2
1 Tɑcɑɑ heelɑ tɔm ntiɣi Amɔtɩ pǝyɑlʋ Ɩsɑyii tɔɣɔlɔ. Toosee tɑɑ kɛ́ ɩ heelɑ-ɩ Yutɑ nɑ Yosɑlɛm pɑ tɔm.
Yǝlɑɑ tǝnɑ kɑ́ wɛɛ Yosɑlɛm tɑɑ
(Kʋkɑlʋɣʋ 2–4; Misee 4:1-3)
2 Tɑcɑɑ tǝyɑɣɑ wɛ pʋɣʋ tɔɔ kɛ́.
Kʋyɑkʋ nɑkʋlɩ pʋɣʋ ŋkʋ kɩɩ kʋlɩ
nɑ kʋ́ cɑɣɑ pɔɔŋ nyɔɔŋ tɑɑ nɑ kʋ tɛɛ pulɑsɩ.
Piitimnɑɑ tǝnɑ kɑ́ polo kʋ tɔɔ.
3 Yǝlɑɑ pɑɣɑlɛ kɑ́ polo nɑ pɑ́ tɔ sɩ: Ɩ́ kɔɔ nɑ tǝ́ kpɑ Tɑcɑɑ
pʋɣʋ tɔɔ kɛ́ Yɑkɔpʋ Ɩsɔ tǝyɑɣɑ.
Nɑ ɩ́ hʋlɩ-tʋɣʋ ɩ mpɑɑŋ nɑ
tǝ́ tǝŋ ɩ ɩkpɑtɛ.
Mpi tɔ, Siyɔŋ ɩcɑtɛ Yosɑlɛm tɑɑ kɛ́ Tɑcɑɑ kiiu nɑ ɩ
tɔm kɑ́ lɩɩnɑ.
4 Ɩ kɑ hʋʋnɑ piitimnɑɑ nɑ ɩ́ loli yǝlɑɑ pɑɣɑlɛ. Ɩlɛnɑ pɑ́
lu pɑ lɑɣɑlɛɛ kɛ ɑkuŋ, nɑ pɑ ŋmɑntɑɑsɩ kɛ lemsenɑɑ.
Piitim nɑpǝlɩ pǝ kɑɑ kʋlɩ lɛmpɩ tɔɔ.
Pǝ́cɔ́ nɔɣɔlʋ kɑɑ tɑsɑ yoou kpɛlǝmʋɣʋ.
5 Yɑkɔpʋ lʋlʋɣʋ nyǝ́mɑ mɛ ɩ́ kɔɔ
nɑ tǝ́ tɔ́ Tɑcɑɑ nyɑɑlǝm tɑɑ.
Tɑcɑɑ kʋyɑkʋ kʋhʋhʋʋnɑʋ
6 Tɑcɑɑ lɔwɑ ɩ yǝlɑɑ Yɑkɔpʋ lʋlʋɣʋ nyǝ́mɑ.
Mpi tɔ, ilim tǝlɩɩlɛ tɔɔ nyǝ́mɑ kʋlɑpʋtʋ sunɑ pɑ hɛkʋ.
Pɑ lɑkɩ topotopo ɩsɩɩ Filiisi nyǝ́mɑ.
Pǝyele pɑ́ nɑ kpɑɩ nyǝ́mɑ pɑ kpɛntǝɣɩ nɔɔsɩ.
7 Wʋlɑ nɑ liɣitee su pɑ tɛtʋ tɑɑ, pɑ wɛnɑʋ fɛɩ tǝnɑɣɑ.
Kpɑɣɑnǝŋ su pɑ tɛtʋ tɑɑ, yoou kɛɛkɛnɑɑ fɛɩ kɑlʋɣʋ.
8 Tɩɩŋ kʋlɑlɑɑŋ su pɑ tɛtʋ tɑɑ kɛ́,
pɑ́ luŋiɣi mpi pɑ lɑpǝnɑ pɑ niŋ tɔ.
9 Pǝ tisɑ yʋlʋ kɛ́ nɑ pǝ́ lumsi-ɩ. Tɑcɑɑ tɑɑ wii-wɛ.
10 Ɩ́ sʋʋ kʋkpɑmǝŋ tɛɛ nɑ ɩ́ ŋmɛlɩ tɛtʋ tɛɛ.
