1 Ḿpʋ́ɣʋ́ Lefii tʋ nɔɣɔlʋ ɩ kpɑɣɑ Lefii ɑlʋ nɔɣɔlʋ. 2 Ɩlɛnɑ ɑlʋ ɩnɩ ɩ́ lɑ́ teu nɑ ɩ́ lʋlɩ ɑpɑlʋpǝyɑɣɑ. Kɑ lɑpɑ-ɩ teu kɛ sɔsɔm. Ɩlɛnɑ ɩ́ mɑɣɑsɩ-kɛɣɛ ŋmɛsʋɣʋ kɛ ɩsɔtʋnɑɑ tooso. 3 Ɩ nɑwɑ sɩ ɩ kɑɑ pǝsɩ nɑ ɩ́ ŋmɛsɩ-kɛ, ɩlɛnɑ ɩ́ cɑɑ kowusɑɣɑ nɑ ɩ́ tɑɑ-kɛɣɛ kɑɑloo, nɑ tʋɣʋ nɑkʋlɩ kʋ cǝlǝm sɩ lʋm ɩ́ tɑɑ sʋʋ. Ḿpʋ́ɣʋ́ ɩ hɩɩsɑ pǝyɑɣɑ kɛ pǝ tɑɑ nɑ ɩ́ ponɑ kowusɑɣɑ ŋkɛ nɑ ɩ́ sɩɩ pɔɣɔ tɑɑ, kɛ́ kuteŋ luɣu tɛɛ, kɛ́ sǝsǝncɑɑsɩ tɑɑ. 4 Nɑ pǝyɑɣɑ ŋkɛ kɑ kɔɣɔ sǝŋɑ tɑ́ɑ́lǝ́ḿ tɔɔ sɩ ɩ nɑɑkɩ mpi ɩ neu kɑ́ tɛnɑ tɔ.

5 Pǝ pɑmnɑ Icipiti wulɑʋ pɛɛlɔ tii lʋm sɔʋ, nɑ ɩ tɑɑpɑlɑɑ sɩɩ-ɩ nɑ pɛlɛ pɑ́ mɑ́lǝ́ɣɩ́ kuteŋ. Ɩlɛ Icipiti wulɑʋ pɛɛlɔ loosɑ kowusɑɣɑ ntɛ́ sǝsǝncɑɑsɩ tɛɛ kɛ́ lʋm tɑɑ. Ɩlɛnɑ ɩ́ tili ɩ yomɑɑ tɑɑ lɛlʋ sɩ ɩ́ polo ɩ́ kpɑɣɑ. 6 Ɩ kulɑɑ ɩlɛ ɩ mɑɣɑnɑ ɑpɑlʋpǝyɑɣɑ ntɛ́ nɑ kɑ́ wiiki. Kɑ tɔm lɑpɑ-ɩ pǝtɔɔtǝlɛ ɩlɛnɑ ɩ́ pǝsǝnɑ sɩ: Cǝnɛ ɩnɩ, Hepǝlɑ nyǝ́mɑ pǝyɑɣɑ kɛ́.

7 Kɑ kɔɣɔ kɑ sǝŋɑ tǝnɑ, tǝnɑɣɑ ɩ nɔɣɔ tǝkpɑʋ sɩ: N cɑɑ sɩ mɑ́ polo mɑ́ pɛɛkɩ-ŋ Hepǝlɑ ɑlʋ wei ɩ kɑ́ mʋsǝsɩ-kɛ́ tɔ? 8 Ntɛnɑ pɛɛlɔ ɩnɩ ɩ́ cɔ sɩ: Polo.

Kɔɣɔ tɛɛwɑ ɩlɛnɑ ɩ́ kɔnɑ ɑhʋlʋm ɩnɩ ɩ too kʋlʋlʋ. 9 Ḿpʋ́ɣʋ́ Icipiti wulɑʋ pɛɛlɔ tɔmɑ ɑlʋ ɩnɩ sɩ: Kpɑɣɑ pǝyɑɣɑ kɑnɛ nɑ ń mʋsǝsɩ-m- kɛ, mɑɑ fɛlɩ-ŋ.

