1 Ḿpʋ́ɣʋ́ Atɑm nyǝmɑ́ ɩ ɑlʋ Ɩfɑ nɑ ɩ́lɛ́ ɩ́ lɑ́ teu nɑ ɩ́ lʋlɩ Kɑyini. Ɩlɛnɑ ɩ́ tɔ́ sɩ: Mɑ hikɑ ɑpɑlʋpǝyɑɣɑ nɑ Tɑcɑɑ toŋ. 2 Pǝlɛ pǝ wɑɑlɩ kɛ́ ɩ lʋlɑ ɩ neu Apɛɛlɩ.

Apɛɛlɩ kɑ kɛ́ tiikilu nɑ Kɑyini kɛ hɑ́tʋ́. 3 Ḿpʋ́ɣʋ́ kʋyɑkʋ nɑkʋlɩ tɑɑlʋ lǝsɑ ɩ hɑtǝmʋtʋ tɑɑ nɑ ɩ́ lɑ́ Tɑcɑɑ kɛ kɔtɑɣɑ. 4 Ɩlɛnɑ neu nɑ́ɑ́ kpɑ ɩ heeŋ tɑɑ kɛ́ kɑncɑɑlɑɣɑ kʋlʋlǝŋ nim nyǝŋ nɑ ɩ́ lɑ́ kɔtɑɣɑ tɔtɔ. Ɩlɛnɑ Tɑcɑɑ nyǝnɩ Apɛɛlɩ kɔtɑɣɑ nɑ pǝ́ kɛɛsǝnɑ-ɩ. 5 Amɑ ɩ kisɑ Kɑyini nyǝŋkɑ. Tǝnɑɣɑlɛ pǝ hɑŋɑ-ɩ teu ɩsɩɩ nɔɔhǝlɛ tɑɑ kɔkɔ, nɑ ɩ ɩsɛntɑɑ sɔŋ. 6 Ɩlɛnɑ Tɑcɑɑ pɔɔsɩ-ɩ sɩ: Pepe tɔɔ kɛ́ nyɑ́ ɩsɛntɑɑ sɔŋɑɑ? 7 Ye kʋpɑntʋ kɛ n lɑkɩ, nyɑ́ ɩsɛntɑɑ ɩ́ hɛtɩ. Amɑ ye ɩsɑɣɑtʋ kɛ n lɑkɩ, kʋlʋmtʋ ntɩ tǝ pɑpǝnɑ ntɛɣɛ nyɑ́ nɔnɔɣɔ tɛɛ ɩsɩɩ tɔɣɔlʋɣʋ nɑ tǝ́ tɑŋɑ-ŋ, nɑ tǝ́ cɑɑ-ŋ kǝlʋɣʋ. Amɑ pǝsɩ-tɩ nɑ ń kǝlɩ-tɩ.

8 Tǝnɑɣɑ Kɑyini tɔmɑ ɩ neu sɩ: Tǝ́ kpɑ tɑɑlɛ, ɩlɛnɑ Kɑyini kʋlɩ ɩ tɔɔ kɛ́ tǝnɑ nɑ ɩ́ kʋ-ɩ.

9 Mpʋɣʋlɛ Tɑcɑɑ pɔɔsɑ Kɑyini sɩ: Nyɑ́ neu Apɛɛlɩ wele? Ɩlɛnɑ ɩ́ cɔ sɩ: Mɑ nyǝmɑ́ timpi ɩ wɛɛ tɔ? Mɑ kɛ́ mɑ neu tɑŋlʋ nɑ?

10 Ɩlɛnɑ Tɑcɑɑ pɔɔsɩ-ɩ sɩ: Pepe lɑpɑ mpʋ? Mɑ nɑwɑ nyɑ́ neu cɑlǝm kɛ ɑtɛ, nɑ pǝ wɛɛ sɩ mɑ́ lɛɛtɩ-ŋ. 11 Nɔɔnɔɔ tɛtʋ kɑ́ tǝŋsɩ-ŋ mpusi kɛ́ timpi n yelɑɑ nɑ tǝ́ hɑɑ nɔɣɔ nɑ tǝ́ li nyɑ́ neu cɑlǝm kɛ nyɑ́ niŋ tɑɑ tɔ. 12 Pɑɑ n kɑ́ hɑlɑ-tǝɣɩ ɩsǝnɑ, n kɑɑ wɑɑ pʋlʋ. N kɑ́ lɑ yem cɔɔlʋ, n kɑɑ wɛɛnɑ tǝyɑɣɑ.

