5
1 Ḿpʋ́ɣʋ́ kʋyɑkʋ nɑkʋlɩ Ɩsɔ kʋyɔɣɔtʋtʋ tɛlǝsʋlʋ Asee nɑ Ɩtoo pǝyɑlʋ Ɩsɔ kʋyɔɣɔtʋtʋ tɛlǝsʋlʋ Sɑkɑlɩ pɑ polɑɑ nɑ pɑ́ yɔɣɔtǝnɑ Yutɑ nɑ Yosɑlɛm nyǝ́mɑ nɑ Ɩsɛɣɛlɩ Ɩsɔ nɔɣɔ. 2 Ɩlɛnɑ Selɑtǝyɛlɩ pǝyɑlʋ Solopɑpɛɛlɩ nɑ Yosɑtɑkɩ pǝyɑlʋ Yesuwɑ pɑ́ niki Ɩsɔ tǝsɛɛlɛ ŋmɑʋ kɛ Yosɑlɛm, nɑ Ɩsɔ kʋyɔɣɔtʋtʋ tɛlǝsǝlɑɑ sǝnɑ-wɛ.
3 Tǝnɑɣɑlɛ Ɩfǝlɑtɩ pɔɣɔ hɔɣɔlʋɣʋ kʋfǝnɛɛ Tɑtǝnɑyi, nɑ Setɑ-Posǝnɑyi, nɑ pɑ tɑɑpɑlɑɑ pɑ polɑɑ nɑ pɑ́ pɔɔsɩ Yutɑ nyǝ́mɑ sɩ: Awe hɑ-mɛɣɛ mpɑɑʋ sɩ ɩ́ ŋmɑ́ Ɩsɔ tǝsɛɛlɛ nɑ koloosi? 4 Pǝ wɛɛ sɩ ɩ́ heeli-tʋɣʋ mpɑ mpɑ pɑ ŋmɑɑkɩ ɩsǝntɔ tɔ pɑ hǝlɑ.
5 Amɑ Ɩsɔ wɛ Yutɑ nyʋɣʋ nyǝ́mɑ wɑɑlɩ, ɩlɛ pɑ tɑ pǝsɩ pɑ́ sǝŋsɩ pɑ tǝmlɛ, hɑlǝnɑ pɑ́ heeli wulɑʋ Tɑliyusi kɛ pǝ tɔm nɑ ɩ́ cɔ-wɛ.
Yutɑ nyǝ́mɑ kolontunɑɑ kulɑ pɑ wɑɑlɩ
6 Tɑkǝlɑɣɑ ŋkɑ Ɩfǝlɑtɩ tɛtʋ kʋfǝnɛɛ Tɑtǝnɑyi nɑ Setɑ-Posǝnɑyi nɑ ɩ tɑɑpɑlɑɑ hɔɣɔlʋɣʋ nyɔɔŋ nyǝ́mɑ pɑ ŋmɑɑ wulɑʋ sɔsɔ Tɑliyusi tɔɣɔlɛ 7 sɩ:
Tɑcɑɑ wulɑʋ sɔsɔ Tɑliyusi, tǝ sɛɛ-ŋ, nyɑnɑ tɛtʋ.
