14
Kolontunɑɑ kɑ kuuwɑ mpɑ tɔ pɑ mǝlʋɣʋ
1 Tɑcɑɑ kɑ wii Yɑkɔpʋ lʋlʋɣʋ nyǝ́mɑ mɛ mǝ pǝtɔɔtǝlɛ nɑ ɩ́ tɑsɑ Ɩsɛɣɛlɩ nyǝ́mɑ mɛɣɛ lǝsʋɣʋ nɑ ɩ́ sɩɩ-mɛɣɛ mǝ mɑɣɑmɑɣɑ mǝ tɛtʋ tɑɑ. Mʋʋlɑɑ kɑ sɔɔsɩ mǝ tɔɔ nɑ mǝ nɑ wɛ ɩ́ cɑɣɑ.
2 Piitimnɑɑ lɛlɑɑ kɑ́ kpɑɣɑnɑ Ɩsɛɣɛlɩ nyǝ́mɑ mɛ nɑ pɑ́ mǝŋnɑ-mɛɣɛ mǝ tɛ. Nɑ Tɑcɑɑ tɛtʋ tɔɔ tǝnɑɣɑ mʋʋlɑɑ mpɛ pɑ ɑpɑlɑɑ nɑ pɑ ɑlɑɑ, pɑɑ pǝsɩ Ɩsɛɣɛlɩ nyǝ́mɑ mɛ mǝ yomɑɑ. Ɩ́ kɑ kuu mpɑ pɑɑ kuu mɛ tɔ, nɑ ɩ́ kpɑ sɑlǝkɑ kɛ mpɑ pɑɑ kpɑ-mɛɣɛ sɑlǝkɑ tɔ, nɑ ɩ́ ŋmɑkǝlǝɣɩ-wɛ.
Pɑpiloni wulɑʋ tǝnɑɣɑ
3 Ɩsɛɣɛlɩ nyǝ́mɑ mɛ, Tɑcɑɑ kɑ yele nɑ ɩ́ hɛɛsɩ mǝ wɑhɑlɑnɑɑ nɑ mǝ nǝɣǝsɛɛ nnɑ yomle toŋ nyǝntɛ tǝnɛ tǝ tʋ-mɛ tɔ. Ye pǝ tɑlɑ wɑɑtʋ ɩnɩ ɩlɛ, 4 ɩ tʋ Pɑpiloni wulɑʋ kɛ yontu sɩ: A ɑ, ŋmɑkǝllʋ mǝlɑ ɩsǝnɑ, nyɑ́ tǝnɑɣɑ ntɛ́ yɑɑ?
5 Tɑcɑɑ n yɔkɑ ŋmɑkǝllʋ toŋ nɑ ń pɛlɩ ɩ kpɑ́tʋ́ɣʋ́.
6 Ɩnɩ ɩ mɑkɑɣɑnɑ yǝlɑɑ kɛ kʋtɑmsɑ nɑ pɑ́ɑ́nɑ́ sɔsɔɔnɑ.
Ɩ ŋmɑkǝlǝɣɩ piitimnɑɑ.
Pɑ tʋ ŋmɑkǝllʋ ɩnɩ ɩ wɑɑlɩ.
7 Tɛtʋ tǝnɑ cɑɣɑ tǝpɑmm nɑ hɛɛsʋɣʋ.
Yǝlɑɑ yooki lɑŋhʋlʋmlɛ yontu.
8 Lipɑŋ tɩɩŋ sɔsɔɔŋ lɑŋlɛ hɛɛwɑ nɑ ɩ́ tɔŋ sɩ:
Too ŋmɑkǝllʋ hotuɣu tɔ, nɔɣɔlʋ tɑ kɔntɑ sɩ ɩ sɛtǝɣɩ-tʋ.
