7
Tɔm nti Tɑcɑɑ yɔɣɔtɑ wulɑʋ Ahɑsɩ tɔɔ tɔ
1 Wulɑʋ Ahɑsɩ wɑɑtʋ kɛ Asilii wulɑʋ Lesɛŋ, nɑ Ɩsɛɣɛlɩ wulɑʋ Pekɑ, Pekɑ ɩnɩ ɩ cɑɑ kɛlɛ Lemɑliyɑ. Ḿpʋ́ɣʋ́ pɑ tii Yosɑlɛm ɩcɑtɛ tɔɔ sɩ pɑ yookinɑ-tɛ, ɩlɛ pɑ tɑ pǝsɩ. Wulɑʋ Ahɑsɩ ɩnɩ ɩ kɑ kɛnɑ Yotɑm pǝyɑlʋ, nɑ ɩ cɔsɔ Osiyɑsɩ kɑ kɛnɑ Yutɑ wulɑʋ. 2 Ḿpʋ́ɣʋ́ pɑ heelɑ Tɑfiiti lʋlʋɣʋ tʋ wulɑʋ Ahɑsɩ nɑ ɩ tǝyɑɣɑ sɩ, Silii yoolɑɑ kɔmɑ nɑ pɑ́ siki Ɩfǝlɑyim tɑɑ. Tǝnɑɣɑ tɔm ntɩ tǝ lɑpɑ nɑ wulɑʋ nɑ ɩ yǝlɑɑ pɑ́ sele ɩsɩɩ heelim ciɣituɣu hɔtʋɣʋ tɔ.
3 Ḿpʋ́ɣʋ́ Tɑcɑɑ tɔmɑ Ɩsɑyii mɑ́ sɩ: Nyɑ́ nɑ nyɑ́ pǝyɑlʋ Seyɑɑ-Yɑsupi ɩ́ polo nɑ ɩ́ nɑ́ wulɑʋ Ahɑsɩ. Ɩ wɛ ɩsɔtɑɑ lɩɩlɛ lɔɔʋ nɔɣɔ kɛ cɔtǝlɑɑ tɑɑlɛ hɑpǝlɛ tɔɔ. 4 Heeli-ɩ sɩ cɑɣɑ tǝpɑmm. Sɔɣɔntʋ ɩ́ tɑɑ kpɑ-ŋ, yɑɑ nyɑ́ ɑpɑlʋtʋ yɔɔlǝnɑ Silii tʋ Lesɛŋ, nɑ Lemɑliyɑ pǝyɑlʋ pɑ pɑ́ɑ́nɑ́. Pǝ tɑɣɑ pʋlʋ, ɑ wɛɛ kɛ́ ɩsɩɩ tuputusi nɑɑlɛ kɔkɔ. 5 Mɑ nyǝmɑ́ sɩ Silii nyǝ́mɑ, nɑ Pekɑ nɑ Ɩfǝlɑyim yoolɑɑ cɑɑkɩ pɑ kʋlɩ nyɑ́ tɔɔ. Hɑlɩ pɑ tɔmɑ sɩ: 6 Tǝ́ kpɑ Yutɑ nyǝ́mɑ tɔɔ, nɑ tǝ́ nyɑɑsɩ-wɛ. Tǝ́ cɑɑlɩ-wɛ nɑ pɑ́ tǝŋ-tʋ. Tǝ́ kpɑ Tɑpeeli pǝyɑlʋ kɛ́ wulɑʋ nɑ toŋ. 7 Ɩlɛ Ɩsɔ Tɑcɑɑ yɔɣɔtɑɑ sɩ:
Tǝlɛ tǝ kɑɑ tɔɣɔ.
8-9 Mpi pǝ tɔɔ tɔ, Silii ɩcɑtɛ sɔsɔɔlɛ ntɛ́ Tɑmɑsɩ,
nɑ Lesɛŋ kɛlɛ tǝnɑ wulɑʋ.
Ɩfǝlɑyim nyǝ́mɑ ɩcɑtɛ sɔsɔɔlɛ ntɛ́ Sɑmɑlii,
nɑ Pekɑ kɛlɛ pɛlɛ pɑ wulɑʋ.
