1 Ḿpʋ́ɣʋ́ Moisi kotɑ Ɩsɛɣɛlɩ nyǝ́mɑ tǝnɑ nɑ ɩ́ tɔ-wɛ sɩ: Ɩ́ nɩɩ kʋsǝsɩɩtʋ nɑ kʋtʋtʋtʋ nti mɑ tɛlǝsǝɣɩ-mɛɣɛ sɑŋɑ ɩsǝntɔ tɔ. Ɩ́ kpɛlǝmɩ-tɩ nɑ ɩ́ tɔ́kɩ-tǝɣɩ teu nɑ ɩ́ lɑkɩ. 2 Tɑ́ nɑ Tɑcɑɑ tɑ́ Ɩsɔ tǝ pɛɛlɑ nɔɣɔ kɛ́ hɑtoo Holɛpʋ pʋɣʋ. 3 Nɑ kɑ tɑ kɛ tɑ́ cɑɑnɑɑ mpɑ pɑ tɛmɑ sǝpʋ tɔ pɑ tike pɑ tɔm. Amɑ nɑ tɑ́ mpɑ tǝ wɛnɑ tɑ́ ɩsɛ kɛ sɑŋɑ ɩsǝntɔ tɔ tɑ́ nyǝntʋ tɔtɔɣɔ. 4 Tǝnɑɣɑ kɔkɔ mʋkɑɣɑ pʋɣʋ, nɑ Tɑcɑɑ yɔɣɔtǝnɑ-mɛɣɛ kɑ tɑɑ nɑ ɩ́ nɩɩkɩ ɩ nɔɣɔ. 5 Hɑlǝnɑ ɩ́ nɑ-kɛ nɑ sɔɣɔntʋ kpɑ-mɛ nɑ ɩ́ kpisi kʋ tɔɔ kɛ́ kpɑʋ. Ɩlɛnɑ mɑ́ sǝŋ mǝ nɑ Tɑcɑɑ mǝ hɛkʋ, nɑ mɑ́ tɛlǝsɩ-mɛɣɛ nti Tɑcɑɑ yɔɣɔtɑɑ tɔ sɩ: 6 Mɑɣɑlɛ mǝ Ɩsɔ Tɑcɑɑ, mɑ́ lǝsǝnɑ-mɛɣɛ Icipiti tɛtʋ tɑɑ kɛ́ mǝ yomle tɑɑ. 7 Ɩ́ tɑɑ nyǝnɩ nɔɣɔlʋɣʋ Ɩsɔ tɔtɔ. 8 Pǝ́cɔ́ ɩ́ tɑɑ lu pʋlʋ lɛɛsʋɣʋ sɩ ɩ́ lɑɑkɩ. Pɑɑ mpi pǝ wɛ hɑtoo ɩsɔtɑɑ yɑɑ ɑtɛ cǝnɛ yɑɑ lʋm tɛɛ tɔ. 9 Ɩ́ tɑɑ luŋ tɩɩŋ ɩnɩ, yɑɑ ɩ́ lɑpɩ-ɩ tǝmlɛ nɑtǝlɩ. Mpi pǝ tɔɔ tɔ, mɑɣɑlɛ mǝ Ɩsɔ Tɑcɑɑ. Mɑ kisɑɑ sɩ ɩ́ tɑɑ kpɩ mɑ́ nɑ tʋɣʋ nɑkʋlɩ. Ye wei ɩ́ kisɑ-m, mɑ lɛɛtǝɣɩ-ɩ nɑ mɑ́ kpɛŋnɑ ɩ piyɑ, nɑ pɑ sɑɑlǝnɑɑ. Nɑ pǝ́ polo pɑ lʋlǝŋ loosi ɩsɩɩ tooso yɑɑ liɣiti. 10 Amɑ wei ɩ cɑɑkɩ-m nɑ ɩ́ tɔkǝɣɩ mɑ tɔm tɔ, mɑ kooliɣi ɩlɛɣɛ kʋpɑntʋ kɛ́ nɑ pǝ́ polo ɩ lʋlʋŋ loosi iyisi iyisi. 