7
1-2 Nhor nioka ray nora Haman rla pa ror Ester ra'an nana re'eni wornu la'a Ester mei wawannu. La'pa e remun reria arka noma ray natiana Ester niwra: “Nara, yanpa omuiwra mukot hadom de, mukota wa! La' hya'a maka ompuaka pa nahniakar worg ho'ola la'a lodna hairi di mana, hota gala tiy o'a.”
3 Noma ratu Ester nakot la niwra: “La'pa tun ray nwayow nohora a'u die me alia' nana tun ray ralamni, de awuak pa agora a lu'wu-a'na wa'lu re yana rlernana wniunu-wnienna. 4 Yoma agor wut nieka a lu'wu-a'na wa'lu re honona de ha yaweli-yapar oleka am pia pa hota rwunu-rwenna doin meman ami. Mere la'pa ra'olga am pia rhi' am lia ata-wa'ara de awuarora de hade edon nhi' hadoma, ne a' muana hota a'g edonna mua ukot nohora owa'an la tun ray pa tun ray nwarora rupni-rupni. Mere la' hadi de hota rwunu-rwenan momuog ami!”
5 Dewade ray Aswerus natiana ratu Ester niwra: “He' nparan pia nhi' emkade tiy miy? Riy de etla hanme?”
6 Noma Ester niwra: “Haman e orgahani mak kamtatan di. Merni-metamni e inhatti maka khi' am lia arwalli, me e' ed maka knahora-knala' ami!”
Dewade Haman namta'at nande gaini nwahra la ray nora ratu gaini ralamni. 7 Ray nahankeran nande naprir dioin la mei maka e nemun reria arka la, ne nlergot wa, pa nla'awa la kruwun genni walli tio'ora. Haman nat muemna de ray hota nwaror oleka pa nwunu-nwen e'a, pede Haman edonna nwarei lia'a ratu Ester onni, totpena nwak pa Ester nalewn e'a.
8 Haman namta'at pa narieiniande nhoplia inonni la'a Ester lew ku'uni wawannu pa niwra nwak pa Ester nhuria e la'a hal wawna. Mere la'pa nhoplia inonni la' Ester lew ku'unu wawannu maka Ester etla wawannu dewade ray mana nhu'ru walia nmai rialam pa.
La'pa nkillia Haman de la' Ester lewnu de wawannu, noma ray nkamota pa niwra: “Hya'a? Ha nparan pia niwra naga'aga ratu la handi la a ga'yu ralamni mai a kruwunge'nu di memna?!”
La'pa ray nakot emkade, dewade mak khima-kre'a ray re rmai pia rpupnia Haman gaini.*7:8 Riy dom rwarora de rpupnia Haman gaini yoma la' gen die nhi'inde rpupnia riy gaini maka riwra rwenna. 9 Noma mak khima-kre'a ray id de mak kwawa Harbona nakot la ray niwra: “Tun ray, la'a Haman romni onni de orgahani enarir tiarg oleka rira liawair geni id de tullu metra terampworu wehrani wolima pa niwra hota nla nwairia Mordekhai maka kalewan nana oleka tun ray la'a ler de loo!”
Dewade ray nal titni de niwra: “Mlia mpiairia Haman la'a riri die hananni!” 10 Pede rla rwair wenna Haman la'a riri liawair maka ha nhi'a pa niwra nla nwairia Mordekhai. La'pa rhi' emkade na'nama ray Aswerus hankeranni namdiaru.
*7:8 7:8 Riy dom rwarora de rpupnia Haman gaini yoma la' gen die nhi'inde rpupnia riy gaini maka riwra rwenna.