1 Petrus
Mak khi'a horat di de Petrusa, de riy id la'a maka Yesus ha Nwatutu-nwaye'a re. Petrusa na'enyatga horat di la'a riy makpesiay, mak kdella leta-leta la'a propinsi maka ha rweta la Asia Kuku'a. La' ler de de rlernan kropna-krieutu, nniahora-nniala'a onnila ir pesiayni la'a Yesus. La'a ayat 2:11-12; 2:25; 3:16; 4:4 Petrus nakot nohora nnio'a-niatu la riy mak klernana kropna-krieutu, nniahora-nniala'a la'a riy mak edon kpesiay. Ne la'a ayat 2:18-20 Petrus nakot nohora nnio'a-niatu la'a hopopna-lili'iru, ata-wa'ara mak klernan nniahora-nniala'a yamuki-yama'ala la'a ir upni-matromni.
Petrus na'enyatga horat di la'a ira totpena nhi' aruri ir pesiayni totpena hota la'pa rlernana lui-nuhru, nniahora-nniala'a de rtutrieri tertehra la'a ir pesiayni. Petrus nakot wali niwra la'pa rtutrier tiertehra la'a kropna-krieutu ralamni de hota pesiayni yarurni nayamkek la (1:16-17; 4:12). Ne la'pa makpesiaya re rler la kropna-krieutu nniahora-nniala'a la'a Yesus Kristus de rerieini, de hota irlernohor rer mia'ta Uplerlawna lirni-tunnu me rhi'a-ryapia hihi'a-yapyap mak kaplola (4:19). Petrus nala nnio'a-niatu wawa-niatu na nhi' aruri ir pesiayni totpena rha'ar aranni la'a Uplerlawna, me totpena rsumbaini me rhi' hya'-hya' honona mak kalwiedweda.
La'a Puka ralamni rakot emkadille:
1. Wniak kalwieda (1:1-2)
2. Ta'uli-tawedi Uplerlawna onnila yamori-yalewna maka Enala mai ita (1:3-12)
3. Ita nhiolli-lietni wniehwani-liakatni hota kalwiedweda onnila Uplerlawna upni-a'nani ita (1:13-2:10)
4. It ttutga hihi'ini-yapyapni mak kalwieda la'a mak edon kpesiay (2:11-4:19)
Itsu'ru-tselma mak ktorna-krautu, nnio'a-niatu la'a ata-wa'ara me la'a mak kmehlima me nnio'a-niatu walia la'a makpesiay honona (2:11-3:12)
Nnio'a-niatu totpena rtutrier tiertehra la'a kropna-krieutu ralamni (3:12-4:6)
Nnio'a-niatu totpena makpesiaya re rla' ihru ida-ralm ida me idma ntulan la ida (4:7-11)
Nnio'a-niatu la'a riy mak klernana kropna-krieutu lui-nuhru onnila ir pesiayni (4:12-19)
5. Nnio'a-niatu la'a krei o'tani-matni me krei mutnu (5:1-11)
6. Wniak kalwied la hohoni (5:12-14)
1
Petrus nwak kalwieda
1-2 Ina-nara ama-hyali maka Uplerlawna Nwalir niana la'a rira liawanmi mak kahulti-kahamra mak kanie'er la Pontus, Galatia, Kapadokia, Asia me Bitinia.
A' di de Petrus. Yesus Kristus Nhopn a' pua agodia Uplerlawna lirni-tunnu. Awuak de Uplerlawna ed mak ktowria ra'ani-pallu me kalwiedni-paitiotni tiy miy.
Ina-nara, miy er maka Uplerlawna it Amlawanni de Nwalir niana pa mrie'ela E mutnu-rahanu Nlernohora E ralma-riorni la ululu memna. Ne la'a Uplerlawna Nhiwni pede Nhi' olek miy pia mpial lia E mut wuamueheni, totpena miy miana miatu mi'unni-mimta'ata Yesus Kristus lirni-tunnu. Yoma Ennairia E rarni pa na Nwuri-nohma do'omi-halmi.
