1 Mɑnɑsee lʋlʋɣʋ pɩɩsɩ nɑɑnʋwɑ nɑ nɑɑlɛ nyǝŋkɑ tɑɑ kɛ́ ɩ pǝsɑ Yutɑ wulɑʋ. Ɩlɛnɑ ɩ́ lɑ́ pɩɩsɩ nɩɩlɛ nɑ nɑɑnʋwɑ nɑ kɑkpɑsɩ kɛ Yosɑlɛm. Pɑ yɑɑkɑɣɑ ɩ too sɩ Hefisi-Pɑ. 2 Ḿpʋ́ɣʋ́ Mɑnɑsee lɑpɑ mpi pǝ tɑ mɑɣɑ Tɑcɑɑ tɔ. Ɩ kɛɛnɑ piitimnɑɑ mpɑ Tɑcɑɑ tɔɣɔnɑɑ nɑ pǝ́ fɛɛ-wɛ tɔ, pɑ lɑkɑsɩ ɩsɑɣɑsɩ. 3 Hɑlɩ ɩ́ tɑɣɑnɩ ŋmɑʋ kɛ tǝkɔtǝlɛnɑɑ mpɑ ɩ cɑɑ Ɩsekiyɑsɩ nɑ́ɑ́ yɔkɑɑ tɔ. Ɩ́ ŋmɑ́ tʋɣʋ Pɑɑlɩ tǝlɑɑlɛnɑɑ, nɑ ɩ́ sɑɑkɩ tesikɑ kʋlɑlɑɑɣɑ, ɩsɩɩ Ɩsɛɣɛlɩ wulɑʋ Akɑpɩ lɑpʋ tɔ, nɑ ɩ́ luŋiɣi ɩsɔtʋlʋŋɑsɩ. 4 Nɑ ɩ́ ŋmɑ́ tǝlɑɑlɛnɑɑ lɛmpɑ kɛ Yosɑlɛm Ɩsɔ tǝsɛɛlɛ nte Tɑcɑɑ kɑ tɔmɑ sɩ ɩnɩ ɩ kɑ́ cɑɣɑ tɔ tǝ tɑɑ. 5 Nɑ ɩ́ siki ɩsɔtʋlʋŋɑsɩ tǝlɑɑlɛnɑɑ kɛ Ɩsɔ tǝsɛɛlɛ tɑɑsɩ nɑɑlɛ tɔɔ. 6 Hɑlǝnɑ ɩ́ lɑɑ ɩ pǝyɑlʋ kɛ tʋɣʋ, nɑ ɩ́ lɑ́ topotopo tǝmɑ ɑnɩ ɑ tǝnɑ, nɑ ɩ́ sʋsɩ kɔɣɔnɑmǝŋ. Mpi pǝ tɑ mɑɣɑ Tɑcɑɑ tɔɣɔ ɩ lɑkɑɣɑ tɑm. Ɩlɛnɑ pǝ kpɑ ɩlɛɣɛ pɑ́ɑ́nɑ́. 7 Nɑ ɩ́ sɑɑkɩ tʋɣʋ ɑlʋnyǝŋkʋ Aselɑ lɛɛsʋɣʋ nɑ ɩ́ sɩɩ Ɩsɔ tǝsɛɛlɛ tɑɑ. Pǝyele Tɑcɑɑ kɑ tɛmɑ Tɑfiiti nɑ ɩ pǝyɑlʋ Sɑlʋmɔŋ kɛ heeluɣu sɩ: Yosɑlɛm ɩcɑtɛ nte mɑ lǝsɑ Ɩsɛɣɛlɩ kpekɑ nɑɑnʋwɑ nɑ nɑɑlɛ tɑɑ tɔ tǝ Ɩsɔ tǝsɛɛlɛ tɑɑ kɛ́ mɑɑ cɑɣɑ tɑm kɛ mɑ yǝlɑɑ hɛkʋ. 8 Ye Ɩsɛɣɛlɩ yǝlɑɑ tɔkǝɣɩ mɑ kʋsǝsɩɩtʋ, nɑ mɑ kiiŋ wei mɑ tǝmlɛ tʋ Moisi cɛlɑ-wɛ tɔ, mɑ kɑɑ yele nɑ pɑ́ tɔɣɔnɩ-wɛɣɛ tɛtʋ nti mɑ hɑ pɑ cɔsɔnɑɑ tɔ tǝ tɑɑ. 9 Amɑ Yutɑ nyǝ́mɑ kisɑ Tɑcɑɑ kɛ nɩɩnɑʋ. Hɑlɩ Mɑnɑsee nɑ́ yelɑɑ kɛ́ nɑ pɑ ɩsɑɣɑtʋ kǝlɩ, ɩsɩɩ piitimnɑɑ mpɑ Tɑcɑɑ kpiisɑɑ nɑ pǝ́ fɛɛ mpɛ tɔ.