Ɩ́ hɑtǝlǝnɑ Tɑcɑɑ sɔɣɔntʋ sɔsɔɔntʋ nɑ ɩ teu sɔsɔɔm.
11 Kɑlɑmpɑɑnɩ nyǝ́mɑ kɑ́ kɑ nyɔɔŋ,
nɑ pǝ́ tisi ɩsǝcɑʋtʋnɑɑ.
Tɑcɑɑ tike ntɛ́ sɔsɔ kɛ kʋyɑkʋ ŋkʋ.
12 Mpi tɔ, Pǝ tǝnɑ pǝ tʋ Tɑcɑɑ sɩɩ kʋyɑkʋ nɑkʋlɩ.
Kʋ tɑɑ kɛ́ ɩ kɑ́ hʋʋnɑ kɑlɑmpɑɑnɩ nyǝ́mɑ,
nɑ ɩsǝcɑʋtʋnɑɑ, nɑ mpɑ pɑ hɔŋ pɑ tɩ tɔ nɑ ɩ́ tisi-wɛ.
13 Ɩ kɑ wɑkǝlɩ Lipɑŋ nɑ Pɑsɑŋ pǝ tɩɩŋ kʋkʋlǝŋ tǝnɑ.
14 Nɑ pɔɔŋ kʋkʋlǝŋ nɑ pulɑsɩ kʋkʋlɑsɩ tǝnɑ.
15 Nɑ ɑtɛ nɑ ɩsɔ kutuluŋ sɔsɔɔŋ tǝnɑ,
nɑ koloosi sɔsɔɔŋsɩ ɑcɑlɛɛ tǝnɑ.
16 Nɑ kpɩɩlǝŋ sɔsɔɔŋ wei ɩ puki Tɑɑsisi tɔ ɩ tǝnɑ,
nɑ wontu nti tǝ tǝnɑ pɑ nyɩɩlǝɣɩ tɔ.
17 Pɩɩ tisi yǝlɑɑ kɑlɑmpɑɑnɩ kɛ́ nɑ pɑ ɩsǝcɑʋ,
Tɑcɑɑ tike ntɛ́ sɔsɔ kɛ kʋyɑkʋ ŋkʋ.
18 Tɩɩŋ kʋlɑlɑɑŋ tǝnɑ kɑ́ sɑɑlɩ yem.
19 Yǝlɑɑ kɑ́ sʋʋ kʋkpɑmǝŋ tɛɛ, nɑ tɛtʋ tɛɛ sɩ,
pɑ́ hɑtǝlǝnɑ Tɑcɑɑ toŋ sɔsɔɔŋ nɑ ɩ pɑ́ɑ́nɑ́,
kɛ wɑɑtʋ wei ɩ kɑ́ kɔɔ sɩ ɩ nyɑɑsǝɣɩ tɛtʋ tɔ.
20 Kʋyɑkʋ ŋkʋ kʋ wule yǝlɑɑ kɑ́ tʋ́ pɑ tɩɩŋ wei pɑ lupǝnɑ wʋlɑ nɑ liɣitee nyǝɣǝtʋ tɔɣɔ sɛmǝŋ nɑ yuuŋ sɩ ɩ́ wɑkǝlɩ-ɩ. 21 Kʋkpɑmǝŋ lonɑ nɑ ɩ pɔɣɔlɛɛ tɑɑ kɛ́ pɑɑ sʋʋ nɑ pɑ́ ŋmɛlɩ Tɑcɑɑ sɔɣɔntʋ sɔsɔɔntʋ nɑ ɩ teu sɔsɔɔm, kɛ wɑɑtʋ wei ɩ kɑ́ kɔɔ nɑ ɩ́ nyɑɑsɩ tɛtʋ tɔ.
22 Ɩ́ tɑɑ hɑ mǝ tǝɣɩ yʋlʋ.
Heelim tike kɛ pǝ tʋ ɩ mɩɩnɑ tɛɛ.
Mpʋ tɔ, ɩ tɑ kɛ pʋlʋpʋ.