Itarur niek la it pesiayni me tahepur nohora yoma hota itlernan yamori-yalewna maka Uplerlawna Nala
3-4 Ina-nara ama-hyali, mai pia ta'uli-tawedi tlilili-tmamuawua Uplerlawna-Mempulwatnu, de Itmatromni Yesus Kristus Amni mak Yesus wal pia Nkola tieru-nawur nehla de. Ita'uli-tawedia Uplerlawna yoma Ensayn toto' memn ita pede Nal it pa tler la mormiori warwuaru. Itlernan mormior warwuaru de yoma Enamori owa'ana Yesus Kristus la matmiatni ralamni. Ne Uplerlawna hihi'ini de ed mak kodia it la nhia'argen miak karuri. Itsa'ar it ralamni la E'a yoma hota Enal it pa tmormiori-tdardiari pia nodi liarni. Mormiori-dardiar die emolmolan nekama re'a-tniaru maka Uplerlawna Nwahi' targa oleka la Ilyamou-Watyatoha pa hota Nala mai ita. Ne hade de hota emolmolan nekama re'a-tniaru maka ta'en niana niata onde ngehpa onde nmadwuri. 5 Miy mpiesiay lia Uplerlawna. Ne la' miy pesiaymi de pede Enala plolli-mneheni natiak reri miy pia la'pa ntutu-nte'ela' lera noha niatni. Totpena la' Yesus maimiaini mak kodia mormiori-lewlewan de, de miy miana mrie' pa mlier la mormiori-lewlewna. 6 Mere hota la' lera ho'ke'eni di de mlier la lui-nuhru la'a yamuki-yama'ala, kropna-krieutu, nniahora-nniala'a. Mere la'pa emkade ho'mana hota mihepur toto' meman la lui-nuhru re, yoma mhioratreria mormiori miaka Uplerlawna Nwahi' targa pa hota mliernana. 7 Hota mlier la yamuki-yama'ala nniahora-nniala'a totpena mtiut muemna de miy e mpiesiay toto' memna Orgahi-Orha'a me edonna. Mpiaror tek la maha, maka hota la' lera id de niat weyata. Mah de nek de rala ai ra rhudia. Mere miy pesiaymi hota narehi maha welli. Pa emkade walia hota rala kropna-krieutu ra rhudia miy pesiaymi de totpena rat niohora pesiaymi de plollolli me rurni-laini. Ne la' pesiaymi mak karur die, pede hota mliernan ya'uli-yawedi, yatota-yawawa la' ler maka Yesus Kristus Nmai owa'an pa rimormiori honona rlina-rmat (ramkek memna) E'a. 8 Ina-nara, la' ululu de miy edon mlina-miat Yesus Kristus de, mere emkade ho'mana mial ralammi pa nod rer lia E'a. Ne la'a dodo'ondi de miy edon mimkek nan walia mere mimpiesiay E'a ne mimuki-mihepur nohor memna, 9 yoma miy e mlier la mormiori-lewlewna. Mlier la mormiori-lewlewan de yoma miy mpiesiay E'a.
10 Mormiori-lewlewan di maka Uplerlawna Nal tiy miy die, ed maka makwohorulu-ktatrulu rakot nohora la' ululu. La' ler ululu de rpaiki Uplerlawna nnio'oni-niatnu pa rwarora-rwalai niohora 11 totpa irat muemna hota emkameni la, me mowen nianpena ha rdunti-rwetria Kristus de pa nhor diewade ra'uli-rawed E'a la gen tiutullu. Rwaror nohora hade yoma Kristus Nhiwni mak kdella ir ihranu ralamni Nakot olek la ir de hota Kristus de Nler la kropna-krieutu nanpena Nler la ya'uli-yawedi. 12 La' ululu meman de Uplerlawna Nakot targ olek walia la makwohorulu-ktatrulu re la'a mormiori-lewlewan di, Niwra E nnio'oni maka nhi'inde makwohorulu-ktatrulu e rakot nohora, hota edon ntuin la' makwohorulu-ktatrulu re lerni mere la' miy lermi. Ne la'pa ntutu-nte'ela lera-mela ri, Uplerlawna Nhiw Lululli mak kwatiawua Ilyamou-Watyatoha Nala plolli-mneheni pa riy rma rakot nohora Kot Kalwieda-Paitiota la'a mormiori-lewlewan di tiy miy wia. Ne Uplerlawna hopopanni-lili'irnu la Ilyamou-Watyatoha ho'mana rlina-rmata totpa rna'erit nan nohora Uplerlawna hihi'ini-yapyapni la'a mormiori-lewlewan di.