9 Atɛtǝlɛ tɑɑ nyǝ́mɑ nɩɩ ŋmɑkǝllʋ nyɑ́
nyɑ́ kɔntɛ tɔm nɑ pǝ́ nyɔmtǝɣɩ-wɛ.
Atɛtʋnɑɑ sɔɔlʋ pɩɩwɑ sɩ pɑ́ mʋ-ŋ.
Nyɑ́ kɔntɛ yelɑɑ nɑ mpɑ pɑɑ kɛ́ ɑwulɑɑ kɛ tɛtʋ tɑɑ tɔ
pɑ́ kʋlǝɣɩ pɑ kumlee tɔɔ kɛ́ nyɑ́ tɔɔ.
10 Nɑ pɑ tǝnɑ pɑ́ yɔɣɔtǝɣɩ sɩ:
Nyɑ́ mɑɣɑmɑɣɑ n pǝsɑ ɩcɑm kɛ teitei kɛ́ ɩsɩɩ tɑ́,
nɑ ń nǝɣǝsǝnɑ-tʋ.
11 Nyɑ́ cǝmǝŋ kɛ pɑ mɑkɑɣɑ nɑ pɑ́ pʋɣʋlǝɣǝnɑ-ŋ.
Nɔɔnɔɔ n mǝlɑ ɑtɛtǝlɛ tɑɑ.
Nyɑ́ kʋhǝntʋɣʋ ntɛ́ tɑsǝtʋ.
Nyɑ́ kʋtɑkʋɣʋ kɛ sonsompee.
12 Tʋlʋmɑlʋɣʋ, nyɑ́ wei n tee kɔkɔ kɛ tɑnɑŋ tɔ,
ɩsǝnɑɣɑ pǝ lɑpɑ nɑ ń hoti ɑtɛ pǝ́cɔ́ nyɑ́ kǝlǝnɑ piitimnɑɑ.
13 Ɩsɩɩ n mɑɣɑsɑɣɑ nyɑ́ tɑɑ sɩ:
Mɑɑ kpɑ ɩsɔtɑɑ, mɑɑ tɛɛ ɩsɔtʋlʋŋɑsɩ tɔɔ.
Mɑɑ sɩɩ mɑ kpelɑɣɑ kɛ pʋɣʋ tɔɔ.
Pʋɣʋ ŋkʋ kʋ tɔɔ kɛ́ tɩɩŋ lɑkɩ
ɩ kotuɣu kɛ ilim ntɔɣɔŋ tɔɔ.
14 Hɑlɩ n tɔŋɑɣɑ sɩ:
Mɑɑ kpɑ hɑtoo comcom nɔɣɔ tɑɑ,
mɑɑ tɛɛ ɩsɔŋmʋntʋ tɔɔ,
mɑɑ wɛɛ ɩsɩɩ ɩsɔtɑɑ Ɩsɔ sɔsɔ.
15 Amɑ pɑ tusɑ-ŋ ɑtɛtǝlɛ tɑɑ.
N hotɑ pʋ́ʋ́ɣʋ́ sɔsɔɔʋ tɑɑ.
16 Nɑ pǝ́ tǝmsǝɣɩ mpɑ pɑ nɑɑkɩ-ŋ tɔ,
nɑ pɑ́ nyǝnǝɣɩ-ŋ tǝpiŋŋ nɑ pɑ́ pɔɔsǝɣɩ pɑ tɩ sɩ:
Yʋlʋ wei ɩnɩ ɩ ciɣitɑɣɑ tɛtʋ nɑ ɩ́ cɔɔsǝɣɩ
kɑwulɑsɩ tɔɣɔlɛ?
17 Ɩnɩ ɩ pǝsɑɣɑnɑ ɑntulinyɑ kɛ wʋlɑɣɑ tɛtʋ,
nɑ ɩ́ kpiisiɣi ɑcɑlɛɛ,
nɑ ɩ́ kisiɣi sɑlǝkɑtʋnɑɑ cɛpʋ nɑ?