13 Mpʋɣʋlɛ Kɑyini cɔwɑ Tɑcɑɑ sɩ: Mɑ sɑlǝkɑ kǝlɑ-m. 14 Nyǝnɩ, sɑŋɑ ń tɔɣɔnǝɣɩ-m tɛtʋ kʋpɑntʋ tǝnɛ tǝ tɑɑ kɛlɛ, mɑ kɑɑ tɑsɑ nyɑ́ ɩsǝpǝle tɑɑ kɛ́ loosuɣu. Mɑɑ pǝsɩ yem cɔɔlʋ, mɑ kɑɑ wɛɛnɑ tǝyɑɣɑ, nɑ wei ɩ́ hikɑ-m ɩ kʋ-m.

15 Tǝnɑɣɑlɛ Tɑcɑɑ nɔɣɔ tǝkpɑʋ sɩ: Aɑɩ, ye wei ɩ́ kʋwɑ Kɑyini, ɩsɩɩ mɑ fɛlɑ pʋntʋ kɛ pǝ tɔm nɑɑtosompɔɣɔlɑɣɑ.

Ɩlɛnɑ Tɑcɑɑ yʋsɩ Kɑyini sɩ ye wei ɩ́ nɑ-ɩ ɩ́ tɑɑ kʋ-ɩ. 16 Ntɛnɑ ɩ́ se Tɑcɑɑ nɑ ɩ́ polo ɩ cɑɣɑ timpi pɑ yɑɑ sɩ Yemcɔɔlɑɑtɛ tɔɣɔ Ɩteni ilim tǝlɩɩlɛ tɔɔ.

17 Ḿpʋ́ɣʋ́ Kɑyini nyǝmɑ́ ɩ ɑlʋ nɑ ɩ́ lɑ́ teu nɑ ɩ́ lʋlɩ Henɔkɩ. Ɩlɛnɑ ɩ́ ŋmɑ́ ɩcɑtɛ nɑ ɩ́ hɑ-tɛɣɛ ɩ pǝyɑlʋ hǝtɛ. 18 Ḿpʋ́ɣʋ́ Henɔkɩ lʋlɑ Ɩlɑɑtɩ nɑ Ɩlɑɑtɩ lʋlɩ Mehuyɑyɛɛlɩ nɑ Mehuyɑyɛɛlɩ lʋlɩ Metusɑyɛɛlɩ, ɩlɛnɑ Metusɑyɛɛlɩ lʋlɩ Lemɛkɩ.

19 Alɑɑ nɑɑlɛ kɛ Lemɛkɩ kpɑɣɑɑ, kɑncɑɑlɑɣɑ nyǝŋ hǝtɛ ntɛ́ Atɑ, nɑɑlɛ nyǝŋ sɩ Silɑ. 20 Ḿpʋ́ɣʋ́ Atɑ lʋlɑ Yɑpɑɑlɩ. Yɑpɑɑlɩ ɩnɩ ɩ́lɛ́ ɩ piitim ntɛ́ mpɑ pɑ tiikiɣi kɑlǝkǝŋ nɑ pɑ́ sʋʋkɩ cokɑ tɑɑ tɔ. 21 Ɩ́lɛ́ ɩ neu hǝtɛ ntɛ́ Yupɑɑlɩ. Yupɑɑlɩ ɩnɩ ɩ piitim ntɛ́ mpɑ pɑ mɑkɩ sɑŋkʋnɑɑ nɑ pɑ́ hʋlǝɣɩ hǝsɩ tɔ. 22 Silɑ ɩ́lɛ́ ɩ lʋlǝnɑ ntɛɣɛ Tupɑɑlɩ-Kɑyini, wei ɩ luki nyǝɣǝlʋɣʋ kʋsɛɛmʋɣʋ nɑ nyǝɣǝlʋɣʋ mɑɣɑmɑɣɑ wontu tɔ. Ɩ neu kɛ pɑ yɑɑkɑɣɑ sɩ Nɑɑmɑ.

25 Atɑm pɑ tɑsɑ ɑpɑlʋpǝyɑɣɑ kɛ lʋlʋɣʋ ɩlɛnɑ Ɩfɑ hɑ-kɛɣɛ hǝtɛ sɩ Sɛɛtɩ, sɩ Tɑcɑɑ hɑ ɩnǝɣɩ ɑpɑlʋpǝyɑɣɑ lɛŋkɑ kɛ Apɛɛlɩ wei Kɑyini kʋwɑ tɔ ɩ lonte.

26 Sɛɛtɩ nɑ́ lɑpɑ yʋlʋ nɑ ɩ́ lʋlɩ ɑpɑlʋpǝyɑɣɑ nɑ ɩ́ hɑ-kɛ sɩ Ɩnɔɔsɩ. Wɑɑtʋ ɩnǝɣɩ yǝlɑɑ cɑɑlɑ Ɩsɔ kɛ́ sɛɛʋ sɩ Tɑcɑɑ.