Onnila hare honona maka Uplerlawna Nhi' nana tiy miy die pede mliernohora E' mak kakleha do'a-hala
13 Ina-nara ama-hyali, yoma la' hare honona maka Uplerlawna Nhi' nana tiy miy die, pede mpiahi' targa pa mliernohora Uplerlawna lirni, miodi inonmi re la plol wawna, la'pa mhia'ara pitga inonmi la'a mormiori-dardiari yara'a-yapalu mak hota Uplerlawna Nala tiy miy la' Yesus Kristus maimiaini de. 14 Mitlina-mitailla Uplerlawna miy Amlawanmi de, ne yana mliernohora nhiol yatyata mak ka'hira ralma-riormi la' ululu, la' lera miy edon miat mua'ta Uplerlawna. 15 Rwaldioinia de la' hya' to'owa la mormiormi de yana mhi' do'a-myap hiala, emeknekama Uplerlawna nhiolli mak kakleha do'a-hala. E Nmeh'a ed maka kwalir nian miy pia Nhi' miy lia E gah wamueheni mak kakleha do'a-hala. 16 Pede yana mhi' do'a-myap hiala yoma la'a Puka ralamni de e rhorat targa Uplerlawna lirni Niwra: “Yana mhi' do'a-myap hiala yoma A'ukleha do'a-hala.” *1:16 Imamat 11:44-45; 19:2; 20:7
17 Miy msiumbain de nhi'inde mpiet la Uplerlawna de miy Ammi toh! Ne miy Amlawanmi de ed maka hota Na' reria watghudi la rimormiori de edonna Nwaliria matni enni, mere nlola rhi'ina leltiutu-relan mahmera (nhudi-npara rimormiori nlernohora ir hihi'ini-yapyapni). La' hade pede miatu mi'unni-mimta'ata Uplerlawna pa mhiol lia plol wawna la mormiormi tetema la' nohkeran di, yoma miy mormiormi di, de emolmolan nekama riy mak klaun la riy nohoni la ler ho'ke'eni to'a. 18 Mhi' emkade yoma miy e miat niohora hota Uplerlawna Nala hya' pa Ntuwu-nhai miy totpena ra ralgot miy lia'a mormiori-dardiar miak edon kperkuna, maka upmi-tgarmi re rhakar nohora. Uplerlawna edon Nala leli-maha mak hota tani ha na'ana onde karte'a ha nweyata pa na Ntuwu-nhai miy. 19 Mere Enala maka ktulliawna-kwelwierta, de Yesus Kristus rarni inhatta. E orgahani Nmeh'a maka Nwal lia Duma mak kakleha do'a-hala kuku' eti, pa rhi'a la hopopa-hegeuru hoihoi-tantiani la Uplerlawna. 20 Yesus Kristus ed maka Uplerlawna Ntutmuata-nkewra'a la' ululu memna, la' ler maka Uplerlawna edonna Nakoki-nayap mia'ta nohkeran di. Ne la'pa la' ler di maka nhi'pa la'awa noha niat wa, Uplerlawna Nhopan doin E' pa Nmai wia totpena mlier la mormiori-lewlewna ralamni. 21 Uplerlawna ed maka kamoria Yesus Kristus la matmiati ralamni, ne ema Nran nana la' gen tutulu. Ne la' Yesus Kristus hihi'ini-yapyapni la miy rerieimi, pede mpiesiay lia Uplerlawna. Emkade pede mpiesiaya me mhia'ara aranmi la Uplerlawna de hota Namori-nalewan miy.
22 Ina-nara, la'a lera-mela ri de mimou-miwitna oleka inonmi onnila mitlina-mitail olek la Uplerlawna Kot Kalwiedni, pede dodo'ondi de miatg oleka pa mtiulla-msiayni makpesiay wialmi pa emeka riy id nora hyalli. Pede a'ukot tiy miy die, hota miala ralammi tetema pa miy idma mtiulla-msiayn ida. 23 Yoma miy mlier olek la mormiori-dardiari warwuaru die edon onnila rimormiori nohkeran di mak hota edon nalo'on wali ne rmati. Mere rwaldioin la de onnila Uplerlawna miy Amlawanmi makden pa nodi liarni de Nala E lirni-tunnu mak kodi plolli pa na Namori-nalewan miy. Yoma E lirni de nodia mormiori-dardiari, ne lir de ed mak kodi plolli pa nodi liarni.
24 Yoma emeknekama ha rhorat targa la Puka ralamni de e niwra:
“Rimormiori riwnu-halli honona de emeknekama wewna me tullu-petanni, preheni-mkaini nor wutga rurni-laini re, emeknekama wewan deutu. Yoma hota rimormiori honona re rmati-rmolu me tullu-petanni re nhorwua pa emeknekama wewna mak kapliau wua pa dewatnu mana napi'ir wa.
25 Mere Orgahi-Orha'a lirni-tunnu de nden nek la pa la nodi liarni.” †1:25 Yesaya 40:6-8
Ne lira tun die, de Kot Kalwieda-Paitiota maka ha rakot targa tiy miy.