8 Tǝ polɑ Yutɑ kɛ Ɩsɔ tǝsɛɛlɛ tǝŋmɑlɛ nɑ tǝ́ mɑɣɑnɑ pɑ tɔŋnɑ-tɛɣɛ ŋmɑʋ nɑ pɛɛ kʋsɑɑkɛɛ. Pɑ kɑmɑ kpeŋkpelɑsɩ kɛ koloosi tɑɑ. Pɑ tǝmlɛ tewɑɣɑ, nɑ tǝ tɔŋnɑ lɑpʋ kɛ lɔŋlɔŋ. 9 Ḿpʋ́ɣʋ́ tǝ nɑwɑ nyʋɣʋ nyǝ́mɑ nɑ tǝ́ pɔɔsɩ-wɛɣɛ wei ɩ hɑ-wɛɣɛ nɔɣɔ sɩ pɑ́ ŋmɑ Ɩsɔ tǝsɛɛlɛ nɑ pǝ koloosi tɔ. 10 Hɑlɩ tǝ pɔɔsɑ-wɛɣɛ mpɑ pɑ kɛ́ tǝmlɛ nyʋɣʋ nyǝ́mɑ tɔ pɑ hǝlɑ sɩ tǝ ŋmɑɑkɩ nɑ tǝ́ kɔnɑ-ŋ. 11 Ɩlɛnɑ pɑ́ cɔ-tʋ sɩ: Tǝ kɛ́ ɩsɔtɑɑ nɑ ɑtɛ pǝ Ɩsɔ tǝmlɛ nyǝ́mɑ kɛ́. Tǝ kʋsǝɣɩ Ɩsɔ tǝsɛɛlɛ nte Ɩsɛɣɛlɩ wulɑʋ sɔsɔ nɔɣɔlʋ ɩ kɑ ŋmɑwɑ lɔŋtɑɑ tɔɣɔ. 12 Amɑ tɑ́ cɑɑnɑɑ kʋsɑ ɩsɔtɑɑ Ɩsɔ pɑ́ɑ́nɑ́ nɑ ɩ́lɛ́ ɩ tʋ-tʋɣʋ Pɑpiloni wulɑʋ Nepukɑnɛsɑɑ niŋ tɑɑ nɑ ɩ́ wɑkǝlɩ Ɩsɔ tǝsɛɛlɛ ńtɛ́, nɑ ɩ́ kuu yǝlɑɑ nɑ ɩ́ tɛɛnɑ ɩ tɛ. 13 Pǝ wɑɑlɩ kɛ́ wulɑʋ Silusi nɑ́ hɑ nɔɣɔ kɛ ɩ́lɛ́ ɩ kɑwulɑɣɑ pǝnɑɣɑ kɑncɑɑlɑɣɑ nyǝŋkɑ tɑɑ sɩ tǝ́ tɑɣɑnɩ-tɛɣɛ ŋmɑʋ. 14 Nepukɑnɛsɑɑ nɑ́ kuu Ɩsɔ tǝsɛɛlɛ ńtɛ́ tǝ tɑɑ wʋlɑ nɑ nyǝɣǝtʋ kʋpɑntʋ nɑ pǝ wontu kɛ́, nɑ ɩ́ ponɑ Pɑpiloni nɑ ɩ́ sɩɩ ɩ tʋɣʋ kutuluɣu tɑɑ. Amɑ wulɑʋ sɔsɔ Silusi nɑ́ kpɑɣɑ-tɩ nɑ ɩ́ cɛlɑ Sesepɑsɑɑ wei ɩ kpɑwɑ Yutɑ kʋfǝnɛɛ tɔ. 15 Nɑ ɩ́ heeli-ɩ sɩ: Ɩ́ polo ɩ́ ŋmɑ Ɩsɔ tǝsɛɛlɛ ntɛɣɛ tǝ lonte kʋpǝntɛ tɑɑ. Ɩlɛnɑ pɑ́ sɩɩ wontu ntǝɣɩ pǝ tɑɑ. 16 Mpʋ pǝ lɑpǝnɑ nɑ Sesepɑsɑɑ polo Yosɑlɛm nɑ ɩ́ tɑɑlɩ Ɩsɔ tǝsɛɛlɛ kite. Pǝ kpɑɣɑʋ wɑɑtʋ ɩnɩ tɔ pɑ tǝmlɛ tɔŋnɑ pote kɛ́. Amɑ pǝ tɑ tɛntɑ. 17 Pǝnɛntɛ tɑ cɑɑ, yele nɑ pɑ́ pɛɛkɩ Pɑpiloni kɑwulɑɣɑ tɑkǝlɑsɩ tɑɑ nɑ tǝ́ nɑ́ sɩ Silusi hɑ nɔɣɔ kɛ tɑmpɑnɑ sɩ pɑ́ ŋmɑ Yosɑlɛm Ɩsɔ tǝsɛɛlɛ ńtɛ́ yɑɑ ɩsǝnɑ. Ye n tɛmɑ mpʋ, ɩlɛ n heeli-tʋɣʋ nti n mɑɣɑsɑɑ tɔ.