la mur la. 30 Naur a barsan naur a kut dia kes tar ting na ris a ngas. Ning dia longori mang e Iesu ka han milau, dia arkabah rakrakai mang, “Leklek, a Nat e Dewit, ur maris miau.” 31 Pa a kunum a tarai la sairas diau sur diar kes wowowon. Ika dia arkabah rakrakai ot usaot, “Leklek, a Nat e Dewit, ur maris miau.” 32 E Iesu i tur suai, pa i kabah pas diau, pa i deken diau mang, “Asa ning mu mang sur ar toli o mu?” 33 Dia kelesi mang, “Leklek, mia mang sur miar tai.” 34 E Iesu i maris kol diau, pa i tong naur a matan diau. Ono otning dia tai, pa dia muri.