18 Pɑɑ piitim mpi pǝ wulɑʋ tooki.
Pɑɑ wei ɩ hǝntɑ ɩ tǝyɑɣɑ tɑɑ kɛ́ nɑ teeli.
19 Amɑ nyɑ́ ɩlɛ, pɑ lɔ-ŋ kɛ́ nɑ ń hɑtǝlǝnɑ nyɑ́ pǝlɑɑʋ.
Pɑ lɔ-ŋ ɑwɑlɩ kɛ́.
N wɛ kɛ́ ɩsɩɩ wei pɑ kʋwɑ yoou tɑɑ tɔ.
N wɛ ɩsɩɩ sǝtɑɑ mpɑ pɑ pɛtɑ
pʋ́ʋ́ɣʋ́ ŋku kʋ tɑɑ wɛ pɛɛ tɔ.
N wɛ ɩsɩɩ sǝtʋ wei pɑ fɛlǝɣɩ nɔɔhɛɛ tɔ.
20 Amɑ nyɑ́ kɑɑ polo ɑwulɑɑ lɛlɑɑ kiŋ kɛ pǝlɑɑʋ tɑɑ.
Mpi tɔ, n wɑkǝlɑ nyɑ́ tɛtʋ, nɑ ń kʋ nyɑ́ yǝlɑɑ.
Pɑ kɑɑ tɑsɑ nyɑ́ piitim ɩsɑɣɑm hǝtɛ yɑɑʋ kɛ pɑɑ wulee.
21 Ɩ́ tɑɣɑnɩ mǝ tɩ,
ɩ́ kʋ́ wulɑʋ ɩnɩ ɩ piyɑ kɛ pɑ cɑɑnɑɑ ɩsɑɣɑtʋ tɔɔ.
Pɑ́ tɑɑ tɑsɑ kʋlʋɣʋ nɑ pɑ́ tɔɣɔ tɛtʋ,
nɑ pɑ́ wɑɑsɩ tǝ tɔɔ kɛ́ ɑcɑlɛɛ.
22 Ḿpʋ́ɣʋ́ pǝ tǝnɑ pǝ tʋ Tɑcɑɑ yɔɣɔtɑɑ sɩ: Mɑɑ kʋlɩ Pɑpiloni nyǝ́mɑ tɔɔ. Mɑɑ kpiisi pɑ tɛtʋ hǝtɛ, nɑ pɑ lʋlʋŋ tǝnɑ nɑ pɑ piitim. 23 Mɑɑ lɑ tǝ tɑɑ kɛ́ lʋcɑɣɑm, nɑ mɑ́ pǝsɩ-tǝɣɩ kʋlɑɑlǝŋ tɛtʋ. Nɑ mɑ́ hɑsɑ-tɩ tǝkpǝlǝkpǝlɩ nɑ sɑŋ. Pǝ tǝnɑ pǝ tʋ Tɑcɑɑ mɑ́ mɑ yɔɣɔtǝnɑ mpʋ.
Nmɑkǝlʋɣʋ tǝnɑ sɩɩ tǝnɑɣɑ
24 Ḿpʋ́ɣʋ́ Pǝ tǝnɑ pǝ tʋ Tɑcɑɑ yɔɣɔtɑɑ nɑ ɩ́ tuu sɩ:
Ye mɑ tɔmɑ sɩ mpi pǝ́ lɑ pǝlɛ pǝ lɑkǝnɑ.
Mɑ́ sɩɩ mpi, pǝlɛ pɩɩ tɔɣɔnɑ.
25 Mɑɑ yɔkɩ Asilii nyǝ́mɑ toŋ kɛ mɑ tɛtʋ tɑɑ,
nɑ mɑ́ fɛlɩ-wɛɣɛ nɔɔhɛɛ kɛ mɑ pɔ́ɔ́ŋ tɑɑ.