11 Ɩ́ tɑɑ yɑɑkɩ mǝ Ɩsɔ Tɑcɑɑ mɑ́ mɑ hǝtɛ kɛ yem yem. Mpi tɔ, mɑ kɑɑ yele wei ɩ yɑɑkɩ mɑ hǝtɛ kɛ yem yem tɔɣɔ sɑlǝkɑ tʋɣʋ. 12 Ɩ́ pɑɑsǝnɑ kʋyɑkʋ kʋhɛɛsʋɣʋ kɛ teu nɑ ɩ́ nyǝnɩ-kʋɣʋ mɑ nyǝŋkʋ ɩsɩɩ mɑ heelɑ-mɛ tɔ. 13 Mǝ tǝmlɛ kʋyɛɛŋ ntɛ́ nɑɑtoso, nɑ ɩ tɑɑ kɛ́ ɩ́ kɑ́ lɑ mǝ tǝmɑ tǝnɑ. 14 Amɑ nɑɑtosompɔɣɔlɑɣɑ nyǝŋkʋ kɛnɑ mǝ Ɩsɔ Tɑcɑɑ kʋyɑkʋ kʋhɛɛsʋɣʋ. Tǝmlɛ nɑtǝlɩ tǝ fɛɩ lɑpʋ kɛ kʋ wule. Pɑɑ mǝ mɑɣɑmɑɣɑ, yɑɑ mǝ pǝyɑlɑɑ yɑɑ mǝ pɛɛlɑɑ, yɑɑ mǝ yomɑɑ, yɑɑ mǝ mʋʋlɑɑ mɑɣɑmɑɣɑ. Pɑɑ mǝ nɑɑŋ yɑɑ mǝ kpɑŋɑsɩ, yɑɑ mǝ tɔlɑ tɑɑ nɑtǝlɩ. Pǝ wɛɛ sɩ mǝ yomɑɑ ɩ́ hɛɛsɩ kʋyɑkʋ ŋkʋɣʋ ɩsɩɩ mɛ. 15 Ɩ́ tɔɔsɩ sɩ mǝ mɑɣɑmɑɣɑ ɩ́ kɑ kɛ́ yomɑɑ kɛ Icipiti tɛtʋ tɑɑ kɛ́ ḿpʋ́ɣʋ́, nɑ mǝ Ɩsɔ Tɑcɑɑ ɩnɩ ɩ́ lǝsɩ-mɛ nɑ ɩ toŋ sɔsɔɔŋ. Pǝ tɔɔ kɛ́ mɑ tʋ-mɛ sɩ ɩ́ tɔkɩ kʋyɑkʋ Kʋhɛɛsʋɣʋ ŋkʋ. 16 Ɩ́ seeki mǝ cɑɑnɑɑ nɑ mǝ toonɑɑ ɩsɩɩ mǝ Ɩsɔ Tɑcɑɑ tʋ-mɛ tɔ. Ɩlɛnɑ mǝ weesuɣu tɑɣɑlɩ nɑ ɩ́ cɑɣɑnɑ mǝ tǝɣɩ tɛtʋ nti ɩ hɑ-mɛ tɔ tǝ tɑɑ. 17 Ɩ́ tɑɑ kʋ yʋlʋ. 18 Ɩ́ tɑɑ lɑ wɑsɑŋkɑlǝtʋ. 19 Ɩ́ tɑɑ ŋmɩɩlɩ. 20 Ɩ́ tɑɑ yɔɣɔtɩ nti ɩ́ tɑ́ nɑ́ tɔɣɔ nɔɣɔlʋ tɔɔ. 21 Ɩ́ tɑɑ nyɩɩlɩ mǝ tɔɣɔntǝlɛ ɑlʋ, yɑɑ ɩ tǝyɑɣɑ, yɑɑ ɩ tɑɑlɛ, yɑɑ ɩ yom yɑɑ ɩ nɑʋ yɑɑ ɩ kpɑŋɑɣɑ, yɑɑ ɩ pʋlʋpʋ.

22 Sɑɑ wei pʋɣʋ mʋkɑɣɑ kɔkɔ, nɑ ɩsɔŋmʋntʋ nɑ sǝkpɛtʋɣʋ nyɑlɑɑ tɔ, kʋsǝsɩɩtʋ tǝnɛɣɛ Tɑcɑɑ sɩɩkɑɣɑnɑ nɔɣɔ sɔsɑɣɑ kɛ kɑ tɑɑ, nɑ mǝ sɑmɑɑ tǝnɑ nɩɩ, ɩ tɑ sɔɔsɩ nɑtǝlɩ. Ɩlɛnɑ ɩ́ ŋmɑɑ-tǝɣɩ pɛɛ kpɑɑtɑnɑɑ nɑɑlɛ tɔɔ, nɑ ɩ́ cɛlɛ-m.

