2 Tesalonika
Krei mutnu makden la Tesalonika re ralma-riorni edon nat niohora plola la'a Yesus Kristus maimiaini la' re'eni wornu pa nhi'nande napenga riy ihranu ralamni. Paulus horatni re'eni wornu de totpena na nhi' ahorga wniarora-wnialaiya mak kapenga ihru ralma re. Yoma la' ir wniarorni de hota Yesus Kristus de maimiaini la' re'eni wornu de nmai olekwa. Ralma-rior de nhal tetema yoma Yesus Kristus de edonna nmai mia'ta de hota yawunu-yawenna hankerna-ralmha'ara, la'a noh keran di wawannu hota nha'at pa nodi liarni, ne hota mak khi' o'tani la yatyata-halala re, de rimormiori metam keranni ida maka kmori-kdar lia yatyata-halala pa nora Yesus Kristus rwahapra lia'ara-rwarahmi wehla.
Paulus nakot nohor la'a mak kpaikia puka de, totpena yana irwadur la pesiayni la Yesus. La'pa rlernana wutwutu-kokgohu mana yana rwadura. Paulus nakot la re totpa yan memmemna inon werta la yahaka tiernu-apannu pa emekwalia Paulus nor talanwalli re. Me la' walia totpena yan memmemna rahniol yata.
La' puka di de e rakot nohor emkadille:
1. Mulaliaini (1:1-2)
2. Nakot nohora la me na'uli-nawedia (1:3-12)
3. Nakot nohora la'a Yesus maimiaini la' re'eni wornu la nohkerna wawannu (2:1-7)
4. Nnio'a-niatu la riy Kristen nhiolli-lietni (3:1-15)
5. La' hohoni (3:16-18)
1
Paulus nwak kalwieda
1 A' di Paulus, aghorta di tiy miy, ina-nara ama-hyali la'a krei mutnu makden la Tesalonika. Miy miak kla' oleka Uplerlawna, makla' Am la it hononita, me Itmatromni Yesus Kristus mutnu-rahanu. La' am di de Paulusa, Silas, me Timotius,
2 ampak de Uplerlawna it Amlawanni de Nora Itmatromni Yesus Kristus pena ed mak kala ra'ani-pallu me kalwiedni-paitiotni tiy miy.
Paulus na'uli-nawedia Uplerlawna onnila makden Tesalonika pesiayni
3 Ina-nara ama-hyali, ama'uli-mawedia Uplerlawna, onnila miy pesiaymi. Ne meman neka la a kniar miamni de ha yala'ani de emkade. Yoma miy pesiaymi di yeher to' pa narur lia Yesus Kristus, ne nhi' wal pia miy rur wial lia nhiolia kalwieda-paitiot la' idma ntulla-nsayni ida. 4 Miy kalwiedmi emkade pede nhi'inde amla mtomra-mnah'a la Uplerlawna kreini mutnu, de ameh'a neka mpahaur nohor mamain miy lia ira. Amahepur nande amakot nohor miy pesiaymi la'a Yesus Kristus, la'pa mlier wal lia kropna-krieutu nniahora-nniala'a nodia pa la' dodo'ondi, mere la' hare honona de miy edonna mpiadura.
5 Mlier la kropna-krieutu nniahora-nniala'a, mere miy edon mpiadura, pa nmeh'a namemieheiya, de hota la'pa Uplerlawna Nhudi-npara rimormiori la watghudi lokarni, de Uplerlawna hihi'ini-yapyapni de naplola, edon nhala. Pa hota Uplerlawna Netlia de, miy er maka Uplerlawna Ntutga pa mlier la gen miaka Uplerlawna Nodi plolli emeka Ray pa nodi liarni. Yoma dodo'ondi mlier olek la liwtu-odwa lui-nuhru, yoma Uplerlawna Nodi plolli mai miy lia nohkeran di. 6 Hya'a maka Uplerlawna Netlia la'pa Nhudi-npara rimormiori la watghudi lokarni, de naplol memna. Hota naplola pa Nwahla riy maka knutin-kdahla miy, de nhiolli-lietni. 7 Ne la'pa miy lia dodo'ondi, de mlier la kropanni-krieutnu emekwalia ami. Pena Uplerlawna ed mak kakerna it liwatnu-odawni la'a ler maka hota Orgahi-Orha'a Yesus Nwatiawu Ilyamou-Watyatoha pa Nmai. Hota Nmai die tamkeka ai maka nlomlomra la lyanti, de Enor rewre'wa E hopopanni-lili'irnu mak karuri-kalai pa rerun la nohkerna-rai marna wawannu. 8 Enerun de totpena Nukmua riy mak edonna kwarei-kwadana Uplerlawna, mak edonna kwehwa-klakta pa rlernohora Kot Kalwieda-Paitiota maka rakot nohora Yesus Itmatromlawanni. 9 Riy mak emkare hota rlernana niukum matmiati-molmuolu mak kodi liarni, pa rreidioinia la Orgahi-Orha'a herni-gaini, me hota Enolin limni la pede hota edon ramkeka Itmatromlawanni plolli-mneheni tutullu-lolo'oni. 10 La' hare honona de hota Enhi'a la'a lera Ha Nmai die, totpena Nlernana ya'uli-yawedi lilili-mamuawua onnila hya' maka Ha Nhi' nan oleka la ita mak kla' E kamieheni, makpesiay E' de rerieini. Hota miy wal pia mlier wut lia makpesiaya re, yoma mpiesiay oleka hya' maka amakota tiy miy. 11 Emkade pede nhi'inde amsumbain reri miy. Amsumbain totpena Uplerlawna maka tkola tieru-tawur nehla la de, Netlia de miy er maka mliernana hya' maka Npol miy pia mliernana. Ampak la Uplerlawna totpa wniarormi-wnialaimi kalwieda-paitiota, me nhioli-lieta honona maka miy pesiaymi nodi miy lia de, Uplerlawna plolli-mneheni nodi miy totpa hota mhi' nana-myap niana. 12 Amsumbain emkade totpena hota Itmatromlawanni Yesus Nlernana ya'uli-yawedi onnila miy, me totpa Yesus mana Nran miy nanmi la' heyanna yoma ita Uplerlawanni Nora Yesus Kristus ralam kalwiedni tiy miy.