1 ᤕᤠᤱᤛᤠᤁᤢᤴᤎᤣᤛᤠᤒᤠᤛᤣ. ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ. ᤀᤠᤸᤗ ᤂᤡᤏᤡ᤹ ᤛᤶᤍᤠᤱ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤛᤠ᤹ᤖᤡᤰ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤜᤠ᤺ᤒᤧᤶᤔᤧ᤹ ᤑᤡ᤺ᤰᤋᤧᤶᤔᤧ᤹ᤀᤥ॥ 2 ᤂᤡᤏᤡ᤹ ᤕᤠᤱᤛᤠᤁᤢᤴᤎᤣ᤺ᤱᤃ ᤕ᤺ᤵᤐᤣ᤺ᤰᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤆᤠᤱ ᤋᤣ᤺ᤳᤜᤠ᤹ ᤌᤰ ᤌᤠ᤺ᤖᤥ॥ 3 ᤂᤡᤏᤡ᤹ ᤛᤠᤶᤔᤩᤠᤱ ᤕᤢᤵᤐᤠᤜᤠ᤹ ᤜᤏᤧᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤔᤡ᤺ᤸᤗᤧ ᤗᤠᤒᤢᤒᤠ ᤁᤢᤀᤡᤛᤡ᤺ᤰ ᤋᤠ᤺ᤰᤐᤥ ᤁᤧᤈᤥᤃᤢᤶᤒᤠ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤂᤡᤏᤡ᤹ ᤏᤧᤰᤛᤠ᤺ᤴ ᤆᤖᤥ॥ ᤂᤡᤏᤡ᤹ ᤕᤖᤡᤰ ᤕᤠᤱᤃᤧᤄᤥ᤺ᤳᤋᤢᤶᤒᤠ ᤕᤠᤱᤛᤠᤁᤢᤴᤎᤣ᤺ᤱᤃ ᤋᤠ᤺ᤴᤍᤡ ᤂᤠᤛᤧᤴ ᤆᤥ᤺ᤰᤔᤠ ᤕᤧᤴᤏᤥ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤥ᤺ᤱᤗᤥ॥ 4 ᤀᤥᤔᤧᤳᤋᤧᤶᤔᤧ᤹ᤀᤥ᥄ ᤂᤡᤏᤡ᤹ ᤀᤡᤰᤋᤠᤵᤐᤥ ᤏᤠᤶᤕᤠᤰ ᤔᤧᤶᤒᤡᤀᤣ ᤕᤠ᤺ᤶᤒᤰᤁᤥ ᤁᤧᤓᤳᤇᤢᤶᤛᤡᤶᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤠᤶᤕᤠᤰᤁᤡᤴ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀ᤺ᤰᤗᤥ॥ ᤂᤧᤴ ᤆᤠᤃᤧᤛᤢᤶᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠ᤺ᤱᤃ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤘᤠ᤹ᤖᤥ॥

5 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤡᤏᤡ᤹ ᤕᤠᤶᤍᤠᤍᤠ ᤏᤢ ᤀᤠᤒᤠᤅᤣᤖᤰ ᤏᤡᤱᤘᤠ᤹ ᤋᤠᤍᤠ ᤁᤧᤘᤕᤡ᤹ᤀᤠᤱ ᤛᤧᤵᤔᤠ ᤕᤧᤴᤏᤥ ᤌᤠᤖᤡᤰ ᤌᤰᤛᤠ᤺ᤴ ᤆᤠᤗᤢᤵᤔᤏᤠᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤆᤠᤃᤧᤗᤢᤵᤐᤠᤛᤡᤀᤠᤱ ᤁᤧᤘᤕᤡᤖᤥ॥ 6 ᤂᤡᤏᤡ᤹ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤢᤶᤛᤡᤶᤔᤠᤱ ᤁᤧᤛᤧᤖᤢᤶᤛᤡᤶᤛᤠᤱ ᤁᤧᤔᤧᤴᤀᤳᤋᤡᤴᤗᤥ॥

