1 Erau lala, popon tesitomyuli ya nap̃a kata apua la akila. Naga nene e pogos nap̃a yermarua Mosis sumon la amolue gar Isip, amio naga ataveve lul nene nap̃a sum̃a sumon la apa akusro pupia sive nene nap̃a mlip̃ere pan la. 2 Am̃al pogos m̃arera laa nene, ana Mosis p̃ere la apa ap̃arpoyo ea, ana apim sane ape kiena yeririna kemua lelaga. 3 Kas moki asum̃a amialoro ke e yokorena, la make ga akan kinanena nene nap̃a Ntewa kian pan la, 4 a pogos nap̃a moto kar la, Ntewa kila wii kate e pulus nen kilavaru nene vena amunia. E poglis nene, sane Kristo ga sike amio la, sum̃a pisuar ruru la e sur make ga.

5 Ntewa kila m̃a po pan la sanene pano-o, ana yepela mavin sum̃alen m̃arera se ea. Apilon m̃asila pania, ana naga pe tam̃an la re apa loyum̃a e yo nap̃a naga pisaar pan la poli, kila nap̃a asum̃a amarmare tetai kar ga e yomema.

6 Ana ita nagane, pe pon re teve p̃arm̃arera ve sa repita la nene poli, ana visae tesitom ruru e ya nap̃a pimi paemen la, kilia vian ita ea. 7 Visae ve sanene, monar ve teligan re sur tap̃ena sumon Ntewa e kieta malena, sane nono tai nap̃a telotunia, sa nap̃a repita la nene akila. Visena tai nap̃a pisayu kiela p̃elaga e poglis nene, pisape

8 La asitom asape malena wo ne nanene narui, ana ve sineta p̃esan re legiena nene nap̃a Ntewa kila lom̃ara viowa la apim akar yerm̃ene lala amio sira lala nap̃a akila lau, ana e legiena taaga ga nene la manu lualima yam lua pa telu [23,000] amare veraga e legiena taaga, sane kiela nakoaena m̃arera tai. Visae ve sanene monar tevisuar ruruia, pe pon re ita lap̃asa ava kar ga sanene poli. 9 Yar nap̃a pilave, kila mlamulena viowa sanene, a naga sitom sape pogaga ne, ana sum̃a miyur kare Sup̃e pap̃isi. Yoko Sup̃e kilia kila sur tai vania, yoko yar nene ilania, lom̃ara iminia sane yar na sumo la nene.

10 A pe pon re tevismumun Ntewa poli, sane la nap̃a asum̃a akila nanua sumo e pogos kiena kata apua lala. E poglis nene, Ntewa pitetalia navisi tai na visaaren marena pimi pula, m̃emom̃ar la.

11 Tepisu nap̃a la asum̃a akila ke mlamulena viowa sanene, ana tepisu nap̃a nakoaena pimi m̃alivin la ke sanene, ana pe suri tai nawep̃ege itaena. La asirilua kana suniena nena nakonua konua rui, ana tekilia tesitomyu si suri nene nagane, e legiena maro la ne tesike e ne. 12 Sanene, visae yar tai visuveve si kiena malena naga taaga, a sitom sape naga sum̃a sum̃alu ruru ke m̃arera rui, popon naga visuar ruruia, komin viowagan nap̃a visae naga kila si viowa pogos tai, ana loru.

13 Apisu nakilaliena la imi, ana ve sinemiu kurkur manene re. Pe kam re ga apane ke natap̃aliena la nene poli, ana asum̃a am̃alivi ke e malena kiena ne yaru make ga. Ana akilia awasine Ntewa, komin nap̃a yoko naga tap̃atete kila ko ovane natap̃aliena nap̃a ko pe otorokin re otaulu poli, ana pogos nap̃a natap̃aliena imi kilali ko, yoko naga vian kon kiom̃a mrapa nam̃areraena nap̃a nasuwoen natap̃aliena, vano-o oure matan nam̃areraena na tap̃aliena nene.

14 Kiau erau wo lala, monar ve ava re nena lavisin p̃elaga nap̃a yar la asum̃a amlotun ke nono na visokanena lala. 15 Nekilia nesape kam na yar sur la nap̃a akilia suria, ana pogos nap̃a nepisaar mesmesun nena pan amiu sanene, nemlelaga nesape kam na amninu kilale ya nap̃a nesum̃a nepisa ke ne. 16  Mat 26:26-28; Mak 14:22-24; Luk 22:19,20Nepisa visena la nene komin nap̃a pogos na ova oyakol amio yar la nap̃a asum̃a amlotun ke nono tai, sa ga nap̃a ko m̃ena omlotun ke nono nene narui. Naga nene maran taaga amio ita la nap̃a temlelaga ke e Kristo. E pogos na p̃ap̃agena wa, temlenin namunena wa, temlavia, a na nene sa nap̃a ita tepisawal tesape tesikol ita e p̃egas kiena yar la nap̃a kana kuruta mlau komin la. Ana siraunia, takawero kilaparavi wa, temlavia, a na nene sa nap̃a ita temio la nap̃a akila kare tasnena nap̃a tamalele metava e lak torovia.

17 Nanene lelaga pan ita punu ga nap̃a tesum̃a tepim lele taaga e p̃ap̃agena wa nene, komin nap̃a tepim sane p̃egas taaga, a takan pae ga kilaparavi taaga nene.

18 A sa ke m̃ena ga nene pa le Israel lala, pogos nap̃a am̃emom̃ar suri na kup̃ap̃aena lala. Lap̃asa pe akila re kup̃ap̃aena poli, ana akekaran kanen tata na kup̃ap̃aena nene nap̃a yaru tap̃ena ga la akila, ana kila sa nap̃a ape p̃egas taaga nap̃a akila lotena na sanene pan Ntewa.

