9
1 Yǝlɑɑ mpɑ pɑ tɔŋ sǝkpɛtʋɣʋ tɑɑ tɔ,
pɑ nɑɑkɩ nyɑlǝmǝlɛ sɔsɔɔlɛ.
Mpɑ pɑ wɛ ɑhoo sǝkpɛtʋɣʋ sɔsɔɔŋkʋ tɑɑ tɔ
nyɑlǝmǝlɛ tʋlɑ pɛlɛ pɑ tɔɔ.
2 Tɑcɑɑ lɑkɩ nɑ pɑ lɑŋɑ hʋlʋmǝɣɩ kɑtɑtǝlɑɣɑ,
nɑ pɑ ɑŋmɑɑlɑ sɔɔsǝɣɩ.
Pɑ lɑŋɑ hɛɛkɩ nyɑ́ ɩsɛntɑɑ kɛ́ ɩsɩɩ kʋmtʋ wɑɑtʋ.
Yɑɑ ɩsɩɩ pɑ tɑlʋɣʋ mpi mpi pɑ kuu yoou tɑɑ tɔ.
3 N kɔɔlǝɣɩ sǝɣǝlɑ kɛ nyɑ́ yǝlɑɑ tɔɔ.
N pɛlǝɣɩ kpɑ́tʋ́ɣʋ́ ŋku pɑ mɑkɑɣɑnɑ pɑ siɣile tɑɑ tɔ.
N pɛlǝɣɩ ŋmɑkǝllʋ tǝpite,
ɩsɩɩ n kɑ lɑpʋ Mɑtiyɑŋ nyǝ́mɑ wɑɑtʋ tɔ.
Ḿpʋ́ɣʋ́ n fitiɣi pɑ ŋmɑkǝllɑɑ kɛ sɑŋɑ.
4 Kɔkɔ kɑ nyɑɣɑ yoolɑɑ ntɑŋkpɑlɑ wenɑ
ɑ tɑŋ ɩ́ nɩɩkɩ kɑʋ kɑʋ tɔ,
nɑ pɑ tokonɑɑ mpɑ cɑlǝm tɑɑnɑɑ tɔ.
5 Mpi tɔ, pɑ lʋlɑ-tʋɣʋ pǝyɑɣɑ.
Pǝ hɑ-tʋɣʋ ɑpɑlʋ pǝyɑɣɑ.
Ɩsɔ cɛlɑ-kɛɣɛ pǝsʋɣʋ.
Kɑ hǝlɑ ntɛ: Lɑɣɑtʋ tɑsʋlʋ kʋpɑŋ,
Ɩsɔ Toŋ tʋ, Cɑɑ Tɑm tɔɔ nyǝŋ, Hɛɛsʋɣʋ Awulumpu.
6 Kɑ kɑwulɑɣɑ toŋ kɑ́ wɑlǝɣɩ kɛ́.
Kɑ kɑwulɑɣɑ kɑ́ wɛɛ hɛɛsʋɣʋ tɑɑ.
Kɑ́ɑ́ lɛɛtɩ Tɑfiiti lonte tɑɑ.
Tɑmpɑnɑ tǝŋʋɣʋ nɑ siɣisuɣu tɔɔ kɛ́ kɑ toŋ kɑ́ sǝŋ.
Tɑcɑɑ Pǝ tǝnɑ pǝ tʋ tʋwɑ ɩ tɑɑ kɛ́ sɩ
ɩ lɑkɩ pǝ tǝnɑ ɩsǝntɔ.
Mpi tɔ, ɩ sɔɔlɑ ɩ yǝlɑɑ kɛ́.
Pǝ kpɑɣɑʋ nɔɔnɔɔ tɔ, hɑlǝnɑ pǝ polo tɑm.
Tɑcɑɑ pɑ́ɑ́nɑ́
(Kʋkɑlʋɣʋ 5:25)
7 Ḿpʋ́ɣʋ́ Tɑcɑɑ yɔɣɔtɑ Yɑkɔpʋ yǝlɑɑ
Ɩsɛɣɛlɩ nyǝ́mɑ kɛ tɔm nɑ tǝ́ tǝŋ-wɛ.
8 Yǝlɑɑ tǝnɑ nɩɩ mpʋ.
Pǝ kpɑɣɑʋ Ɩfǝlɑyim nyǝ́mɑ tǝnɑ nɑ Sɑmɑlii nyǝ́mɑ tɔ.
Ɩlɛnɑ pɑ́ yɔɣɔtǝnɑ kɑlɑmpɑɑnɩ sɩ:
9 Pilikinɑɑ koluŋɑ timɑ.
Amɑ tɩɩ ŋmɑ-kɛ nɑ pɛɛ kʋsɑɑkɛɛ.
Tɩɩŋ kpɑɩ nyǝŋ tɑɑŋ pɛlɑɑ.
Tɩɩ lɛɛtɩ ɩ lonɑ tɑɑ kɛ́ tɩɩŋ toŋ nyǝŋ tɑɑŋ.
