1 Pǝnɑɣɑ ŋkɛɣɛ Asilii wulɑʋ Sɑlǝkɔŋ kʋsɑ ɩ yoolɑɑ wulɑʋ sɔsɔ, nɑ ɩ́ tii Filiisi ɩcɑtɛ Asǝtɔtɩ tɔɔ nɑ ɩ́ lɛɛkɩ-tɛ.

2 Wɑɑtʋ ɩnɩ Tɑcɑɑ kɑ tɛmɑ Amɔtɩ pǝyɑlʋ Ɩsɑyii kɛ tɔm heeluɣu. Ɩ heelɑ-ɩ kɛ́ sɩ: Wɔɣɔsɩ lǝyɑɣɑ wontu, nɑ nyɑ́ ntɑŋkpɑlɑ. Ɩlɛnɑ ɩ́ lɑ mpʋ nɑ pǝ́ yele-ɩ kpɛtɛ.

Asǝtɔtɩ ɩcɑtɛ lɛɛkʋɣʋ wɑɑtʋ kɛ Tɑcɑɑ yɔɣɔtɑɑ sɩ: 3 Pǝ kpɛntɑ pɩɩsɩ tooso kɔlɔ mɑ tǝmlɛ tʋ Ɩsɑyii tɔŋ kpɛtɛ. Wontu yɑɑ ntɑŋkpɑlɑ fɛɩ ɩ tɔɔ. Mpʋ pǝ hʋlǝɣǝnɑ Icipiti nɑ Ɩtiyopii pǝ nyǝ́mɑ kɛ mpi pɩɩ tɛ nɑ pǝ́ mɑɣɑnɑ-wɛ tɔ. 4 Pǝ tɑɣɑ pʋlʋ, Asilii wulɑʋ kɑ́ kuu Icipiti nɑ Ɩtiyopii pǝ ɩfepiyɑ nɑ pǝ kʋkpɑtǝlɑɑ kɛ́. Wontu yɑɑ ntɑŋkpɑlɑ kɑɑ wɛɛ pɑ tɔɔ. Pɩɩ yele-wɛɣɛ kpɛtɛ kɛ́ tǝyǝlǝyǝlɩ. Tǝnɑɣɑ Icipiti nyǝ́mɑ kɑ́ tɔɣɔ fɛɛlɛ. 5 Wɑɑtʋ ɩnǝɣɩ mpɑ pɑ tɛɛlɑɣɑ Ɩtiyopii nyǝ́mɑ, yɑɑ pɑ hɔŋɑɣɑ pɑ tǝɣɩ Icipiti nyǝ́mɑ sǝnɑʋ tɔɔ tɔ, pɑ ɑpɑlʋtʋ kɑ́ yɔɔlɩ.

6 Kʋyɑkʋ ŋkʋɣʋ hɔɣɔlʋɣʋ ŋku kʋ tɑɑ tǝ wɛ ɩsǝntɔ tɔ, kʋ nyǝ́mɑ kɑ́ yɔɣɔtɩ sɩ: Tɑ tɛɛlʋɣʋ tɛɛsǝnɑ mpi tɔɣɔlɛ. Mpɛɣɛ tɩɩ hʋʋkɑɣɑ sɩ tɩɩ tʋ kpʋlʋɣʋ nɑ pɑ́ yɑ-tʋɣʋ Asilii nyǝ́mɑ niŋ tɑɑ. Leɣelɛ tɩɩ hikinɑ nyʋɣʋ tʋtʋlɛ kɛ nɔɔnɔɔ?