1-2 La' ler de, de muanke' ida nanni Lasarus nor rewre'wa narni Maria nora Marta rhol wiutu la' leta Betania. Mari di de ed mak khuria wu'ru hup mikmikri la' Itmatromni lakni, ne nala moratnu na nkuhi akerna. Noma la ler ida de Lasarus e namehra. 3 Pede narni rora rhopan pa rla rod kiot la'a Yesus onnila Lasarus mehrani-maunu. Pa la'pa rla rakot la Yesus: “Matroma, Maria nora Marta narni mak Omsiayn de e namehra.”

4 Pa la'pa Yesus Natlin nana lir de noma Nakot la Niwra: “Hota nnien die edonna nodia matmiati la' Lasarus. La' hare honona de itamkeka totpena ya'uli-yawedi nden rer lia Uplerlawna, me totpena nden rer wial lia Uplerlawna A'nani A'u.” 5 Yesus Nsayn reria Marta, Maria nora narni Lasarus. 6 Mere la'pa Yesus Natlin nana Lasarus e namehra de, noma Entot pa Nden nek la hande pa mahnekni lera worg owa'ana.

7 Lera woru nte' doin la dewade Nakot la maka ha Nwatutu-nwaye'a re Niwra: “Mai pia tawal lia Yudea.”

8 Noma rakot la riwra: “Tungkurga, na'nama riy Yahudi riwra rwatliewria O'a la' hande totpa rwunu-rwenn O'a, noma dodo'ondi Omuiwra muwali owa'ana?!”

9 Noma Yesus Nnairia yawalliohora (totpa ratga de la'pa hota ror E' talla de hota edon rler la kropna-krieutu yoma lerni edon ntutu ma'ta) Nakot la Niwra: “Miplinga de la' lera ida, de lera nhita-nrepra jama termida wehrani woru?! Riy maka kor rewre'wa A' tialla de emeknekama nalala' lola lelerni, pede edonna ndunti-nwetru, yoma e namkek reria noha wawannu. 10 Mere mak kala'a la lera mel'utni de hota ndunit taru, yoma noha melmela-kalkalma.”

11 Yesus lirni emkadella ira na'nama Nakot owa'an la re Niwra: “It talanni Lasarus e nanin oleka wa, mere pena A lia umata.”

12 Noma maka Yesus ha Nwatutu-nwaye'a re rakot la riwra: “Matroma, la'pa Lasarus nanina de hota plet pa nkalwieda.” 13 La'pa Yesus Niwra “e nanina” de Yesus ralma-riorni de Lasarus nmati olekwa. Mere iratniekame Yesus ralma-riorni, de Lasarus e nanin toto'a.

14 La hade pede Yesus Nto'pi-ngaur lirni Niwra: “Plollolli de Lasarus nmati olekwa, 15 mere hota hadi nwal lia talan pa mimpiesiaya. La' hade pede A ralmu e nahepru kennama A'g edonna lia'a hande wonyira-melulu pa Aghi' kalwied e'a. Mere dodo'ondi de mai pia tla teka Lasarus mak kmat die!”

16 Noma Tomsa, maka rhoiya la A'na Dio' de nakot la mutwualli maka Yesus ha Nwatutu-nwaye'a re niwra: “Mai pia tlernohora Yesus la Yudea, la'pa tmat niohora E'a.”

17 La'pa Yesus Nte'ela Betania noma rakot la Yesus de riwra, rkenia olek Lasarus inonni la liena ralamni pa lerni wogat olek la hande wa. 18 Mere leta Betania di, de olietni la Yerusalem, de edon nhal de kilu wotelu. 19 Pede riy Yahudi liawanni rma rod niohora Marta nora Maria totpena ramatar nohora yoma narni nkurn olekwa. 20 La'pa Marta natlin nana Yesus Nmai nieka, dewade nla nwatroma Yesus, mere Maria edon nlergot ma'ta.