19 Pogaga, visena la nene kana kinas na ya? Nesum̃a nepisayu ke nono lala amio nakup̃ap̃aena la nene, ana e kiau sitomena kana kinasa pe nepisa re nesape sur la nene na lelaga poli, pona apowo liu. 20 Pe sa re nena nene poli, ana popon nekila meraravan van amiu, nesape la nap̃a akila ke lotena kar la ne sanene, pe amlelaga re e Kristo poli, a kup̃ap̃aena la nap̃a asum̃a akila ke ne, pe asum̃a akila re pa Ntewa lelaga poli, ana asum̃a akila ke ga pa yermare lala. Sanene, pe pon re ava lavisin la nap̃a asum̃a akila ke poli, komin pe sineun re nesape asikol amiu amio yermare la poli. 21 Ko nap̃a ototano ke e lele na kinanena kiena Sup̃e, osum̃a omun ke e m̃ana piala wa, a osum̃a okan ke kana kinanena wa, tap̃atete okilia ova ototano e lelen kinanena kiena yermare lala vena omun kiela namunena a okan kiela kinanena. 22 Yar na kila sanene naga sum̃a miyur ke Sup̃e, kilia kila Sup̃e vielue vap̃isi, sinena karia. A pona yar nene sitom ke sape visae Sup̃e sinena kar sanene, pe pe sur re tai poli, komin naga m̃arera manene taulu Sup̃e? Pe nesitom re nena sanene poli.

23  1Kor 6:12Visena tai sum̃a ga, nap̃a yar la mokliu apisa apisape, yaru kilia kila ga ya nap̃a naga sinenan sape kila. Pona visena nene pe lelaga yo, ana sur lap̃asa sike na nap̃a nekilia nekila, ana yepmavin ga kilaena, komin e kiau navisuena, la pe asum̃a amiila inu re e kiau malena poli, a pe asum̃a amiila re malena kiena yar la nap̃a asike lavisin inu poli. 24 Nepisa sanene komin nap̃a pe pon re yar tai sum̃a sitom̃al ga naga taaga poli, ana monar sitom̃al m̃ena yeririna la nap̃a naga sike lavisin la.

25 Pogaga, nagane yoko nevisa sur lap̃asa e lepas na tata na sur mali lala nap̃a akila kup̃ap̃aena ea pan kiela nono na visokanena lala. Visae awar tata la nene imi, aligan su amio tata tap̃ena lala, vena awilwilin la, tekilia toulia takan woga ga. Nanene komin nap̃a tap̃atete tekilia tevisu kilale sane tata na ya la ne sanene, tesape tata ya nap̃a akila kup̃ap̃aena ea, pona tata ya nap̃a pe akila re kup̃ap̃aena e poli, ana ve tesitom manene re, ve teviun re, toul ga narui. 26 Telavia, takania, komin nap̃a sane visena tai pisa sanini sape yomarava nini,

27 A visae yaru tai nap̃a pe mlelaga re poli, vio ko vena ova okinana e m̃ana yum̃a, pona omaraun vaena yo, osum̃a ositom ke osape pona awar kinanena lap̃asa van ko nap̃a akila pae lotena na kiela nono la e yo rui. Ana peraga, visae osum̃a ositom ke nap̃a ovano, ova ga, a ve oviun re naviunena sanene, ola ga ya nap̃a visae ala van ko. 28 Ana sur ga tai, visae ova osike pae e nap̃a rui, a nalelagaena tap̃ena tai teke ea, ana pona naga visa van ko sanini, visave Wolai, tata nene, italua monar telonia, komin nekilia rui nesape akila pae e rui pa kiela nono lala. Visae naga visa ve sanene van ko, ana sanene yoko ko m̃ena ga ve okan re. 29 Lelaga, e lepas na kiom̃a sitomena, okekaran ga kanena, ana e lepas na womla tap̃ena nene nap̃a pisa sur nene pan ko, viowa vania, ana pe pon re si otol poli, komin visae peraga, yoko okila sur tai nap̃a kiena sitomena pe mesmesun re nenaga p̃isa.

Ana visae ko ga taaga, a pe yar tai pisawal re sur la sanene pan ko poli, okilia okila ya nap̃a ko sinom̃an osape okilia okila.

Nane kiau sitomena sanene e lepas nene. Nesitom nesape pe mesmesun re nap̃a yaru tap̃ena ga kilia m̃areran inu visave monar nekila nene, pona ve nekila re nene. 30 Visae kinanena ya, nevisu sane visae nelenwo sumo, yoko nekilia nakania woga ga. Pe pon re yaru tap̃ena sinena karinun poli, nap̃a nakan ke tata nap̃a nepisa potena pa Ntewa vanon rui.

31 Pogaga, naga kana kinasa sanini, sane visae tekan suri tai, pona tomun sur tai, pona ya si nap̃a tekilia tekila, ana monar tekila make ga e p̃elaga tai na visirluaen kia kiena ne Ntewa. 32 Pe pon re akila sur nap̃a kila kare sitomena kiena le Yu la poli, pona le Kris lala, pona kieta li nalelagaena tap̃ena lap̃asa, 33 ana popon amiu akilali sa nap̃a in na nesum̃a nekila ke pan la. E sur make ga nap̃a nesum̃a nekila, pe nekilali re ya nap̃a yoko wo van inu poli, ana nop̃ikeyon nap̃a wo van la, vena kila sane pona lap̃asa akilia atol natamaliaena.