3
Ɩsɔ kɑ́ pɔɔsɩ ɩ yǝlɑɑ kɛ pɑ kʋlɑpǝlɛ
1 Ḿpʋ́ɣʋ́ Tɑcɑɑ tɑsɑɑ sɩ: Ɩsɛɣɛlɩ nyǝ́mɑ mpɑ mɛ mɑ lǝsɑ Icipiti tɔ, mɛɣɛ mɑ yɔɣɔtǝɣɩ tɔm tǝnɛ.
2 Mǝ tike kɛ mɑ sɔɔlɑ ɑtɛ yǝlɑɑ tǝnɑ tɑɑ nɑ mɑ́ lǝsɩ.
Pǝ tɔɔ kɛ́ mɑɑ pɔɔsɩ-mɛɣɛ ɩsɑɣɑtʋ tǝnɑ nti ɩ́ lɑkɩ tɔ.
Pǝ wɛɛ sɩ Ɩsɔ kʋyɔɣɔtʋtʋ tɛlǝsʋlʋ ɩ́ tɛlǝsɩ Ɩsɔ Tɔm
3 Yǝlɑɑ nɑɑlɛ kɑ́ kɑɑ mpɑɑʋ
nɑ pɑ tɑ mɑɣɑsɩ kʋ tɔm?
4 Tɔɣɔlɑɣɑ kɑ nyɩɩsɩ yem kɛ́ hɔtʋɣʋ
tɑɑ nɑ kɑ́ tɑ́ hiki tɔɣɔnɑɣɑ?
Ye tɔɣɔlɑɣɑ pǝyɑɣɑ tɑ kpɑ pʋlʋ,
kɑɑ kiisi yem kɛ́ kɑ tɑntɛ tɑɑ?
5 Sumɑɣɑ kɑ tii yem kɛ́ ɑpɑɩ tɑɑ nɑ kɑ́ tɑ́ nɑ toolee?
Yɑɑ puluɣu kɑ́ kpǝtɩ yem nɑ kʋ tɑ puu pʋlʋ?
6 Pɑɑ hʋlɩ ɑpɑlʋtutuɣu kɛ yem nɑ yǝlɑɑ kɑɑ nyɑ?
Yɑɑ wɑhɑlɑ kɑ́ tii ɩcɑtɛ tɑɑ kɛ́ yem nɑ Tɑcɑɑ mɑ́ mɑ tɑ kɔnɑ-ɩ?
7-8 Mpʋ tɔ, ye tɔɣɔlɑɣɑ ɩ́ nyɩɩsɑɑ ɑweɣe sɔɣɔntʋ kɑɑ kpɑ?
Yɑɑ ye Tɑcɑɑ mɑ́ mɑ yɔɣɔtǝnɑ ɩlɛ pɑ kisi mɑ tɔm tɛlǝsʋɣʋ?
Pɔpɔtʋ fɛɩ leleŋ, Ɩsɔ Tɑcɑɑ mɑ́ mɑ kɑɑ lɑ pʋlʋ nɑ mɑ́ ŋmɛsɩ
Ɩsɔ kʋyɔɣɔtʋtʋ tɛlǝsǝlɑɑ.
Ɩsɛɣɛlɩ ɩcɑtɛ sɔsɔɔlɛ Sɑmɑlii nyǝ́mɑ hʋʋnɑʋ
9 Tɑcɑɑ sɩ: Ɩ kpɑɑlɩ Asǝtɔtɩ nɑ Icipiti
pǝ kɑwulɑsɩ kutuluŋ nyɔɔŋ tɑɑ.
Yǝlɑɑ ɩ́ kpeɣeli Sɑmɑlii pulɑsɩ tɑɑ,
nɑ ɩ́ nɑ́ ɩsɑɣɑtʋ sɔsɔɔntʋ nɑ mʋsʋŋ
wei pɑ lɑkɩ tɔ.
10 Pɑ tɑ nyɩ mpi pɑ yɑɑ yɑɑsi kʋpɑŋ tɔ.
Mpi pɑ lɛɛkǝɣɩ mʋsʋŋ nɑ pɑ́ ŋmɩɩlǝɣɩ tɔɣɔ
pɑ nyǝkɑ pɑ kɑwulɑsɩ tɛɛsɩ tɑɑ.
11 Pǝ tɔɔ kɛ́ kolontu kɑ nyɑlɑ mǝ tɛtʋ.
Ɩ kɑ́ yɔkɩ mǝ koloosi nɑ ɩ́ kuu mǝ wontu.
Wɑɑsʋɣʋ lɑŋwɑkǝllɛ nyǝm
12 Ḿpʋ́ɣʋ́ Tɑcɑɑ yɔɣɔtɑɑ sɩ:
Teitei ɩsɩɩ tɔɣɔlɑɣɑ kpɑɑkʋɣʋ heu
nɑ tiikulu hiki nɔŋkpɑɑsɩ yɑɑ ŋkpɑŋʋɣʋ
titite kɛ ɑseetɑ tɔ,
ḿpʋ́ɣʋ́ pɩɩ lɑ Sɑmɑlii nyǝ́mɑ nɑ pɑ kpelɑsɩ kʋpɑŋsɩ.
Ɩsɔ kpɑɑlǝɣɩ ɩ yǝlɑɑ
13 Ḿpʋ́ɣʋ́ Tɑcɑɑ Ɩsɔ Tomɑ tǝnɑ tʋ kpɑɑlɑɑ sɩ:
Ɩ́ tɛlǝsɩ Yɑkɔpʋ lʋlʋɣʋ nyǝ́mɑ sɩ
14 kʋyɑkʋ nɑkʋlɩ mɑɑ kɔɔ Ɩsɛɣɛlɩ nyǝ́mɑ
mɛɣɛ lɛɛtʋɣʋ kɛ mǝ ɩsɑɣɑtʋ.
Mɑɑ wɑkǝlɩ Petɛɛlɩ tǝlɑɑlɛnɑɑ,
nɑ mɑ́ kpɛsɩ kɔtɑɣɑ tǝlɑtɛ hǝlǝŋɑsɩ.
15 Mɑɑ yɔkɩ toŋtʋnɑɑ lʋŋlɛ kutuluŋ,
nɑ yolumɑ nyǝŋ.
Pɑ kutuluŋ wei pɑ lɑpɑ kɑcɔkɑ nɑ tuuŋ kelɑ tɔ,
nɑ pɑ ɑtɛ nɑ ɩsɔ kutuluŋ nɑ ɩ́ pǝsɩ ncɑɑ.
Tɑcɑɑ mɑ́, mɑ yɔɣɔtǝnɑ mpʋ.