7 ᤂᤧᤸᤗᤧ ᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠᤸᤗᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤶᤔᤡᤴ ᤁᤧᤜᤠᤱᤄᤢᤶᤔᤡᤸᤗᤧ ᤂᤡᤏᤡ᤹ ᤏᤠᤛᤡ ᤌ᤺ᤵᤔᤠᤀᤠᤱ ᤜᤠᤱᤔᤠᤀᤣ ᤐᤥ᤺ᤱᤗᤥ॥ ᤀᤡᤰᤔ᤺ᤒᤠᤸᤗᤧ ᤁᤢᤀᤡᤰᤋᤠᤵᤐᤥ ᤀᤡᤔᤧᤸᤗᤢᤱᤒᤠ ᤁᤢᤈᤠ᤹ ᤏᤢ᤺ᤖᤡᤰᤁᤠᤱ ᤌᤥ᤺ᤰᤗ ᤑᤠ᤹ᤀᤠᤱ ᤜᤠᤱᤘᤠ᤺ᤶᤔᤠ ᤏᤢ ᤆᤢᤱᤘᤠ᤺ᤶᤔᤠᤀᤥ ᤐᤠᤱᤃᤧᤴᤍᤡᤱ ᤘᤠᤜᤡᤳᤔᤠᤴ ᤏᤠᤛᤡ ᤌ᤺ᤳᤋᤢᤀᤠᤱ ᤜᤠᤱᤄᤢᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 8 ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤏᤠᤛᤡ ᤁᤧᤎ᤺ᤵᤐᤠ ᤏᤢ ᤏᤡᤱᤛᤠᤱ ᤁᤧᤈᤥ᤺ᤰᤐᤠ ᤐᤥ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠ ᤕᤧᤶᤔᤡᤱᤃ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥

9 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤆᤧ᤹ᤕᤠ ᤔᤧᤔᤧᤳᤋᤠᤛᤡᤶᤔᤡᤴᤏᤧ᤹ᤀᤥ॥ ᤔᤧ᤺ᤴᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤂᤠᤛᤧᤴ ᤆᤥᤃᤢ᤹ᤖᤥ॥ ᤐᤕᤶᤒ᤻ ᤕᤶᤒᤠ ᤂᤠᤛᤧᤴᤍᤠᤱᤒᤠᤴ ᤋᤠ᤺ᤔᤠ ᤀᤡ᤺ᤳᤋᤧᤀᤠᤱ ᤘᤠ᤹ᤖᤥ᥄

10 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤀᤢᤴᤇᤣ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹* ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤴ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠᤒᤠ ᤀᤡᤱᤄᤱ ᤁᤧᤒᤠ᤺ᤵᤐᤠ ᤔᤏᤠᤖᤥ॥ ᤁᤢᤓᤠ ᤕᤧᤶᤔᤥ ᤋᤠ᤺ᤴᤍᤡ ᤁᤧᤒᤥ᤺ᤱᤒᤠ ᤐᤠ᤺ᤴᤏᤠᤱ ᤂᤢᤏᤧ᤹ ᤐᤠ᤺ᤳᤋᤢᤖᤥ॥ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤂᤧᤱᤜᤠ᤹ᤖᤧ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤏᤠᤛᤡ ᤔᤧᤎ᤺ᤳᤋᤢᤀᤠᤱ ᤁᤢᤒᤡ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ 11 ᤀᤥᤔᤧᤳᤋᤧᤶᤔᤧ᤹. ᤀᤡᤏᤥᤃᤧᤴ ᤋᤢᤰᤂᤣᤀᤥ ᤏᤠᤛᤡ ᤁᤧᤎ᤺ᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡ ᤑᤠ᤹ᤀᤠᤱ ᤀᤠᤀᤡ᤺ᤳᤋᤢᤶᤛᤡᤶᤗᤥ॥ ᤀᤕᤢᤒᤖᤧ* ᤀᤕᤢᤒ ᥇.᥈᥇-᥈᥈. ᥈.᥇᥆. ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᥇᥆᥉.᥎ ᤁᤢᤏᤠᤛᤡ ᤌ᤺ᤵᤔᤠᤱᤃ ᤂᤡᤏᤡ᤹ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤁᤢᤏᤢᤵᤔᤥ ᤍᤠᤱᤒᤠᤸᤗᤧ ᤏᤢ᤺ᤒᤠ ᤐᤠ᤺ᤴᤜᤠ᤹ ᤋᤠᤖᤢ ᤐᤡᤖᤢᤒᤠᤴ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤍᤠᤱᤒᤠᤱᤃ ᤔᤡ᤺ᤶᤈᤡ ᤏᤢ ᤗᤢᤱᤍᤢᤰ ᤁᤢᤎᤡᤶ ᤆᤥ᤺ᤰᤗᤥ॥