Pǝ kɑɑsɑ pɩɩsɩ nɩɩtoso nɑ kɑkpɑsɩ,
nɑ Ɩfǝlɑyim nyǝ́mɑ sɑɑlɩ yem.
Ye mɩɩ tɑ mɑtǝnɑ Tɑcɑɑ, mǝ sɑɑlǝɣɩ yem tɔtɔɣɔ.
Ɩsɔ wɛ tɑ́ kiŋ
10 Ḿpʋ́ɣʋ́ Tɑcɑɑ heelɑ Ɩsɑyii sɩ ɩ́ tɛlǝsɩ Ahɑsɩ sɩ: 11 Sǝlǝmɩ nyɑ́ Ɩsɔ Tɑcɑɑ mɑɣɑ yɑɑsi wei n kɑ́ tɛnɑ nyɑ́ tɑɑ sɩ mɑ wɛ nyɑ́ wɑɑlɩ tɔ. Pɑɑ ɑtɛtǝlɛ tɑɑ kɛ́ n cɑɑ yɑɑ ɩsɔtɑɑ kɛ́ n cɑɑkɩ.
12 Tǝnɑɣɑlɛ Ahɑsɩ cɔwɑ sɩ: Aɑɩ yoo, mɑ kɑɑ sǝlǝmɩ pʋlʋpʋ. Mɑ kɑɑ mɑɣɑsɩ Tɑcɑɑ sɩ mɑ nɑɑ ɩ wɑɑlɩ.
13 Mpʋɣʋlɛ Ɩsɑyii cɔ-ɩ sɩ: Tɑfiiti lʋlʋɣʋ nyǝ́mɑ mɛ, ɩ́ nɩɩ mɑ tɔm. Ɩsɩɩ ɩ́ lɑpʋ yǝlɑɑ tɔ, pǝ tɑ mɑɣɑ-mɛɣɛlɛ nɑ ɩ́ cɑɑ ɩ kpɛŋnɑ mɑ Ɩsɔ? 14 Tɔʋ, Tɑcɑɑ kɑ́ hʋlɩ-mɛɣɛ yɑɑsi nɔɣɔlʋɣʋ ɩ mɑɣɑmɑɣɑ. Ɩnǝɣǝlɛ sɩ: Ɩ́ nyǝnɩ, pɛɛlɔ wei ɩ tɑ nyǝntɑ ɑpɑlʋ tɔ, ɩ kɑ́ hɑɣɑ hɔɣɔ, nɑ ɩ́ lʋlɩ ɑpɑlʋpǝyɑɣɑ. Pɑɑ hɑ-kɛɣɛ hǝtɛ sɩ Ɩmɑniyɛlɩ. Hǝtɛ tǝnɛ tǝ yɔɣɔtǝɣɩ sɩ Ɩsɔ wɛ tɑ́ kiŋ. 15 Ɩ tɔɣɔnɑɣɑ ntɛ́ nɑɑnim nɑ tɩɩŋ. Hɑlǝnɑ ɩ́ nyɩ ɩsɑɣɑtʋ kisuɣu, nɑ ɩ́ mʋ kʋpɑntʋ. 16 Amɑ nɑ pǝ́cɔ́ ɑpɑlʋ pǝyɑɣɑ ŋkɛ kɑ́ nyǝŋ ɩsɑɣɑtʋ kisuɣu, nɑ kʋpɑntʋ mʋɣʋ tɔ. Awulɑɑ mpɑ ɩnɩ pɑ nɑɑlɛ pɑ sʋsǝɣɩ-mɛɣɛ wɑtʋ kɛ mpʋ tɔ, pɑ yǝlɑɑ kɑ́ lɔ pɑ tɛtʋ. 17 Amɑ Tɑcɑɑ kɑ́ kɔnɑ nyɑnɑ nyɑ́ yǝlɑɑ nɑ nyɑ́ lʋlʋɣʋ nyǝ́mɑ mǝ tɔɔ kɛ́ mpusi. Too tɔ pɑ tɑ nɑtɑ mpusi ɩnǝɣɩ wɑɑtʋ wei Yutɑ nɑ Ɩsɛɣɛlɩ pɑ fɑɣɑɑ tɔ. Asilii wulɑʋ kɑ́ lɑ mpi tɔɣɔlɛ.