Ɩlɛnɑ toto kpɑɣɑ-kɛ nɑ ɩ́ tɔɔ-kɛ.

10 Pǝyɑɣɑ kɔmɑ nɑ kɑ́ cɛ́ hǝtɛ ɩlɛnɑ kɑ too ponɑ-kɛ nɑ ɩ́ cɛlɛ-kɛɣɛ Icipiti wulɑʋ pɛɛlɔ nɑ kɑ́ cɑɣɑ ɩ kiŋ ɩsɩɩ kɑ too kʋlʋlʋ. Ntɛnɑ ɩ́lɛ́ ɩ́ hɑ-kɛɣɛ hǝtɛ sɩ, Moisi. Lʋm ɑpɑlʋ kɛ pɑ yɑɑ mpʋ nɑ pɑ tɛ́ tɑɑ. Mpi tɔ, lʋm tɑɑ kɛ́ ɩ lǝsɑ-ɩ.

11 Moisi lɑpɑ sɔsɔ ɩlɛnɑ kʋyɑkʋ nɑkʋlɩ ɩ́ polo sɩ ɩ nɑɑkɩ ɩ nyǝ́mɑ Hepǝlɑ nyǝ́mɑ. Nɑ ɩ nɑwɑ tɔtɔɣɔ wɑhɑlɑ tǝmɑ wenɑ Icipiti nyǝ́mɑ tʋkɑɣɑ-wɛ tɔ. Hɑlǝnɑ ɩ́ nɑ́ tɔtɔɣɔ Icipiti tʋ nɔɣɔlʋ ɩ kʋɣɩ Hepǝlɑ tʋ. 12 Ɩ cɑɑ ɩsɛ kɛ ɩ tɑɑ nɑ ɩ wɑɑlɩ ɩ tɑ nɑ nɔɣɔlʋ, ɩlɛnɑ ɩ́ kʋ́ Icipiti tʋ nɑ ɩ́ ŋmɛsɩ-ɩ kɑnyǝŋɑ tɛɛ. 13 Tɛʋ femɑ nɑ ɩ́ mǝlɩ, ɩlɛnɑ ɩ́ mɑɣɑnɑ Hepǝlɑ nyǝ́mɑ nɑ pɑ́ mɑkɩ tǝmɑɣɑ pɑ tɑɑ pɑ tike. Ɩ lolɑ-wɛ ɩlɛnɑ ɩ́ pɔɔsɩ mʋsʋŋtʋ sɩ: Pepe tɔɔ kɛ́ n lɑkɩ nyɑ́ tɛɛtʋ kɛ nyǝmǝŋ kɛ mpʋ? 14 Mpʋɣʋlɛ ɩ́lɛ́ ɩ pǝsǝnɑ-ɩ sɩ: Awe kpɑ-ŋ tɑ́ wulɑʋ yɑɑ tɑ́ tɔm hʋʋlʋ ye? N cɑɑ sɩ n kʋ-m ɩsɩɩ n kʋɣʋ Icipiti tʋ tɔ yɛɛ?

Moisi cɛkǝnɑɑ sɩ yǝlɑɑ nyǝmɑ́-tɩ ɩlɛnɑ sɔɣɔntʋ kpɑ-ɩ. 15 Icipiti wulɑʋ mɑɣɑmɑɣɑ nɑ́ nɩɩ mpʋ nɑ ɩ́lɛ́ ɩ tɔŋnɑ pɛɛkʋɣʋ sɩ ɩ lǝsǝɣɩ ɩ luɣu tɛɛ. Ntɛnɑ Moisi sʋʋ nyɩɩtʋ nɑ ɩ́ polo Mɑtiyɑŋ tɛtʋ tɑɑ kɛ́ cɔɔsʋɣʋ. Ɩ tɑlɑ tǝnɑ ɩlɛnɑ ɩ́ cɑɣɑ lɔkɔ nɔɣɔlʋ ɩ nɔɣɔ.