12 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤸᤗ ᤛᤠᤱᤃᤪᤠᤶᤐᤣᤍᤠᤱ ᤀᤡᤃᤪ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤜᤧᤰᤁᤩᤠᤱ ᤘᤣ᤹ ᤌᤣ ᤐᤠ᤺ᤴᤏᤥᤀᤠᤱ ᤔᤠᤱᤔᤧᤜᤧᤰᤁᤠᤛᤡᤶᤔᤧᤴᤏᤧ᤹ᤀᤥ॥ ᤜᤠᤖᤠ᤹ ᤂᤡᤏᤡ᤹ ᤐᤠ᤺ᤴᤏᤡᤴ ᤀᤥᤏᤧ ᤑᤠ᤹ᤃᤪ “ᤀᤥ” ᤔᤧ᤺ᤴᤏᤧ ᤑᤠ᤹ᤃᤪ “ᤔᤧ᤺ᤴ” ᤐᤥ᤺ᤱᤗᤖᤥ. ᤔᤧ᤺ᤱᤃᤪ ᤂᤡᤏᤡ᤹ ᤂᤢᤶᤍᤡᤱᤅᤥ ᤁᤧᤎᤩᤧ᤹ᤀᤡᤖᤥ॥

13 ᤂᤡᤏᤡ᤹ᤀᤥ ᤜᤠ᤺ᤳ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤘᤠ᤹ᤒᤣ᥅ ᤜᤠᤖᤠ᤹ ᤂᤧᤸᤗᤧ ᤋᤢᤘᤠ ᤆᤥᤃᤢᤖᤖᤥ॥ ᤜᤠ᤺ᤳ ᤀᤥᤔᤢ ᤗ᤹ᤔᤠᤀᤥ ᤘᤠ᤹᥅ ᤜᤠᤖᤠ᤹ ᤂᤧᤸᤗᤧ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤛᤠᤶᤗᤥ᤺ᤴ ᤛᤠᤶ ᤔᤧᤳᤋᤢᤖᤖᤥ॥

14 ᤜᤧᤰᤁᤩᤠᤱ ᤂᤡᤏᤡ᤹ᤀᤥ ᤜᤠ᤺ᤳ ᤋᤢᤰᤐᤣ᥅ ᤜᤠᤖᤠ᤹ ᤂᤧᤸᤗᤧ ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥ᤺ᤒᤠ ᤋᤢᤶᤓᤠᤰᤛᤠᤜᤠ᤹ ᤀᤢ᤺ᤳᤋᤢᤛᤡᤖᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤣ᤺ᤳᤗ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤏᤡ᤺ᤱᤃᤣ᤺ᤴ ᤔᤧᤜᤢ᤺ᤳᤋᤢᤀᤠᤱ ᤋᤢᤘᤠ ᤔᤧᤈᤥᤃᤢᤖᤖᤥ॥ 15 ᤜᤧᤰᤁᤩᤠᤱ ᤏᤛᤠ᤺ᤴᤗᤠᤶᤒᤠ ᤆᤥ᤺ᤰᤔᤏᤠᤒᤠ ᤋᤢᤘᤠ᤺ᤸᤗᤧ ᤂᤧᤴ ᤁᤧᤍᤢᤰᤐᤧᤴ ᤘᤣ᤺ᤳᤗᤥ॥ ᤍᤠᤱᤒᤠᤸᤗᤧ ᤂᤧᤴ ᤘᤣ᤺ᤴᤍᤢ᤹ᤖᤥ॥ ᤂᤧᤸᤗᤧ ᤗᤠᤕᤥ ᤆᤥᤃᤢᤀᤠᤱ ᤘᤕᤧᤛᤠᤱ. ᤍᤠᤱᤒᤠᤸᤗᤧ ᤂᤧᤴ ᤗᤧᤵᤔᤡ ᤐᤡᤖᤢ᤹ᤖᤥ॥