21 Noma Marta nakot la Yesus niwra: “Matroma, la'pa ler de Matro'mu etla handi mana taken niana a na'ru de nmati. 22 Mere Agat niohora meman de la' dodo'ondi wali pia Uplerlawna hota Nal to'a hya'a mak Matroma Nwaka la E'a.”

23 Yesus Nakot la Niwra: “Marta, o narmu de hota nmori owa'ana.”

24 Marta nwalolla: “Matroma, Agatga de hota Lasarus nmori owa'an la'a lera noha niatni maka ramoria mak kmati rella matmiatni ralamni.”

25 Noma Yesus Nakot la Marta Niwra: “A'g ed mak kamoria mak kmati me gal mormiori lia ira pa nodi liarni. Riy mak kpesiay A' die hota matmiati edon nodi plolli la mere rmori owa'an la'a matmiatni ralamni. 26 Ne mak kmormiori mia'ta, makpesiay A'u, de hota rler la mormiori plalahwa pa nodi liarni. Hota ompuesiay lir maka A'ukota re me edonna?”

27 Marta niwra: “Matroma apuesiaya, Matro'mu de Uplerlawna A'nani mak khi'a Ray Makamori-Kalewna maka Uplerlawna Nano'taru pa Nmai lia nohkeran di wawannu.”

28 La'pa Marta nakot emkade noma nla npolga elli Maria pa napup lia tlinni niwra: “Tungkuru Nmai olekwa ne e Natian o'a.” 29 La'pa Maria natlin nan hade noma namat doin pa nla nwatrom Yesus. 30 La hade de Yesus edonna nler ma'ta la leta ralamni. Enden ma't la leta to'orni maka Enor Marta rwatrom pa rwahauru. 31 Riy Yahudi maka ramatar nohora Maria la' roma nayanni, la'pa ramkek nana Maria pleta-plet pa namat doin wa pa nlergot wa, noma rla rlernohora Maria yoma ratniek yanpa Maria nla nkakur la Lasarus hoini wawannu.

32 La'pa Maria nte' tar lia Yesus onni noma nwaltior la Yesus gaini ralamni na'nama nakot la niwra: “Matroma, la'pa Omdien la handi mana la ler de, a na'ru de edonna nmati.” 33 La'pa Yesus Namkek nana Maria nkakru, me la' walia riy Yahudi mak kor rewre'wa Mari' talla re honona rko'a-rkakur wali, dewade Yesus mana ralamni nmayo' doin wali.* Riy dom de rwarora lir (kata) di la yawala Yunani de nnia'eratni de “nawenna”. Rwarora yanpa Yesus Nawenna yoma riy edonna rpesiay E'a, onde onnila Nahmena Lasarus nmati. 34 Noma Yesus Natiana re Niwra: “Miy e midera Lasarus inonni la hanmeni?”

Noma rwalolla riwra: “Ma Mumkeka Matroma.”

35 Noma Yesus Nkakur wa.

36 Noma Yahudi re riwra: “Mimkek to'ola hade e Nsayn wenna Lasarus.”

37 Mere la' dom de e riwra: “Hade nhi'a mak matni kyata pa rkalwieda ne nihya'pa E edonna Nhi' Lasarus pa edon nmati?”

38 Noma rla'awa lien maka rkenia Lasarus inonni de. La'pa rte'ela hande Yesus ralamni nmolu-nhelma. La' hande e rala wat liawna id la ra rherit targa lienni de nhiarni. 39 Yesus Nakot la re Niwra: “Mpiaklol doinia wat diel la'a nhiar de gaini.”

Noma Lasarus mak kmat die narni Marta nakot la niwra: “Matroma, rader olek hadella' melul handena, la lera wogat olekwa pa hota inonni ngehpa-nta'l olekwa!”

40 Noma Yesus Nakot la Marta Niwra: “A'g e ukot oleka hare tiy o'owa Marta. La'pa ompuesiaya de hota o' e mumkeka Uplerlawna preheni-mkaini.”