16 Kɔtʋlʋ nɔɣɔlʋ ɩ kɑ wɛ tǝnɑ nɑ pɑ́ yɑɑkɩ-ɩ sɩ, Yetulo. Ɩ wɛnɑ pɛɛlɑɑ nɑɑtosompɔɣɔlɑɣɑ. Ḿpʋ́ɣʋ́ pɛɛlɑɑ mpɛ pɑ polɑ lʋm luɣu sɩ pɑ suuliɣi pǝlonɑ nɑ pɑ cɑɑ tɔlɑ nyɔɔ. 17 Pǝ tɑsɑɑ ɩlɛ, tiikilɑɑ nɑpǝlɩ pɑ kɔmɑɣɑlɛ nɑ pɑ́ tɔɣɔnɩ-wɛ. Moisi nɑ́ mpʋ ɩlɛnɑ ɩ́ sɛɛnɑ pɛɛlɑɑ mpɛ pɑ tɔɔ, nɑ pɑ kɑlǝkʋ nyɔɔ. 18 Pɑ mǝlɑ tǝyɑɣɑ ɩlɛnɑ pɑ cɑɑ pɔɔsɩ-wɛ sɩ: Ɩsǝnɑɣɑ pǝ lɑpɑ nɑ sɑŋɑ ɩ́ kɔɔ lɔŋ kɛ mpʋ? 19 Ntɛnɑ pɑ́ cɔ-ɩ sɩ: Icipiti tʋ nɔɣɔlʋ ɩ wɑɑsǝnɑ-tʋ. Hɑlǝnɑ ɩ́ lu tɑ́ kɑlǝkʋ kɛ lʋm nɑ kʋ́ nyɔɔ. 20 Kɛlɛnɑ pɑ cɑɑ nɔɣɔ tǝkpɑʋ sɩ: Nɑ ɑpɑlʋ ɩnɩ ɩ wɛ le? Ɩ́ tɑ́ sʋʋnɑ-ɩ tǝyɑɣɑ suwe? Tɔʋ, ɩ́ polo nɑ ɩ́ yɑɑ-ɩ nɑ ɩ́ kɔɔ nɑ tɑ́ nɑ-ɩ tǝ tɔɣɔ.

21 Ḿpʋ́ɣʋ́ Moisi tisɑɑ nɑ ɩ́ cɑɣɑ ɑpɑlʋ ɩnɩ ɩ tɛ. Hɑlǝnɑ ɩ́lɛ́ ɩ hɑ-ɩ ɩ pɛɛlɔ Sefolɑ nɑ ɩ́ lɑ́ ɑlʋ. 22 Alʋ ɩnɩ ɩ lɑpɑ teu, ɩlɛnɑ ɩ́ lʋlɩ ɑpɑlʋpǝyɑɣɑ nɑ kɑ cɑɑ hɑ-kɛɣɛ hǝtɛ sɩ Kɛɛsɔm. Mɑcɔɔsɑɑ kɛ́ pɛlɛ pɑ yɑɑ mpʋ nɑ pɑ tɛ́ tɑɑ.

23 Ḿpʋ́ɣʋ́ pǝ tɑɑŋɑ sɔsɔm, ɩlɛnɑ Icipiti wulɑʋ sɩ́. Yomle nɩɩwɑ Ɩsɛɣɛlɩ nyǝ́mɑ ɩlɛnɑ pɑ́ wiiki nɑ pɑ́ tekiɣi Ɩsɔ sɩ ɩ́ wɑɑsɩ-wɛ nɑ ɩ́lɛ́ ɩ nɩɩ. 24 Nɑ ɩ́ tɔɔsɩ nɔɣɔ ŋkɑ ɩ kɑ sɩɩ pɑ cɑɑnɑɑ cɑɑnɑɑ Apǝlɑhɑm nɑ Ɩsɑɑkɑ nɑ Yɑkɔpʋ tɔ kɑ tɔɔ. 25 Nɑ ɩ́ nyǝnɩ Ɩsɛɣɛlɩ nyǝ́mɑ nɑ ɩ́ pɑɑsǝnɑ pɑ tɔm.