1 Sineun nesape amiu asitom veveli kieta malena wo temio Kristo. Kiena p̃elaga miilalua ke kieta sitomena, ne! Kiena sinewoena kila temloge po pap̃isi, ne! Ninuna kila tesu ruru ke temio ita, ne! A naga kila nap̃a malumuena a sineyeena pulen ita, ne! 2 Ana komin nap̃a kila po pan ita sanene narui, nesape neiakol visena, neviun van amiu vena ava re laa sanene. Awis, atam̃an sane kiamiu p̃elaga pan amiu, yoko maran ve taaga ga sane kiena p̃elaga pan amiu. Ana popon sinemiu iyeiye amiu, maran taaga ga sa nap̃a naga sinen miye amiu, a kiamiu visena a kiamiu sitomena ve taaga. Visae nevisu akila ve sanene, yoko neloge wo, nekekara na nekekara. 3 Ve sanene na, ve teyum̃ae re si e p̃elaga na puluvisena, a ve tekila re si suria e nawarwarena, ana monar temalumu, tekila ita tesu ga tano, tevisu yar tap̃ena la sane apo taulu ita. 4 Ve tesitom̃al ita re ga, amio ya nap̃a pe kieta, ana monar tesitom̃al m̃ena yar tap̃ena lala, amio ya nap̃a pe kiela. 5 Popon sitomena wo amio p̃elaga wo su lue ga e ita, komin naga nene nap̃a tepisu e Kristo Yesu rui, nap̃a po na po.

6 Naga sa nap̃a yauena tai nap̃a pisa, sape

12 Erau lala, e yo nene tepisu nap̃a Yesu mlogear arimana, a amiu m̃ena, nanua nepisu sane amlogear ruru m̃ena naga po na po. A nanene pe nakilaen re ga e pogos nap̃a nesike nemio amiu, komin nanagane pe nesu re si nemio amiu poli, pe nepisu re si sane asike sanape, ana sineun nesape asum̃a akila m̃a wo va laa sanene.

Amiu atol pa natamaliaena rui, ana piowa nap̃a atotano korena amio, ana monar asitom urmi ea. Monar avisuar ruru pupia yum̃aena wo nap̃a Ntewa kila, na amiu m̃ena monar ayum̃aen lili m̃aga yum̃aen wo lala na malena viu nene nap̃a naga mla pan amiu. 13 Ana nemlelaga sane tekilia tekila, vanon Ntewa ga nene miyum̃ae ke e kieta malena la ita peve taaga, miila ruru ita nap̃a kieta sinenanena lala kekaran na kilaen kiena sinenanena, a kila ita ke tetorokin nakilaen suri nene.

14 Ve sanene, sur ya nap̃a sike e lumom̃a na kilaena, okila nap̃a sane ve ovis mumu re pona ve ovisamaran re sina. 15 A tesike likan yeririna la nap̃a akuspal mrapa, kiela sitomena la pe tap̃ena, ana ita monar teyum̃aen kieta yum̃aena la wo a mesmes. Ita tepe narina ne Ntewa lala, nap̃a popon kororaki ve to re e ita, a monar tepe sane kap tego na tegolien mrapa kiena yeririna la na yomarava nini. 16 Amiu auarar ruru visena namalena vanla, vano-o tol pogos nap̃a pupia legiena nap̃a Kristo yoko wasup̃e sina ga. Sanene yoko nekilia nevisu sane pe nekirir korena re poli, ana nekilia nevilaven amiu, nekekaran amiu sane ape pupia mras nen kiau yum̃aena tai. 17 Pona vano-o tol sane kau kuruta monar lau vanon amiu, a visae ve sanene, nepisu sane pogaga. Nepisa sanene vanon nepisu sane amlogear Yesu, akila amiu sane pe kup̃ap̃aena tai pan rui, ana popon in m̃ena nekekaran natam̃anen kiau malena vanon yum̃aena kiena Sup̃e. 18 Nane nepisa, sane nekekaran ve sanene, a popon amiu m̃ena akekarania, komin nap̃a visae Ntewa kekaran sape nekilia netarlu kiau malena vanon yar tap̃ena lala, naga pe sur wo tai nap̃a naga kila van inu.