10 Ḿpʋ́ɣʋ́ Tɑcɑɑ kʋsɑ mǝ kolontunɑɑ Lesɛŋ
nyǝ́mɑ pɑ́ɑ́nɑ́ sɩ pɑ́ yoonɑ-mɛ.
11 Silii nyǝ́mɑ ntɔ nɑ ilim tǝlɩɩlɛ tɔɔ,
nɑ Filiisi nyǝ́mɑ nɑ ilim tǝtʋlɛ tɔɔ.
Pɑ hɑɑ nɔɔsɩ sɩ pɑ liki Ɩsɛɣɛlɩ nyǝ́mɑ mɛ.
Pɑɑ nɑ mpʋ tɔ, Tɑcɑɑ pɑ́ɑ́nɑ́ tɑ hɛɛ,
ɩ tɔŋnɑ ŋkumle kɛ teɣetuɣu kɛ́.
12 Ɩsǝnɑ Ɩsɔ mɑpɑ ɩ yǝlɑɑ tɔɣɔlɛ.
Pɑɑ nɑ mpʋ Ɩsɛɣɛlɩ nyǝ́mɑ mɛ
ɩ́ tɑ mǝlɩ mǝ Ɩsɔ kiŋ.
Ɩ́ tɑ kɛɛsǝnɑ pǝ tǝnɑ pǝ tʋ Tɑcɑɑ tɔɔ.
13 Kʋyɑkʋ kʋlʋmʋɣʋ tɑɑ kɛ́ Tɑcɑɑ
kɑ́ sɛtɩ nyʋɣʋ nɑ sukɑ.
Tɑcɑɑ kɑ́ wɑkǝlɩ sɔsɑɑ nɑ sǝkpemɑ.
14 Lɑɣɑtʋ tɑsǝlɑɑ nɑ nyʋɣʋ nyǝ́mɑ ntɛ́ ɩsɔtɑɑ.
Ɩsɔ kʋyɔɣɔtʋtʋ tɛlǝsǝlɑɑ pɔpɔtʋnɑɑ ntɛ́ pǝ tɛɛ.
15 Mpɑ pɑ tiikiɣi yǝlɑɑ mɛ tɔ pɑ tolisiɣi-mɛɣɛ,
nɑ mpɑ mɛ mǝ yeki nɑ pɑ́ tiikiɣi-mɛ tɔ, mǝ leki.
16 Pǝ tɔɔ kɛ́ Tɑcɑɑ kɑɑ kenti mǝ ɩfepiyɑ tɔɔ.
Pǝyele ɩ kɑɑ wɛɛnɑ mǝ leelɑɑ nɑ mǝ suluwɑɑ pǝtɔɔtǝlɛ.
Mpi tɔ, ɩ́ kɛ́ ɑsɑɣɑɑ kɛ mǝ tǝnɑɣɑ.
Ɩ́ lɑkɩ kɑwɑlɑɣɑ, nɑ ɩ́ yɔɣɔtǝɣɩ ɑcɑɑlǝtʋ tɔm.
Pɑɑ nɑ mpʋ tɔ, Tɑcɑɑ pɑ́ɑ́nɑ́ tɑ hɛɛ,
ɩ tɔŋnɑ ɩ ŋkumle kɛ teɣetuɣu kɛ́.
17 Yǝlɑɑ ɩsɑɣɑtʋ wɛ kɛ́ ɩsɩɩ kɔkɔ ŋkɑ kɑ nyɑkɩ tɔ.
Kɑ nyɑkɩ sɔwɑ, kɑ nyɑkɩ hɔtʋɣʋ.
Kɑ nyɔɔsɩ nyɑlǝɣɩ nɑ sɩ kpɑɑkɩ ɩsɔtɑɑ tǝliɣiliɣi.
18 Tɑcɑɑ pǝ tǝnɑ pǝ tʋ mʋ pɑ́ɑ́nɑ́,
ɑ nyɑkɩ tɛtʋ nɑ yǝlɑɑ ɩsɩɩ kɔkɔ.
Nɔɣɔlʋ ɩɩ yeki ɩ tɔɣɔntǝlɛ.
19 Pɑ nyɑsǝnɑ ntɔɣɔŋ tɔɔ, pɑ nyɔɣɔsɩ tɑ sɩ,
pɑ́ linɑ mpǝtǝŋ tɔɔ pɑ tɑ hɑɣɑ.
Pɑɑ wei ɩ tɔkɩ ɩ tɔɣɔntǝlɛ wei ɩ kɑ sǝnɑ-ɩ tɔ.
20 Mɑnɑsee nɑ Ɩfǝlɑyim nyǝ́mɑ pɛlɛ pɑ kʋlǝɣɩ tǝmɑ tɔɔ.
Ɩlɛnɑ pɑ nɑɑlɛ pɑ́ kpɛntɩ nɑ pɑ́ kʋlɩ Yutɑ nyǝ́mɑ tɔɔ.
Pɑɑ nɑ mpʋ Tɑcɑɑ pɑ́ɑ́nɑ́ tɑ hɛɛ.
Ɩ tɔŋnɑ ɩ ŋkumle teɣetuɣu kɛ́.