Kolontunɑɑ wɑtʋɣʋ
18 Kʋyɑkʋ ŋkʋɣʋ Tɑcɑɑ kɑ́ yɑɑ kolontunɑɑ nɑ kɑcʋɣʋlɑɣɑ.
Pɑɑ lɩɩnɑ Icipiti pɔɣɔ Nili nɑ teŋku pɑ ɑtɑmɑ tɑɑ tɛtʋ tɑɑ,
nɑ pɑ́ kɔɔ, ɩsɩɩ kɑcɔsɩ.
Pɑɑ lɩɩnɑ Asilii tɔtɔ ɩsɩɩ tɩɩŋ sɛsɛkʋ.
19 Pɑ tǝnɑ pɑɑ kɔɔ nɑ pɑ́ cɑɣɑ lɔɔŋ wei
ɩ lumɑɑ tɔ ɩ tɑɑ.
Nɑ kʋkpɑmǝŋ pɔɣɔlɛɛ tɑɑ,
nɑ sɔwɑ hɔtʋ tɑɑ, nɑ hilɑ tǝnɑ tɑɑ.
20 Kʋyɑkʋ ŋkʋɣʋ Tɑcɑɑ kɑ́ kǝntɩ
Ɩfǝlɑtɩ pɔɣɔ wɑɑlɩ hʋnʋɣʋ.
Asilii wulɑʋ tɔm kɛ pɑ kɛɛsǝɣɩ mpʋ.
Ɩ kɑ́ kɔɔ nɑ ɩ́ looli mǝ nyɔɔŋ,
nɑ mǝ tɔnǝŋ tɔɔ hʋntʋ, nɑ mǝ tɑntǝŋ.
21 Kʋyɑkʋ ŋkʋɣʋ pɑɑ mǝ tǝyɑɣɑ ŋkɑ
kɑɑ tɔɔ nɑʋ ɑlʋnyǝŋ,
nɑ pǝ́ŋ kɛ nɑɑlɛ.
22 Ɩlɛnɑ pɑ́ nyɑɑsǝɣɩ pǝ nɑɑlǝm kɛ kɑtɑtǝlɑɣɑ.
Mpɑ mpɑ pɩɩ kɑɑsɩ tɛtʋ tɑɑ tɔ,
nɑɑnim nɑ tɩɩŋ kɛ pɑɑ tɔkɩ.
23 Kʋyɑkʋ ŋkʋ tɔtɔ,
pɑɑ pɑ sɔwɑ lɛsɛŋ tɩɩŋ iyɑɣɑ (1000) kɛ tɑɑlɛ tɑɑ,
nɑ pǝ liɣitee lɩɩ nyǝɣǝtʋ iyɑɣɑ (1000),
pɑɑ yele-tɛ nɑ nyɩɩtʋ ɩsɑɣɑtʋ lɛɛkɩ.
24 Hɑlɩ yǝlɑɑ kɑ́ sʋʋ tǝ tɑɑ kɛ́ nɑ tɔɔŋ
nɑ nyǝmɑ́ nɑ pɑ́ yɛlɩ.
Nyɩɩtʋ ɩsɑɣɑtʋ tǝnɑ kɑ́ sunɑ tɛtʋ tǝnɑ tɑɑ.
25 Pɑɑ pulɑsi nsi sɩ tɔɔ pɑ hɑlɑɣɑnɑ ɑkuɣu tɔ,
nyɩɩtʋ ɩsɑɣɑtʋ kɑ́ nyɑlǝnɑ,
pǝ kɑɑ wɛɛ sʋʋʋ.
Hɑlǝnɑ pɑ́ yeki nɑɑŋ nɑ
heeŋ kɛ pǝ tɑɑ nɑ ɩ́ tɔkɩ.