16 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤗᤠᤕᤥᤜᤠ᤹ ᤔᤧᤳᤋᤠᤛᤡᤶᤔᤧ᤹ᤀᤠᤱ ᤜᤡᤴᤍᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤧᤘᤣ᤺ᤴᤍᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠ ᤐᤡᤀᤠᤛᤡᤶᤔᤧ᤹ᤀᤥ॥ ᤛᤠᤶᤕᤥᤏᤡᤒᤠ ᤔᤏᤠ᤺ᤸᤗᤧ ᤁᤢᤍᤢᤘᤠ᤺ᤴ ᤔᤢᤰᤛᤠᤶᤒᤠ ᤆᤥ᤺ᤰᤁᤠᤱ ᤕᤶᤒᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ 17 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴᤏᤠᤱ ᤀᤠᤏᤡ᤹ ᤜᤧᤰᤋᤱᤒᤠ ᤔᤏᤠᤀᤣ ᤆᤥᤃᤧᤖᤥ॥ ᤂᤢᤏᤧ᤹ ᤐᤠᤱᤃᤧᤴᤍᤡᤱ ᤘᤠᤜᤡᤳᤔᤠᤴ ᤔᤧᤎᤠᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤸᤗᤧ ᤂᤧᤴ ᤗᤠᤈᤣ᤹ᤀᤥ ᤋᤱᤒᤣ ᤛᤢᤶᤛᤡᤀᤠᤱ ᤋᤢᤰᤛᤡ ᤗᤠ ᤌᤠᤖᤡᤰ ᤘᤠᤜᤡᤳᤔᤠᤴ ᤔᤧᤎᤩᤧᤴᤏᤧᤴᤗᤥ॥ 18 ᤕᤠᤶᤔᤥ ᤂᤧᤸᤗᤧ ᤋᤢᤘᤠ ᤆᤥᤃᤢ. ᤜᤧᤰᤁᤩᤠᤱ ᤋᤠᤱᤛᤠᤰᤐᤥᤗᤠᤶ ᤘᤠᤜᤡᤳᤔᤠᤴ ᤌᤩᤧᤀᤠᤱ ᤂᤠᤶᤒᤣ᤺ᤰᤔᤠᤀᤥ ᤐᤥᤃᤢᤃᤧᤴ ᤁᤢᤈᤠ ᤌᤥ᤺ᤰᤋᤧᤖᤥ॥

19 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤛᤧᤰᤂᤠᤗᤠᤶ ᤋᤠᤵᤁᤧᤒᤧ᤹ᤒᤠᤀᤠᤱ ᤁᤧᤒᤣ᤺ᤰᤐᤧᤴ ᤏᤢ᤺ᤰᤋᤧᤶ ᤋᤠᤖᤧᤶᤔᤧ᤹ᤀᤥ॥ 20 ᤁᤴ ᤐᤠ᤺ᤴᤏᤥ ᤏᤢ᤺ᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ–ᤀᤠᤳᤋᤡᤸᤗᤧ ᤗᤠᤕᤥᤒᤠᤴ ᤋᤠᤵᤑᤧ᤺ᤶᤒᤠ ᤁᤢᤗᤠᤶᤔᤥᤗᤠᤶ ᤏᤢ᤺ᤰᤋᤢ ᤋᤠᤖᤢ᤹. ᤂᤧᤸᤗᤧᤃ ᤂᤧᤴᤏᤡᤴ ᤛᤡ᤺ᤔᤧᤴᤗᤠᤶ ᤋᤠᤱᤛᤧ᤺ᤵᤋᤢᤀᤠᤱ ᤕᤖᤡᤰ ᤗᤠᤕᤥᤜᤠ᤹ᤖᤧᤴ ᤗᤧᤵᤔᤡ ᤁᤧᤄᤥ᤺ᤒᤠ ᤆᤥᤃᤢ᤹ᤖᤥ॥