“Orgahi-Orha'anu ne! A'g etla klieratni di pa apuol oleka tiy O'a, ne Mpuahla nan a li'ru. A'g etla noh mati-rai miolu pa awuaka tniulan tiy O'a. Ne Mhueri tlinmu-mpual miatmu olek la'a a polpuo'lu.

3 O ed maka kwaliakra alia la'a geni kdieldelma la'a hletan lawna wikwikni. Gera tahi' nora wawuau liawna rado'y a'u. Yo'or tah'i lawna mak Omuala re nwakloli-nwaklali a'u.

4 Awuaror la' a ralmu giwra: “ORGAHI-ORHA'A Nhokr olek alia la' E gaini ralamni we! Mere hota alina-muat owa'an la E roma nayanni mak kmou-kwitna dena!” *2:4 Riy dom to'a rwarora ayat di nnia'eratni emkadilla: “Hota emkameni pede alina-muat owa'an la E roma nayanni mak kmou-kwitna dena?!”

5 La'pa tahi' lola tieru de a'g etlia hletna-yoiri letgara-mneneheni. Illu-retre'eta nawniotra-natniallia la' a o'tu.

6-7 Awuakliolli erun la' wo'or tutulu nayanni la'a noha wikni-ray gerni. Awuarora de alier olek la noha mati-rai miolu me hota a'g edon liergot owa'ana yoma pinta puohrani erayahro'pa pa nodi liarni.

La'pa nhi'pa awaran doin a arnu na'nama aghoratna'nu pa a puol tiy O'a, Orgahi-Orha'anu ne! Dewade a sniumbainu de O e Mutlin reria la'a O genmu-tienmu mak kmou-kwitna. Dewade O' orgahamu ed maka kamori-kalewan a lia' noha mati-rai miolu. Oo ORGAHI-ORHA'A Uplerlawnu nee!

8 Riy mak kden rer lia kniola tieru-niawur nehla la hya' mak kakleha ruri-lai, de la'a uplera-upmati, rawlar dioin olek O'o wa, mak ktutga O ralam kalwiedmu la'a rimormiori!

9 Mere a' di de hota agal hoihoi-tantiani la' O'a de awuatunu-wahniar pa ga'uli-uwed re'ru. Ne la'a hya' maka a'g wuettar tiy O'a de hota gala. ORGAHI-ORHA'A, plollolli de O' inhatta ed maka kamori-kalewn rimormiori.”