23 Wɑɑtʋ wei ɩ́ nɩɩ Ɩsɔ nɔɣɔ ŋkɛɣɛ sǝkpɛtʋɣʋ tɛɛ, nɑ pʋɣʋ nɑ́ɑ́ tɔŋnɑ kɔkɔ kɛ mʋɣʋ tɔ, mǝ lʋlʋŋ nyɔɔŋ nyǝ́mɑ nɑ mǝ tɑɑ sɔsɑɑ tǝnɑ kpǝtǝnɑ-m, nɑ pɑ́ yɔɣɔtɩ sɩ: 24 Tɑ Ɩsɔ Tɑcɑɑ hʋlɑ́-tʋɣʋ ɩ teeli nɑ ɩ sɔsɔɔntʋ nɑ tǝ nɩɩ ɩ nɔɣɔ kɛ kɔkɔ tɑɑ. Sɑŋɑ ntɛ́ tǝ nɑwɑ sɩ Ɩsɔ yɔɣɔtǝɣǝnɑ yʋlʋ nɑ ɩ́ tɑ́ sɩ́. 25 Ɩlɛ nɔɔnɔɔ pepe tɔɔ kɛ́ pǝ wɛɛ sɩ tǝ́ sɩ? Mpi tɔ, kɔkɔ sɔsɑɣɑ kɑnɛ kɑɑ nyɑɣɑ-tʋɣʋ, ye tɑ Ɩsɔ tɔŋnɑ-tʋɣʋ yɔɣɔtǝnɑʋ ɩsɩɩ tǝ sǝpɑ. 26 Tɑmpɑnɑ tɔɔ, yʋlʋ wei kɛ́ Ɩsɔ weesuɣu tʋ tɛmɑ yɔɣɔtǝnɑʋ kɛ kɔkɔ tɑɑ ɩsɩɩ tɑ nɩɩkʋɣʋ ɩsǝntɔ tɔ nɑ pʋntʋ wɛnɑ weesuɣu? 27 Pǝ tɔɔ tɔ, Moisi, kpǝtǝnɑ Tɑcɑɑ nɑ ń nɩɩ ɩ kʋyɔɣɔtʋtʋ, nɑ ń tɛlǝsɩ-tʋ nɑ tǝ́ mʋ́ nɑ tǝ́ lɑ́.

28 Ḿpʋ́ɣʋ́ Tɑcɑɑ cɔwɑ sɩ: Mɑ nɩɩwɑ yǝlɑɑ mpɛ pɑ kʋsǝlǝmʋtʋ. Pɑ wɛnɑ tɑmpɑnɑ. 29 Ɩlɛ ye pɑ́ɑ́ wɛ́ɛ́nɑ́ lǝmɑɣɑsǝlɛ tǝnɛ ɩnǝɣɩ tɑm nɑ pɑ́ nyɑŋnɑ-m nɑ pɑ́ tɔkǝɣɩ mɑ kʋsǝsɩɩtʋ, hɑlɩ pɑ́ nɑ pɑ piyɑ pɑɑ hɛɛsɑ tɑm tɔɔ. 30 Mpʋ tɔ, Moisi polo nɑ ń heeli-wɛ sɩ: Pɑɑ wei ɩ́ mǝlɩ ɩ́ cɑcɑkʋ tɛɛ. 31 Amɑ Moisi nyɑɑ cɑɣɑ mɑ kiŋ nɑ mɑ́ kɛɛsɩ-ŋ tǝ tǝnɑ nti mɑ cɑɑ sɩ ń tʋ-wɛ tɔ, nɑ kʋtʋtʋtʋ nɑ kʋsǝsɩɩtʋ nti n kɑ́ sɛɣɛsɩ-wɛ tɔ, nɑ pɑ́ tɔkɩ-tǝɣɩ tɛtʋ nti mɑ hɑ-wɛ tɔ tǝ tɑɑ.

32 Ḿpʋ́ɣʋ́ Moisi tɔmɑ sɩ: Ɩ́ pɑɑsǝnɑ teu nɑ ɩ́ lɑkɩ nti nti pǝ sɩɩ-mɛɣɛ mpʋ tɔ. Ɩ́ tɑɑ hɛlǝnɑ ŋwɑɑŋ yɑɑ mpǝlɛ. 33 Mpɑɑʋ ŋku Tɑcɑɑ mǝ Ɩsɔ hʋ́lɑ́-mɛ tɔ kʋ tɑɑ kɛ́ ɩ́ kɑ́ tɔŋ teitei. Ɩlɛnɑ mǝ weesiŋ tɑɣɑlɩ nɑ ɩ́ hɛɛsɩ tɛtʋ nti ɩ hɑɑkɩ-mɛ tɔ tǝ tɑɑ.