41 Noma rte'la la wat liawan de pa rwaklol dioinia. Nhor nia'nama Yesus Nwatniar la lyanti na'nama Niwra: “Ama, A'u'uli-uwedi O'a yoma Omutlin olek la mai A wua. 42 Agatga de O tlinmu e Natnia'wa rer lia A li'ru, mere A'ukot nohora harilla' rimormiori mak kden la handi, totpena rpesiaya O' nanpena ed maka khopn A'u.”

43 La'pa Nakot emkade, na'nama Nhaun matmiat pia Niwra: “Lasarus ee! Mliergot pa mmuai ee!” 44 Noma Lasarus mak kmati olek de nlergot wa. Limni-lakni e ratnioman ma'ta la koka, ne gaini e natniutuw la kokanan maka ra rtutuw gaini.

Yesus Niwra: “Miewar doinia kok lawan della totpa nala' de yana nawuhi-nawe'eta.”

45 Riy Yahudi harahu maka kma kamatar nohora Maria, de rpesiaya Yesus, yoma ramkek oleka hya' mak Yesus Nhi' nan oleka re. 46 Mere riy dom pal lia ira, de rla rod lir la riy Parisi la'a hya' maka Yesus Nhi'a-nyap niana re. 47 Hade pede riy Parisi rora imam re o'tani-matni, rpolg awoka mak ktorna watghudi la agama Yahudi honona pa rawok wutu.

Honona rwaror pa riwra: “Hota itsi'a hya'a la Hadena? Riy di Nhi' neka hihi'a-yapyapi mak kamehi-kayona mak ktutga E rurni-laini. 48 La'pa it edonna tatut niana hade, de hota rirahu rpesiaya, pa reiniande kokokna-rariarni lalawna, ne la'awa honi de hota mak kodi plolli la hairi Roma rmai pia hota rwakloli-rwaklalia Yahudi itora it roma kreini di.”

49 Riy id etla hande, nanni Kayafas, la' anin de, nhi'a o'ta-mata lalawna la imam-imam re, pede niwra: “Hoi! Miy e miplinga hadomdoma. 50 Miy e miplinga de la' samomuounu de rirahu nariei pia riy ida nmati, mere yana riy ida nariei pa it luwnu-a'nani namkoha-namnanna.”

51 Kayafas enakot hade, mere ha wniaror wamueheni atia' hade mere yoma Uplerlawna Nariei. Enakot nohora hare yoma la'a anin de ralamni de, E de, o'ta lawna la imam-imam re, pa lirni de nror targa (nakot targa) Yesus matmiatni de yoma la'a Yahudi rerieini. 52 Ne edonna ntut nian to'a riy Yahudi rmeh'a mere la' walia Uplerlawna upni-a'nani mak kden la meni-meni totpa hota rawok wutga la ida. 53 La'pa ler de meman pa mak kodi plolli la Yahudi re rla lir id pa riwra rwenna Yesus.

54 La' hade pede Yesus Nahmena Nayamkek la riy mutlialawna riy Yahudi nhiopannu-pniepanni. Yesus Nwaran la hande pa Nla'awa la' let maka ha rweta la Efraim mak rehgorgorga wo'orletna-kawurloini. Yesus Nor wutga maka ha Nwatutu-nwaye'a re rden la hande wa.

55 La' ler de de nhi' pa nwakriania lera-mela Yahudi lerlalawanni Paska. Pa rirahu rwatiawua leta-ruhuna re pa rtawniokria Yerusalem totpena rlernohora riy mutlialawna wokni-le'enu pa ramou-rawitna inonni totpa rwei lerlalawan mak hota ha rhi'a de. 56 Noma la'pa rawok la Uplerlawna roma kreini de rahakhak reria Yesus pa idma nakot la ida riwra: “Emkamenila miy ralma-riormi? Matialo'onama E' edonna Nmai lia'a lerlalawna ri?” 57 Irakot emkade yoma la imam-imam re o'tani-matni rora riy Parisi ralgot oleka tita la'a riy meni mak kat niohora Yesus handen la, de plet pa nma nakot totpena rla rtorna.