19 Nesape nevisawal m̃ena van amiu sane e lepas kiena ne wolai nene Timote, kiau sitomena m̃arera e Sup̃e Yesu sane yoko ve ve piavi re, yoko nevitetalia naga im̃asu pun amiu. Nekekaran naga pap̃isi sane popon sa naga im̃as visu amiu, p̃isi na war kamiu lologena p̃asia imi si pun inu, naga nene yoko kila neloge wo vap̃isi ne. 20 In na nepisu sane pe nekirawal re si yar tai e nini poli sane naga, po torokin nap̃a nevitetalia im̃as pun amiu. Naga kiena sitomena maran taaga ga amio inu, ana nekilia sane visae naga sike amio amiu, nep̃asine sane yoko naga sitom lue ga nakilaen wo manene laa van amiu. 21 Lala tap̃ena la asikena, ana pe asa re naga poli. In na nepisulup̃ar la rui, sane sur nap̃a keviu e kiela sitomena, nane sur la nap̃a pe kiela ga, ana sur kiena ne Yesu Kristo, asitom korenan la ga, pe asitom re urmi e poli. 22 Ana Timote tekilia sane naga po pap̃isi, akilia rui sanape nap̃a imimi lua memiyum̃ae veraga e lologena wo, pano-o nepisu naga sane pe naruu, a naga pionu pe arimana. 23 Sanene na, nepisu sane pe yar mesmes nap̃a nevitetalia im̃as pun amiu, ana tap̃atete im̃as na wa. Sineun nesape nevisuli sane yoko ve sanape van inu e nini sumo wa, p̃isi na naga kilia im̃as visawal van amiu. 24 Visae yoko imi wo van inu e nini, nekilia sane yoko ve naga taaga re kilia vim katen amiu, ana nemligan ke e kiau leniena, nemlelaga e Sup̃e sane yoko ve ve piavi re na yoko akilia avisu m̃ena marau neim̃as nakaten amiu.

25 Sur tap̃ena si tai na visawalen van amiu, sane kieta puruvi nap̃a Epaprotaetas, naga mai pap̃isi pano-o nepisu sane popon neligan naga wasup̃e si pun amiu sumo wa. Amligan naga pimi sane kiamiu naiilaena tai van inu, p̃isi na memiyum̃ae veraga po, mesum̃al veraga e mara na po na po. 26 Ana sur taaga ga, maiena nene tolia, kila kare naga pap̃isi, kila naga sinenan pisape im̃as si um̃a pun amiu. Ana pogos nap̃a naga mloge sane lologena na kiena maiena nene tol pa pulkiligamiu la rui, kila naga mloge piowa li m̃aga, sinenan pisape visu amiu. 27 Lelaga ga, maiena nene kila naga piowa pano-o mepisu sane yoko taulu naga, p̃isi na Ntewa sinen miea, pe mare re poli. Ana in na nesitom ke sane Ntewa pe sitom re ga naga poli, a sitom in m̃ena ga, komin visae naga mare, yoko m̃arera m̃ena van inu vap̃isi, yoko yakol si pupia naloge viowaena metavan si naloge viowaen tap̃ena la nap̃a nokus ke pa rui. 28 Ana pogos nap̃a mai sanene, sike amio in e nini wa, nemloge piowagan naga pap̃isi. Ana sineun nesape neligan naga wasup̃e sina pun amiu sumo wa, a nemlelaga sane amiu m̃ena akekaran navisuen si marana. 29 Sineun aworworun naga e kia kiena ne Sup̃e, avisuar ruru naga sa nap̃a apisulup̃ar naga amio kiena yum̃aena la nap̃a kila e nini. Yar sur la ne sanene, popon tevisuar ruru la, po tevatanon la, 30 vanon akila yum̃aena kiena ne Kristo po pap̃isi. Epaprotaetas naga sanene narui, nap̃a sitom manene laa yum̃aena nene, kila sane pe sitom re nena kiena malena, lavis marenia. Naga kila sanene vanon sinenan sape ve masisu e yum̃aena nap̃a amligan e limana. Amiu tap̃atete aim aiila inu, ana amligan naga kus kiamiu kia, pimi miyum̃ae ke amio inu. Naga nene aure si naga, akila wo vania.