Mɑɑ fiti mɑ yǝlɑɑ kɛ pɑ ŋmɑkǝlʋɣʋ tɑɑ.
Mɑɑ kɔ́ɔ́lɩ́ sǝɣǝlɑ wenɑ pɑ sʋkɑ-wɛ tɔɣɔ pɑ nyɔɔŋ tɑɑ.
26 Mpi mɑ sɩɩwɑ sɩ mɑɑ lɑ tɛtʋ tǝnɑ tɔɣɔlɛ.
Ɩsǝnɑ mɑ sɩɩwɑ sɩ mɑɑ tʋ piitimnɑɑ tǝnɑɣɑ niŋ tɔɣɔlɛ.
27 Ye Pǝ tǝnɑ pǝ tʋ Tɑcɑɑ ɩ́ sɩɩ nti
ɑwe kɑ́ yele nɑ tǝ́ lɑ́ yem?
Yɑɑ ye ɩ kʋsɑ ŋkumle ɑwe kɑ́ kpɑnɑ ɩ niŋ?
Tɑcɑɑ kpɑɑlǝɣɩ Filiisi nyǝ́mɑ
28 Wulɑʋ Ahɑsɩ sǝm pǝnɑɣɑ kɛ Ɩsɔ kʋyɔɣɔtʋtʋ tɛlǝsʋlʋ kɑlǝnɑ Filiisi nyǝ́mɑ sɩ:
29 Filiisi nyǝ́mɑ, mǝ lɑŋɑ ɩ́ tɑɑ hʋlʋmǝnɑ kpɑ́tʋ́ɣʋ́ ŋku kʋ
mɑkɑɣɑ-mɛ tɔ kʋ pɛlʋɣʋ tɔm. Mpi tɔ, tʋm kʋsǝpʋ
tɑɑ kɛ́ ɑkɑlɑ kɑ́ lɩɩ. Ɩlɛnɑ tʋm sɔsɔ wei ɩ kʋlǝɣɩ hʋntʋ
tɔ ɩ́ lɩɩ ɑkɑlɑ tɑɑ.
30 Amɑ Ɩsɛɣɛlɩ kʋnyɔntʋnɑɑ sɔsɑɑ kɑ́
tɔɣɔ nɑ pǝ́ tɑlɑ-wɛ,
nɑ wɑhɑlɑ nyǝ́mɑ nɑ́ɑ́ hɛɛsɩ nɑ pɑɑ nyɑŋnɑ pʋlʋ.
Amɑ mɑɑ kʋ pɑ́ nɑ pɑ lʋlʋɣʋ hoolɑɣɑ nyǝ́mɑ.
Ɩlɛnɑ nyɔɣɔsɩ nɑ kolontu nɑ́ɑ́
tɛɛsɩ kʋɣʋ kɛ mpɑ pɩɩ kɑɑsɩ tɔ.
31 Koloosi ɑcɑlɛɛ mɛ mǝ lɑŋɑ ɩ́ wɑkǝlɩ nɑ ɩ́ mɑ́ kɑpusi.
Filiisi nyǝ́mɑ kʋkpɛntʋɣʋ tǝnɑ ɑpɑlʋtʋ lepɑ.
Mpi tɔ, nyɔɔsɩ kʋlǝnɑ ilim ntɔɣɔŋ tɔɔ.
Sɔɣɔntʋ pɑɑ kʋlʋm fɛɩ yoolɑɑ mpɛ pɑ tɑɑ.
32 Wentiɣi pɑɑ cɔ Filiisi nyǝ́mɑ tillɑɑ?
Pɑɑ cɔ-wɛɣɛ sɩ: Tɑcɑɑ mɑɣɑmɑɣɑ sɩɩnɑ Siyɔŋ.
Tǝnɑɣɑ ɩ yǝlɑɑ kʋnyɔntʋnɑɑ kɑ
hiki tǝcɔɔsǝlɛ nɑɑni nyǝntɛ.