10 Ḿpʋ́ɣʋ́ Tɑcɑɑ heelɑ ɩ kʋyɔɣɔtʋtʋ tɛlǝsǝlɑɑ sɩ pɑ́ heeli Mɑnɑsee sɩ: 11 N lɑpɑ ɑcɑɑlǝtʋ. N tɔmɑ ɩsɑɣɑtʋ tɑɑ nɑ pǝ́ kǝlɩ lɔŋ Amolii nyǝ́mɑ. Hɑlǝnɑ ń tusi Yutɑ nyǝ́mɑ kɛ tɩɩŋ lɑɑʋ tɑɑ. 12 Pǝ tɔɔ kɛ́ mɑɣɑ Tɑcɑɑ Ɩsɛɣɛlɩ Ɩsɔ, mɑɑ kɔnɑ ɑlɑɑmɑli nɔɣɔlʋɣʋ Yosɑlɛm nɑ Yutɑ nyǝ́mɑ. Pɑɑ wei ɩ́ nɩɩ-tɩ pɩɩ sʋsɩ-ɩ wɑtʋ. 13 Mɑɑ hɔ Yosɑlɛm nyǝ́mɑ ŋkpɑŋʋɣʋ, ɩsɩɩ mɑ lɑpʋ Sɑmɑlii nɑ Akɑpɩ lʋlʋɣʋ nyǝ́mɑ tɔ. Mɑɑ kpiisi ɩcɑtɛ yǝlɑɑ, ɩsɩɩ pɑ nyɑɑlʋɣʋ nyɑnɑɣɑ tǝcɛɩcɛɩ nɑ pɑ́ pɑ́ tɔ. 14 Mɑɑ lɔ yǝlɑɑ mpɑ pǝ kɑɑsɑɑ tɔ. Mɑɑ tʋ-wɛɣɛ kolontunɑɑ niŋ tɑɑ, nɑ pɛlɛ pɑ́ kuu pɑ nɑ pɑ wontu. 15 Ḿpʋ́ɣʋ́ mɑɑ lɑ. Mpi tɔ, hɑtoo kʋyɑŋku mǝ cɔsɔnɑɑ lɩɩ Icipiti tɔ, hɑlǝnɑ sɑŋɑ, pɑ tɑ yele mpi pǝ fɛɩ teu tɔɣɔ lɑpʋ, nɑ mɑ pɑ́ɑ́nɑ́ kpɑɑsʋɣʋ.

16 Ḿpʋ́ɣʋ́ Mɑnɑsee lɑpɑ mpi pǝ tɑ mɑɣɑ Tɑcɑɑ tɔ, nɑ ɩ́ tusi Yutɑ nyǝ́mɑ kɛ lɑɑtʋ tɑɑ, nɑ mɑ yǝlɑɑ kʋpɑmɑ tuutuumɑ tɔtɔɣɔ ɩcɑtɛ tǝnɑ tɑɑ.

17 Pɑ kɛɛsɑ Mɑnɑsee tɔm lɛntɩ kɛ Yutɑ ɑwulɑɑ tɑkǝlɑsɩ tɑɑ. Pɑɑ ɩ kʋlɑpǝm nɑ ɩ tɩɩŋ lɑɑʋ tɔm. 18 Wɑɑtʋ wei Mɑnɑsee sǝpɑ, ɩlɛnɑ pɑ́ pimi-ɩ kɑwulɑɣɑ tǝyɑɣɑ hɑlǝm mpi pɑ yɑɑ sɩ Wusɑ hɑlǝm tɔ pǝ tɑɑ, nɑ ɩ pǝyɑlʋ Amoŋ lɛɛtɩ ɩ lonte.

19 Amoŋ lʋlʋɣʋ pɩɩsɩ hiu nɑ nɑɑlɛ nyǝŋkɑ tɑɑ kɛ́ ɩ pǝsɑ Yutɑ wulɑʋ. Ɩlɛnɑ ɩ́ tɔɣɔ pɩɩsɩ nɑɑlɛɣɛ Yosɑlɛm. Ɩ too kɛlɛ Yopɑ tʋ Hɑlu pɛɛlɔ Mesuleme. 20 Ḿpʋ́ɣʋ́ ɩ lɑpɑ mpi pǝ tɑ mɑɣɑ Tɑcɑɑ tɔ, ɩsɩɩ ɩ cɑɑ Mɑnɑsee. 21 Ɩ kɛɛnɑ-ɩ teitei kɛ́, nɑ ɩ́ lɑɑkɩ tɩɩŋ ɩsɩɩ ɩ́lɛ́ ɩ kɑ lɑpʋ tɔ. 22 Amoŋ lɔwɑ ɩ cɔsɔnɑɑ Ɩsɔ Tɑcɑɑ mɑɣɑ, ɩ tɑ tɔ ɩsɩɩ mɑ cɑɑkɩ tɔ.

23 Ḿpʋ́ɣʋ́ kʋyɑkʋ nɑkʋlɩ Amoŋ wɑɑlɩ nyǝ́mɑ kʋlɑ ɩ tɔɔ, nɑ pɑ́ kʋ-ɩ ɩ kɑwulɑɣɑ tǝyɑɣɑ tɑɑ. 24 Amɑ Yutɑ nyǝ́mɑ nɑ́ kʋ́ mpɑ pɑ kʋ-ɩ tɔ. Ɩlɛnɑ pɑ́ kpɑ ɩ pǝyɑlʋ Sosiyɑsɩ kɛ wulɑʋ.

25 Pɑ kɛɛsɑ Amoŋ tɔm lɛntɩ kɛ Yutɑ ɑwulɑɑ tɑkǝlɑɣɑ tɑɑ. 26 Ḿpʋ́ɣʋ́ pɑ pimɑ-ɩ ɩ pǝlɑɑʋ tɑɑ kɛ́ Wusɑ hɑlǝm tɑɑ. Nɑ ɩ pǝyɑlʋ Sosiyɑsɩ lɛɛtɩ ɩ lonte tɑɑ.